సచిన్ సాధించినదానితో పోలిస్తే వీళ్లంతా జుజూబి.. ఆ స్థాయి వేరు, ఆయన స్థానం వేరు..: జో రూట్

Sachin Tendulkar: భారత క్రికెట్  దేవుడు సచిన్ టెండూల్కర్ ఆట నుంచి తప్పుకుని దశాబ్దం గడిచినా ఇప్పటికీ  ఈ దిగ్గజం పేరు   అభిమానుల నోళ్లో నానుతూనే ఉంది.  సచిన్ సాధించిన రికార్డులు, చేసిన పరుగులు ప్రపంచంలో మరే బ్యాటర్ కు కూడా సాధ్యం కాదు.

90, 2000వ దశకంలో భారత క్రికెట్ కు కర్త, కర్మ, క్రియగా మారిన సచిన్ టెండూల్కర్ గురించి ప్రత్యేకంగా పరిచయం అక్కర్లేదు. అంతర్జాతీయ క్రికెట్ లో  వంద సెంచరీలు, వేలాది పరుగులు,  లెక్కకు మిక్కిలి రికార్డులు సాధించిన మాస్టర్ బ్లాస్టర్.. భారత క్రికెట్ తో పాటు ప్రపంచ క్రికెట్ పై చెరగని ముద్ర వేశాడు.

తన సమకాలీకులతో పాటు ఆధునిక క్రికెట్ ‌లో దిగ్గజ బ్యాటర్లుగా వెలుగొందుతున్న వారెవరూ  సచిన్ రికార్డులను సాధించే  సాహసం చేయలేదు.  సమీప భవిష్యత్ లో  కూడా మాస్టర్ బ్లాస్టర్ రికార్డులకు వచ్చిన లోటేమీ లేదు.   వన్డేలలో  విరాట్ కోహ్లీ సచిన్  సెంచరీల రికార్డుకు చేరువగా వస్తున్నా టెస్టులలో మాత్రం అది అసాధ్యమే. 

కాగా ఆధునిక క్రికెట్ లో ఫ్యాబ్ -4 ఆటగాళ్లుగా పిలువబడే  జో రూట్, కోహ్లీ, స్మిత్, కేన్ విలిమయ్సమన్ లలో   ఒకడైన ఇంగ్లాండ్ మాజీ సారథి  రూట్ తాజాగా సచిన్ పై ప్రశంసల వర్షం కురిపించాడు. ప్రస్తుతం క్రికెట్ లో గొప్ప బ్యాటర్లు ఎంత మంది ఉన్నా సచిన్ స్థాయి వేరని అన్నాడు. 

ఇంటర్నేషనల్ లీగ్ టీ20 టోర్నీ ప్రారంభం సందర్భంగా   జో రూట్ మాట్లాడుతూ.. ‘ప్రస్తుతం  క్రికెట్ లో కొంతమంది గొప్ప  ప్లేయర్లు చాలా మందే ఉన్నారు. కానీ క్రికెట్ లో సచిన్ సాధించినదానితో పోలిస్తే  వాళ్లంతా జుజూబీ.  రెండు దశాబ్దాల పాటు ఒక జట్టు బ్యాటింగ్ కు వెన్నెముకగా నిలవడం మాములు విషయం కాదు. 

అంత చిన్న వయసులో జాతీయ జట్టులోకి వచ్చి  20 ఏండ్ల పాటు క్రికెట్ ప్రపంచాన్ని శాసించి తను  ఆట నుంచి వెళ్లిపోయేప్పుడు కూడా ఒత్తిడిలో మెరుగ్గా ఆడటం ఆయనకే చెల్లింది.  తన భుజాలపై ఒత్తిడి అనే బరువును ఆయన 20 ఏండ్ల పాటు మోశారు. 

సచిన్ నేను పుట్టకముందే అంతర్జాతీయ క్రికెట్ లోకి ఎంట్రీ ఇచ్చారు. నేను అంతర్జాతీయ క్రికెట్ ఆడే సమయానికి ఆయన ఇంకా ఆడుతున్నారు. నిలకడ అంటే అది. సచిన్ ఒక లెజెండ్.  నా చిన్నతనంలో నేను సచిన్ ను ఆరాధించేవాడిని.  ఆయన ఆడే విధానం నన్ను ఆకట్టుకునేది. ఒక్క భారత క్రికెట్ కే కాదు అంతర్జాతీయ  క్రికెట్ కు ఆయన చేసిన సేవలు ఎంతో గొప్పవి..’అని కొనియాడాడు.