IPL 2023 Playoffs: ఐపీఎల్ లో అత్యంత విజయవంతమైన జట్లుగా ఉన్న ముంబై ఇండియన్స్, చెన్నై సూపర్ కింగ్స్ ఈ సీజన్ లో ప్లేఆఫ్స్ కు చేరాయి. కానీ గత సీజన్ లో ఈ రెండు జట్ల ప్రదర్శన అత్యంత పేలవంగా సాగింది.
ఐపీఎల్ లో ప్రస్తుతం జరుగుతున్నది 16వ సీజన్. ఇందులో ఏకంగా 9 సార్లు ట్రోఫీలను నెగ్గింది ఆ రెండు జట్లే. ప్లేఆఫ్స్ లో అయితే ఒక జట్టు 14 సీజన్లలో 12 సార్లు చేరగా.. మరో జట్టు 10 సార్లు ఈ ఘనత సాధించింది. కానీ గతేడాది ఈ రెండు జట్లు దారుణ వైఫల్యాలతో పాయింట్ల పట్టికలో అట్టడుగున నిలిచాయి.
ఐపీఎల్ - 2022లో ముంబై ఇండియన్స్, చెన్నై సూపర్ కింగ్స్ ల వైఫల్యాలు చూసి ఆ జట్ల అభిమానులతో పాటు ఇతర టీమ్స్ ఫ్యాన్స్ కూడా జాలి చూపించేంత దారుణంగా ఉంది ఈ రెండు జట్ల ప్రదర్శన. గత సీజన్ లో ముంబై, చెన్నైలు 14 మ్యాచ్ లు ఆడి నాలుగు మాత్రమే గెలిచి పది మ్యాచ్ లలో ఓడాయి.
రెండు జట్లకూ 8 పాయింట్లే ఉన్నా నెట్ రన్ రేట్ కాస్త మెరుగ్గా ఉండటంతో ధోనీ సేన 9వ స్థానంలో ఉండగా ముంబై పదో స్థానానికి పరిమితమైంది. ఈ రెండు జట్లు ప్లేఆఫ్స్ లో లేకుండా ఒక సీజన్ జరుగడం గమనార్హం.
కానీ ఈ ఏడాది ఆ జట్టు స్ట్రాంగ్ కమ్ బ్యాక్ ఇచ్చాయి. ఈ రెండు జట్లకూ స్టార్ ప్లేయర్లు దూరమైనా.. కీలక ఆటగాళ్లు రిటైర్మెంట్ ప్రకటించినా.. పటిష్టమైన బౌలింగ్ యూనిట్ లేకపోయినా ఉన్న వనరులను సక్రమంగా వినియోగించుకున్నారు ధోని, రోహిత్ లు.
ముంబై ఇండియన్స్ బౌలింగ్ అంటేనే బుమ్రా. అటువంటి బుమ్రా ఈ సీజన్ లో దూరమయ్యాడు. ఆర్చర్ ను తీసుకొచ్చినా అతడు ఆడింది నాలుగు మ్యాచ్ లే అయినా అందులో కూడా ఏమంత గొప్ప ప్రదర్శన చేయలేదు. ట్రెంట్ బౌల్ట్ వంటి బౌలర్ ను రెండేండ్ల క్రితమే వేలానికి వదిలేసిన ముంబై.. ఈ సీజన్ లో ఆకాశ్ మధ్వాల్, అర్జున్ టెండూల్కర్, జేసన్ బెహ్రన్‌డార్ఫ్ వంటి అనుభవం లేని పేసర్లతో నెట్టుకొచ్చింది.
చెన్నైది కూడా దాదాపు ఇదే పరిస్థితి. సీజన్ కు ముందే కైల్ జెమీసన్, ముకేశ్ చౌదరి గాయాల కారణంగా దూరమయ్యారు. దీపక్ చాహర్ రెండు మ్యాచ్ లు ఆడగానే తొడ గాయంతో మళ్లీ చాలా మ్యాచ్ లకు దూరంగానే ఉన్నాడు. ఈ క్రమంలో ధోని అంతర్జాతీయ అనుభవమే లేని ఆకాశ్ సింగ్, తుషార్ దేశ్‌పాండే, మతీశ పతిరానలతో అద్భుతాలు చేశాడు.
బ్యాటింగ్ లో మాత్రం ఈ రెండు జట్లు రాక్ సాలిడ్ గా ఉండటం ముంబై, చెన్నైలకు కలిసొచ్చింది. ముంబైలో రోహిత్, ఇషాన్, సూర్య, తిలక్ వర్మ, టిమ్ డేవిడ్, కామెరూన్ గ్రీన్, నెహల్ వధెర లు ఆ జట్టు విజయాల్లో కీలక పాత్ర పోషించారు.
చెన్నైలో కూడా రుతురాజ్ గైక్వాడ్, డెవాన్ కాన్వే, అజింక్యా రహానే, శివమ్ దూబే, రవీంద్ర జడేజా.. ఆఖర్లో ధోని వచ్చి సిక్సర్ల మెరుపులతో తమ జట్టు భారీ స్కోర్లు చేయడంలో దోహదపడ్డారు. ఇక మరోసారి ఈ రెండు జట్లు ప్లేఆఫ్స్ కు చేరిన నేపథ్యంలో ముంబై - చెన్నైలు ఫైనల్ చేరితే అది మరో ఎల్‌క్లాసికోకు రంగం సిద్ధమైనట్టే..