ఆస్ట్రేలియా టూర్‌లో ఆరంగ్రేటం చేసినప్పటి నుంచి అదరగొడుతున్నాడు హైదరాబాదీ పేసర్ మహ్మద్ సిరాజ్. ఎంట్రీ ఇచ్చినప్పటి నుంచి టెస్టుల్లో అద్భుతమైన ప్రదర్శనతో ఆకట్టుకుంటున్న సిరాజ్... లార్డ్స్ టెస్టులో 8 వికెట్లు తీసి భారత్ విజయంలో కీలక పాత్ర పోషించాడు...
తొలి ఇన్నింగ్స్‌లో సెంచరీ చేసి, టీమిండియా భారీ స్కోరు చేయడానికి కారణమైన కెఎల్ రాహుల్‌కి ‘మ్యాన్ ఆఫ్ ది మ్యాచ్’ దక్కినా... రెండు ఇన్నింగ్స్‌ల్లో నాలుగేసి వికెట్లు తీసిన మహ్మద్ సిరాజ్ ఇస్తే కరెక్టుగా ఉండేదని చాలామంది క్రికెట్ ఫ్యాన్స్, విశ్లేషకులు అభిప్రాయపడ్డారు...
ఆస్ట్రేలియాలో గబ్బా టెస్టులో రెండో ఇన్నింగ్స్‌లో ఐదు వికెట్లు తీసిన మహ్మద్ సిరాజ్... డబ్ల్యూటీసీ ఫైనల్ మ్యాచ్‌లో ఆడి ఉంటే రిజల్ట్ వేరేగా ఉండేదనే వాళ్లూ లేకపోలేదు. బుమ్రా స్థానంలో సిరాజ్‌ను ఆడించినా, టీమిండియా గెలిచేదని కామెంట్లు వినిపించాయి...
లార్డ్స్ మైదానంలో టీమిండియా తరుపున అత్యుత్తమ గణాంకాలు నమోదుచేసిన బౌలర్‌గా రికార్డు క్రియేట్ చేసిన మహ్మద్ సిరాజ్‌కి పాతబస్తీలోని అతని ఇంటి చుట్టుపక్కలవాళ్లు, స్నేహితులు కలిసి భారీ కటౌట్ ఏర్పాటుచేశారు...
వికెట్ తీసిన తర్వాత నోటి మీద వేలు వేసుకుని సెలబ్రేట్ చేసుకునే మహ్మద్ సిరాజ్ సిగ్నేచర్ సెలబ్రేషన్‌‌ను కటౌట్‌గా మార్చారు అభిమానులు... ఇప్పుడీ కటౌట్ సోషల్ మీడియాలో తెగ వైరల్ అవుతోంది....
తెలుగువారికి క్రికెట్ అంటే అభిమానం. అయితే ఓ క్రికెటర్‌కి ఈ రేంజ్‌లో కటౌట్లు పెట్టిన సంఘటనలు మాత్రం చాలా అరుదు. ఎమ్మెస్ ధోనీ, సచిన్ టెండూల్కర్ వంటి మాజీ క్రికెటర్లకు చెన్నై, ముంబైలలో కటౌట్లు పెడతారు...
టీమిండియా మ్యాచులకు హైదరాబాద్ వేదిక ఇచ్చినప్పుడు, స్టేడియం దగ్గర కటౌట్లు కనిపించేవి. అయితే ఎక్కడో లండన్‌లో మ్యాచ్ అయితే, ఇక్కడ మన హైదరాబాద్‌లో మన హైదరాబాదీ కటౌట్ పెట్టడం మాత్రం బహుశా ఇదే తొలిసారేమో...