డిల్లీ క్యాపిటల్, లక్నో సూపర్ జెయింట్స్ మధ్య విశాఖపట్నంలో తొలి ఐపిఎల్ మ్యాచ్ ఉత్కంఠభరితంగా సాగింది. మైదానమే చిన్నబోయేలా డిల్లీ బ్యాటర్ విప్రాజ్ నిగమ్ సుడిగాలి ఇన్నింగ్స్ సాగింది. ఇంతకూ ఈ విప్రాజ్ ఎవరో తెలుసా?
IPL 2025 DC vs LSG : విప్రాజ్ నిగమ్ ... ఇప్పుడు ఆ ఆల్ రౌండర్ పేరు మారుమోగిపోతోంది. అతడి ఆటను చూసి క్రికెట్ ప్రియులు మైమరచిపోయారు... గెలుపు ఆశలు చచ్చి.పోయిన డిల్లీ క్యాపిటల్స్ అభిమానుల్లో కొత్త జోష్ నింపాడు ఈ 20 ఏళ్ల కుర్రాడు. విశాఖపట్నం వేదికగా లక్నో సూపర్ జెయింట్స్ ను డిల్లీ మట్టికరిపించడంలో విప్రాజ్ ది కీలక పాత్ర. అటు బ్యాట్, ఇటు బాల్ తో అదరగొట్టి డిల్లీ కేపిటల్స్ కు ఐపిఎల్ 2025 లో డిల్లీకి మొదటి విజయాన్ని అందించాడు.
విప్రాజ్ నిగమ్ లక్నో బౌలర్లలో సరిగమలు పలికించాడు... బౌలర్ ఎవరైనా కానీ నా టార్గెట్ బౌండరీ బాదడమే అన్నట్లుగా ఆడాడు. టకటకా వికెట్లు పడుతున్న సమయంలో బ్యాటింగ్ కు దిగిన అతడు ఏమాత్రం ఒత్తిడికి గురికాకుండా పరుగుల వరద పారించాడు. దీంతో గెలుపు అసాధ్యం అనుకున్న డిల్లీ విజయం సాధించింది... గెలిచితీరుతుందని అనుకున్న లక్నో ఓటమిపాలయ్యింది.
ఎవరీ విప్రాజ్ ,నిగమ్?
విశాఖపట్నం మైదానమే చిన్నబోయేలా బౌండరీలు బాది విప్రాజ్ నిగమ్ తన సత్తాను పరిచయం చేసాడు. చివర్లో బ్యాటింగ్ కు దిగిన ఇతడు కేవలం 15 బంతుల్లోనే 39 పరుగులు చేసాడు... ఇందులో 5 ఫోర్లు, 2 సిక్సర్లు ఉన్నాయి... అంటే బౌండరీతోనే 32 పరుగులు బౌండరీలతో వచ్చినవే. దీన్నిబట్టే నిగమ్ బ్యాటింగ్ ఎంత విధ్వంసకరంగా సాగిందో అర్ధం చేసుకోవచ్చు.
డిల్లీ క్యాపిటల్ తరపున ఐపిఎల్ 2025 లో ఆరంగేట్రం చేసాడు విప్రాజ్ నిగమ్. మొదటి మ్యాచ్ లోనే అద్భుతమైన ఇన్నింగ్స్ ఆడాడు. అతడి ఆటనుచూసి ప్రత్యర్థి బౌలర్లే భయపడిపోయారు... అంత విధ్వంసకరంగా సాగింది. అసలు గెలుపుపైనే నమ్మకంలేని స్థాయినుండి మరో 3 బంతులు మిగిలుండగానే డిల్లీ విజయం సాధించిందంటే అది విప్రాజ్ మెరుపు ఇన్నింగ్సే వల్లే సాధ్యమయ్యింది.
డిల్లీ విజయంలో కీలకంగా వ్యవహరించి విప్రాజ్ ఉత్తర ప్రదేశ్ కు చెందిన ఆల్ రౌండర్. ఇతడు మంచి స్పిన్నర్, మంచి హిట్టర్. అటు బ్యాట్, ఇటు బాల్ తో మ్యాజిక్ చేయగల విప్రాజ్ ను డిల్లీ కేవలం రూ.50 లక్షలకు సొంతం చేసుకుంది.
ఇతడు సయ్యద్ మస్తాన్ అలీ ట్రోఫీ 2024-25 లో అద్భుతంగా రాణించి డిల్లీ యాజమాన్యం కంట్లో పడ్డాడు. ఇతడు కేవలం 7 ఎకానమీతో ఎనిమిది వికెట్లు పడగొట్టాడు. అతడికి బ్యాటింగ్ అవకాశాలు ఎక్కువగా రాలేదు... ఆడిన ఒక్క మ్యాచ్ లోనూ ఎనిమిది బంతుల్లో 27 పరుగులు చేసాడు.
అశుతోష్ తో కలిసి విప్రాన్ నిగమ్ విధ్వంసం :
డిల్లీ ఇన్నింగ్స్ 12 ఓవర్లో స్టబ్స్ ఔటవడంతో విప్రాజ్ నిగమ్ క్రీజులోకి వచ్చాడు. అతడిపై ఏమాత్రం అంచనాలు లేవు... టీం కూడా గెలుపుకు చాలాదూరంలో నిలిచింది. ఇలాంటి సమయంలో బరిలోకి దిగిన విప్రాన్ కు తనను తాను నిరూపించుకునే అవకాశం వచ్చింది. దీన్ని అతడు సద్వినియోగం చేసుకున్నాడు.
క్రీజులో కుదురుకున్నాక తన విశ్వరూపం చూపించాడు. రవి బిష్ణోయ్ వేసిన 13వ ఓవర్లో ఓ సిక్స్, రెండు ఫోర్లు బాదాడు విప్రాజ్. ఆ తర్వాత షహబాజ్ పనిపట్టాడు... ఇతడి ఓవర్లో ఓ ఫోర్, ఓ సిక్సర్ బాదాడు. ప్రిన్స్ యాదవ్ ఓవర్లో వరుసగా రెండు ఫోర్లు బాదాడు. ఇలా కేవలం 15 బంతులే ఆడిన అతడు రెండు సిక్సులు, ఐదు ఫోర్లతో ఏకంగా 39 పరుగులు చేసాడు.
ఇలా దూకుడుగా ఆడే ప్రయత్నంలో దిగ్వేష్ రథి బౌలింగ్ లో సిద్దార్థ్ కు క్యాచ్ ఇచ్చాడు. అయితే అప్పటికే లక్నోకు చేయాల్సిన డ్యామేజ్ చేసాడు. విప్రాజ్ ఔటైనా అశుతోష్ చివరివరకు క్రీజులో నిలిచి డిల్లీకి విజయాన్ని అందించాడు. మరో 3 బంతులు మిగిలుండగానే లక్ష్యాన్ని చేధించింది డిల్లీ క్యాపిటల్స్.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి