IPL 2023 Playoffs: ఐపీఎల్ - 16 లో నేడు ముంబై ఇండియన్స్.. గుజరాత్ టైటాన్స్ ను ఢీకొనబోతున్నది. ఈ మ్యాచ్ కు ముందు హర్బజన్ సింగ్.. రోహిత్ సేనకు ముందస్తు హెచ్చరిక చేశాడు.
ఇండియన్ ప్రీమియర్ లీగ్ - 2023 ఎడిషన్ లో శుక్రవారం అహ్మదాబాద్ వేదికగా ముంబై ఇండియన్స్ - గుజరాత్ టైటాన్స్ మధ్య రెండో క్వాలిఫయర్ మ్యాచ్ జరుగనున్న విషయం తెలిసిందే. అయితే ఈ మ్యాచ్ కు ముందే రోహిత్ శర్మ అండ్ కో. కు ముంబై మాజీ సారథి హర్భజన్ సింగ్ ముందస్తు వార్నింగ్ ఇచ్చాడు. గుజరాత్ ఆటగాడు రషీద్ ఖాన్ తో జాగ్రత్తగా ఉండాలని భజ్జీ సూచించాడు.
హర్భజన్ మాట్లాడుతూ.. ‘రషీద్ ఖాన్ ప్రత్యేకమైన ఆటగాడు. బౌలింగ్ లో వికెట్లు తీయగలడు. ఆఖర్లో బ్యాటింగ్ కు వచ్చి పరుగులు చేయగలడు. ఫీల్డింగ్ లో కూడా అతడికి తిరుగులేదు. ఈ సీజన్ లో కొన్ని కళ్లు చెదిరే క్యాచ్ లు కూడా అందుకున్నాడు.
హార్ధిక్ పాండ్యా అందుబాటులో లేనప్పుడు అతడే గుజరాత్ సారథ్య పగ్గాలు కూడా చేతపట్టాడు. అతడు ఆల్ రౌండర్. గుజరాత్ టైటాన్స్ కు అలాంటి ప్లేయర్ ఉండటం ఎంతో అదృష్టం. అతడితో చాలా జాగ్రత్తగా ఉండాలి..’అని అన్నాడు.
మహ్మద్ షమీ గురించి మాట్లాడుతూ.. ‘ఇటువంటి బౌలర్ మాకు కూడా ఉండాలనుకునే బౌలర్ షమీ. కొత్త బంతితో షమీ చెలరేగుతున్నాడు. డెత్ ఓవర్లలో యార్కర్లతో చెలరేగుతాడు. టీమ్ కు ఎప్పుడు అవసరం వచ్చినా వికెట్ తీయడానికి ముందుంటాడు. సీమ్ పొజిషనల్ లో షమీకి తిరుగులేదు. అతడు స్వింగ్ వేస్తే ఎంతటి బ్యాటర్ కు అయినా తిప్పలు తప్పవు...’అని కొనియాడాడు.
ఇక ముంబై కెప్టెన్ రోహిత్ శర్మ యువ ఆటగాళ్ల కెప్టెన్ అని.. అతడు విజయాలను తలకు ఎక్కించుకోని గొప్ప సారథి అని కొనియాడాడు. ‘రోహిత్ చాలా కూల్ కెప్టెన్. టీమ్ లో ఎవరైనా యంగ్ స్టార్స్ తమకు ఏ సందేహం వచ్చినా రోహిత్ ను వెళ్లి అడగొచ్చు. హిట్‌మ్యాన్ వారికి ఆ స్పేస్ ఇస్తాడు.
ఈ బచ్చాగాళ్లకు మనం చెప్పేది ఏంటి అన్న ఈగో అతడిలో కనిపించదు. అన్‌క్యాప్డ్ ప్లేయర్స్ తో రోహిత్ ఎక్కువ సమయం గడుపుతాడు. అన్నింటికంటే మించింది అతడెప్పుడూ సక్సెస్ ను తలలోకి ఎక్కించుకోడు.. విజయాలకు పొంగిపోడు. జట్టులోని సీనియర్ ప్లేయర్స్ కు చాలా మర్యాదనిస్తాడు. రోహిత్ గొప్ప ప్లేయర్...’ అని భజ్జీ అన్నాడు.