కెరీర్ చివరి బంతికి కూడా వికెట్ తీసిన గొప్ప బౌల‌ర్లు ఎవ‌రో తెలుసా?

Cricket: ఇప్ప‌టివ‌ర‌కు చాలా మంది లెజెండ‌రీ బౌల‌ర్లు త‌మ అద్భుతమైన బౌలింగ్ తో క్రికెట్ ప్రపంచాన్ని ఏలారు. అయితే, త‌మ కెరీర్ చివ‌రి బంతికి కూడా వికెట్ తీసిన వారు చాలా త‌క్కువ మంది ఉన్నారు. అలాంటి లెజెండ‌రీ బౌల‌ర్ల గురించి ఇప్పుడు తెలుసుకుందాం.  

Lasith Malinga

Cricket: అంతర్జాతీయ క్రికెట్‌లో వికెట్లు తీయడం ప్రతి బౌలర్ కు పెద్ద కల. ఇప్ప‌టివ‌ర‌కు సాగిన క్రికెట్ హిస్ట‌రీని గ‌మ‌నిస్తే బ్యాట్స్‌మన్‌ను ట్రాప్ చేయడానికి బౌలర్లు త‌మ ముందున్న అన్ని పద్ధతులను ప్రయత్నిస్తారు. ఇలా చాలా రికార్డులు సృష్టించిన బౌల‌ర్లు ఉన్నారు. అయితే, లెజెండ‌రీ బౌల‌ర్ల‌కు సైతం సాధ్యం కానీ ఒక రికార్డును 4 గొప్ప బౌలర్లు సాధించారు.

వారు తమ అంతర్జాతీయ క్రికెట్ కెరీర్‌లో చాలా వికెట్లు పడగొట్టారు. ఆసక్తికరమైన విషయం ఏమిటంటే.. ఈ నలుగురు బౌలర్లు తమ అంతర్జాతీయ క్రికెట్ కెరీర్‌లో చివరి బంతికి కూడా వికెట్ తీసి అద్భుతం చేశారు. అలా వారి కెరీర్‌లో చివరి బంతికి కూడా వికెట్లు తీసిన న‌లుగురు బౌల‌ర్ల గురించి ఇప్పుడు తెలుసుకుందాం. 

muttaiah muralidharan

1. ముత్తయ్య మురళీధరన్

క్రికెట్ చరిత్రలో గొప్ప స్పిన్నర్లలో ఒకరు ముత్తయ్య మురళీధరన్. ఈ శ్రీలంక స్టార్ బౌల‌ర్  తన అద్భుత బౌలింగ్‌కు ప్రసిద్ధి చెందాడు. తన సూప‌ర్ బౌలింగ్ తో ప్ర‌పంచంలోని దిగ్గ‌జ బ్యాట్స్‌మెన్ ల‌ను సైతం వ‌ణికించాడు. క్రికెట్ లో చాలా రికార్డులు సృష్టించిన ముత్త‌య్య ముర‌ళీధ‌ర‌న్ టెస్టు, వన్డే క్రికెట్‌లో అత్యధిక వికెట్లు తీసిన బౌలర్‌గా ఘ‌న‌త సాధించాడు. 

ఏ బ్యాట్స్‌మెన్ అయినా  ముత్త‌య్య‌ గూగ్లీ, 'దూస్రా' ఆడటం అంత సులభం కాదు. ముత్తయ్య మురళీధరన్ టెస్టు క్రికెట్‌లో 800 వికెట్లు, వన్డే క్రికెట్‌లో 534 వికెట్లు తీశాడు. అతను తన టెస్ట్ కెరీర్‌లో చివరి బంతికి భారత ఆటగాడు ప్రజ్ఞాన్ ఓజా వికెట్ తీశాడు. ఇలా త‌న కెరీర్ చివ‌రి బంతికి కూడా వికెట్ తీసిన గొప్ప బౌల‌ర్ల‌లో ఒక‌రిగా నిలిచారు. శ్రీలంక జట్టుకు ఒంటిచేత్తో అనేక విజయాలు అందించాడు.  

2. గ్లెన్ మెక్‌గ్రాత్

ఆస్ట్రేలియా కు చెందిన ఈ లెజెండ‌రీ బౌల‌ర్ బౌలింగ్ అంటే వ‌ణికిపోయిన క్రికెట‌ర్లు చాలా మంది ఉన్నారు.  ప్రాణాంతక బౌలర్లలో ఒకరైన గ్లెన్ మెక్‌గ్రాత్ తన ఖచ్చితమైన లైన్ లెంగ్త్ బౌలింగ్ తో ప్రసిద్ధి చెందాడు. అతని బౌలింగ్ ను ఆడటం ఏ బ్యాట్స్‌మెన్‌కి అంత సులభం కాదు. అతన్ని బౌలింగ్ చక్రవర్తి అని కూడా పిలుస్తారు.

చాలా మంది ప్లేయ‌ర్ల‌ను గ్రౌండ్ లోకి ఇలా వ‌చ్చిన వెంట‌నే త‌న ప‌దునైన బౌలింగ్ తో  క్ష‌ణాల్లో పెవిలియ‌న్ కు పంప‌డంలో దిట్ట‌. ఈ బౌలర్ రెడ్ బాల్ క్రికెట్‌లో చాలా ప్రాణాంతకమైన బౌలింగ్‌కు ప్రసిద్ధి చెందాడు. అతను ఆస్ట్రేలియా తరపున మూడు ఫార్మాట్లలో ఆడాడు. మూడు ఫార్మాట్లలో కలిపి మొత్తం 949 వికెట్లు తీశాడు. అతను తన టెస్ట్ కెరీర్‌లో చివరి బంతికి ఇంగ్లాండ్‌కు చెందిన జేమ్స్ అండర్సన్‌ను అవుట్ చేశాడు. ఆస్ట్రేలియాకు మాత్రమే కాదు ప్రపంచ క్రికెట్ లో గొప్ప బౌలర్లలో ఒకరిగా గుర్తింపు సాధించాడు. 

Richard Hadlee

3. రిచర్డ్ హ్యాడ్లీ

రిచర్డ్ హ్యాడ్లీ ప్రపంచంలోని గొప్ప ఆటగాళ్ళలో ఒకరిగా గుర్తింపు పొందాడు. రిచర్డ్ హ్యాడ్లీ టెస్ట్ క్రికెట్‌లో బౌలింగ్‌కు అద్భుతమైన ఉదాహరణలు అందించాడు. న్యూజిలాండ్‌ తరఫున 86 టెస్టుల్లో 431 వికెట్లు తీశాడు. అతను తన పేరిట అత్యధిక వికెట్లు తీసిన రికార్డును కలిగి ఉన్నాడు, ఆ తర్వాత దానిని భారత ఆటగాడు కపిల్ దేవ్ బద్దలు కొట్టాడు. హాడ్లీ తన కెరీర్‌లో చివరి బంతిని ఇంగ్లండ్‌కు చెందిన డి మాల్కమ్‌కి వేశాడు. అది వికెట్ రూపంలో ద‌క్కింది.

4. లసిత్ మలింగ

యార్కర్ కింగ్‌గా ప్రపంచవ్యాప్తంగా త‌న‌కంటూ ప్ర‌త్యేక గుర్తింపు సాధించిన లసిత్ మలింగ.. శ్రీలంక భ‌యంక‌ర‌మైన లెజెండ‌రీ బౌలర్లలో ఒకరు. అతను తన బౌలింగ్ యాక్షన్, గింగిరాల జుట్టుతో చాలా ప్రసిద్ధి చెందాడు. తన ఖచ్చితమైన యార్కర్‌తో ప్రపంచంలోని గొప్ప బ్యాట్స్‌మెన్‌ల బోల్తా కొట్టించాడు మ‌లింగ‌. 

మలింగ తన కెరీర్‌లో చివరి బంతికి వికెట్ తీసిన ఘనత సాధించాడు. మలింగ తన వన్డే కెరీర్‌లో చివరి బంతికి బంగ్లాదేశ్‌కు చెందిన ముస్తాఫిజుర్ రెహ్మాన్ వికెట్ తీశాడు. వన్డేల్లో నాలుగు బంతుల్లో నాలుగు వికెట్లు తీసిన బౌలర్ లసిత్ మలింగ. తన కెరీర్ లో శ్రీలంకకు అనేక విజయాలు అందించారు. ఐపీఎల్ లో కూడా తన బౌలింగ్ పదను రుచిచూపించాడు. ఒంటిచేత్తో చాలా మ్యాచ్ లను మలుపు తిప్పాడు.