టీ20 వరల్డ్‌కప్ 2021 టోర్నీలో వరుసగా ఐదు మ్యాచుల్లో గెలిచి, విజయోత్సహంతో సెమీ ఫైనల్ బరిలో దిగింది పాకిస్తాన్. వరుసగా ఆరు మ్యాచుల్లో జట్టులో మార్పులు చేయకుండా ఒకే ప్లేయింగ్ ఎలెవన్‌తో ఆడి సరికొత్త రికార్డు క్రియేట్ చేసింది పాక్...
పాకిస్తాన్ ఆడుతున్న తీరు చూసి ఆస్ట్రేలియా కూడా కాసింత జంకినట్టు కనిపించింది. పాక్ బ్యాటింగ్ చేస్తున్న సమయంలో డేవిడ్ వార్నర్, స్టీవ్ స్మిత్ వంటి ఫీల్డర్లు కూడా క్యాచ్ డ్రాప్ చేశారు...
అయితే నిజ జీవితంలో ఓడలు బండ్లు, బండ్లు ఓడలు కావడానికి పెద్ద సమయం పట్టనట్టే... ఆటలో కూడా ఐదు మ్యాచులు గెలిచిన జట్టు, ఓటమి రుచి చూడడానికి ఒక్క మ్యాచ్ చాలు... అలాంటి ఓటమి పాక్‌కి ఆస్ట్రేలియాతో జరిగిన సెమీ ఫైనల్‌లో ఎదురైంది...
177 పరుగుల లక్ష్యాన్ని 5 వికెట్లు కోల్పోయి, ఆరు బంతులు మిగిలి ఉండగానే ఛేదించి, టీ20 వరల్డ్‌కప్ 2021 టోర్నీ ఫైనల్‌లోకి దూసుకెళ్లింది ఆస్ట్రేలియా... ఆసీస్‌తో పాటు పాక్ ఫీల్డర్లు కూడా కొన్ని క్యాచులను డ్రాప్ చేశారు.
షాహీన్ ఆఫ్రిదీ వేసిన 19వ ఓవర్ మూడో బంతికి మాథ్యూ వేడ్ ఇచ్చిన క్యాచ్‌ను బౌండరీ లైన్ దగ్గర హసన్ ఆలీ జారవిడిచాడు. ఆ తర్వాత వరుసగా మూడు సిక్సర్లు బాదిన వేడ్, మ్యాచ్‌ను మరో ఓవర్ ఉండగానే ముగించాడు...
భారత్, పాకిస్తాన్ మధ్య జరిగిన మ్యాచ్‌లో భారత పేసర్ మహ్మద్ షమీ వేసిన 17వ ఓవర్‌లో 17 పరుగులు రాబట్టిన పాక్ ఓపెనర్లు రిజ్వాన్, బాబర్ ఆజమ్ మ్యాచ్‌ను ముగించేశారు...
మహ్మద్ షమీ ముస్లిం మతస్తుడు కావడంతో అతన్ని నీచంగా తిడుతూ, కావాలనే భారత జట్టును ఓడించావని దూషిస్తూ సోషల్ మీడియా వేదికగా దాడికి పాల్పడ్డారు కొందరు నెటిజన్లు...
ఇప్పుడు సరిగ్గా అదే పరిస్థితిని ఎదుర్కొంటున్నాడు హసన్ ఆలీ. ‘హసన్ ఆలీ క్యాచ్ డ్రాప్ చేయడం వల్లే మేం ఓడిపోయాం. అదే టర్నింగ్ పాయింట్. ఆ క్యాచ్ అందుకుని ఉంటే పరిస్థితి వేరేగా ఉండేదంటూ’ కామెంట్ చేశాడు పాక్ కెప్టెన్ బాబర్ ఆజమ్...
పరిణితి లేని కెప్టెన్‌గా తగ్గట్టే పాక్ క్రికెట్ ఫ్యాన్స్ కూడా హసన్ ఆలీని, అతని భార్యను, కుటుంబాన్ని బూతులు తిడుతూ సైబర్ దాడి చేస్తున్నారు...
మహ్మద్ షమీపై జరిగిన సైబర్ అటాక్‌ని ఖండించిన పాక్ క్రికెటర్లు ఎవ్వరూ, హసన్ ఆలీ గురించి ఒక్క ట్వీట్ కూడా చేయకపోవడం విశేషం...
హసన్ ఆలీ, భారతదేశానికి చెందిన ఇంజనీర్ సమీయా అర్జోని ప్రేమించి పెళ్లి చేసుకున్నాడు. శత్రుదేశానికి చెందిన అమ్మాయిని పెళ్లాడడంతో పాక్ జనాలు మరింత రెచ్చిపోయి, సమీయా ఇన్‌స్టా అకౌంట్‌పై బూతులతో దాడి చేస్తున్నారు...
ఈ సైబర్ దాడిని భారత నెటిజన్లు ఖండిస్తున్నారు. హసన్ ఆలీకి మద్ధతుగా ఉన్నామని భరోసా ఇస్తూ ‘IND stand with Hasan Ali’హ్యాష్ ట్యాగ్‌ని ట్రెండ్ చేస్తున్నారు...
హసన్ ఆలీ భార్య సమీయా అర్జోతో పాటు సెమీ ఫైనల్ మ్యాచ్‌లో 1 పరుగుకే క్లీన్ బౌల్డ్ అయిన షోయబ్ మాలిక్ భార్య, భారత టెన్నిస్ స్టార్ సానియా మీర్జా కూడా ఈ విధమైన కామెంట్లు, పోస్టులను ఎదుర్కొంటుండడం విశేషం...