T20 World Cup 2026: ఆస్ట్రేలియా చేతిలో ఘోర ఓటమి.. ఇంగ్లాండ్ కొంపముంచిన ఐదు తప్పులు ఇవే !

ICC Womens T20 World Cup 2026: మహిళల టీ20 ప్రపంచకప్ 2026 ఫైనల్లో ఇంగ్లాండ్‌ను ఓడించి ఆస్ట్రేలియా 7వ సారి టైటిల్ గెలిచింది. ఇంగ్లాండ్ ఓటమికి దారితీసిన 5 ముఖ్యమైన కారణాలు ఇక్కడ తెలుసుకుందాం.

ఏడోసారి వరల్డ్ కప్ కొట్టిన ఆస్ట్రేలియా.. సొంత గడ్డపై ఇంగ్లాండ్‌కు ఘోర పరాభవం

లార్డ్స్ లో జరిగిన ఐసీసీ మహిళల టీ20 వరల్డ్ కప్ 2026 ఫైనల్ పోరులో ఇంగ్లాండ్‌కు గట్టి షాక్ తగిలింది. హోం గ్రౌండ్‌లో టైటిల్ కొట్టాలనే ఇంగ్లాండ్ కలలను ఆస్ట్రేలియా ముక్కలు చేసింది. టాస్ ఓడి మొదట బ్యాటింగ్ చేసిన ఇంగ్లాండ్ మహిళల జట్టు నిర్ణీత 20 ఓవర్లలో 4 వికెట్ల నష్టానికి 150 పరుగులు చేసింది.

అనంతరం 151 పరుగుల లక్ష్యంతో బరిలోకి దిగిన ఆస్ట్రేలియా కేవలం 17.1 ఓవర్లలోనే 3 వికెట్లు కోల్పోయి 153 పరుగులు చేసి గ్రాండ్ విక్టరీ కొట్టింది. 7 వికెట్ల తేడాతో గెలిచిన ఆసీస్.. ఏడోసారి టీ20 ప్రపంచకప్‌ను తన ఖాతాలో వేసుకుంది. అయితే బలమైన ఇంగ్లాండ్ జట్టు తన సొంత గడ్డపై ఎందుకు ఓడిపోయింది? మ్యాచ్ చేజారడానికి కారణమైన ఆ ఐదు ముఖ్యమైన తప్పులు గమనిస్తే..

1. పవర్‌ప్లేలో చేతులెత్తేసిన ఓపెనర్లు

మొదట బ్యాటింగ్ చేసిన ఇంగ్లాండ్ జట్టుకు పవర్‌ప్లేలో అస్సలు కలిసిరాలేదు. ఓపెనర్ అమీ జోన్స్ (6) కేవలం రెండో ఓవర్లోనే లూసీ హామిల్టన్ బౌలింగ్‌లో జార్జియా వోల్ చేతికి చిక్కి అవుటైంది. ఆ తర్వాత స్టార్ ఓపెనర్ డాని వ్యాట్-హాడ్జ్ (8) కూడా అనబెల్ సదర్లాండ్ బౌలింగ్‌లో వికెట్ కీపర్ బెత్ మూనీకి క్యాచ్ ఇచ్చి పెవిలియన్ చేరింది. పవర్‌ప్లే ముగిసేసరికి ఇంగ్లాండ్ 2 వికెట్లకు 39 పరుగులు మాత్రమే చేయగలిగింది. ఈ మ్యాచ్‌లో కేవలం 5 బౌండరీలు మాత్రమే పవర్‌ప్లేలో వచ్చాయి. ఓపెనర్లు ఇద్దరూ సింగిల్ డిజిట్‌కే అవుట్ కావడంతో ఇంగ్లాండ్ భారీ స్కోరు చేసే అవకాశాన్ని కోల్పోయింది.

2. తక్కువ స్కోరుకే పరిమితమవ్వడం

లార్డ్స్ పిచ్‌పై మొదట బ్యాటింగ్ చేసే జట్టుకు 165 నుంచి 170 పరుగులు మంచి స్కోరు అని టాస్ సమయంలో దినేష్ కార్తీక్ పిచ్ రిపోర్టులో చెప్పాడు. కానీ ఇంగ్లాండ్ కేవలం 150 పరుగులకే పరిమితమైంది. కెప్టెన్ నాట్ సివర్-బ్రంట్ (53 బంతుల్లో 58 నాటౌట్), ఫ్రేయా కెంప్ (28 బంతుల్లో 44 నాటౌట్) ఐదో వికెట్‌కు 80 పరుగుల అజేయ భాగస్వామ్యం నెలకొల్పినప్పటికీ, రన్ రేట్ పెంచడంలో ఇంగ్లాండ్ విఫలమైంది. ఆస్ట్రేలియా లాంటి పవర్‌ఫుల్ బ్యాటింగ్ లైనప్ ఉన్న టీమ్‌కు 151 పరుగుల టార్గెట్ చాలా ఈజీ అయిపోయింది. కనీసం మరో 15 నుంచి 20 పరుగులు షార్ట్ అవ్వడం ఇంగ్లాండ్‌ను దెబ్బతీసింది.

3. కీలక సమయాల్లో వికెట్లు కోల్పోవడం

మిడిల్ ఓవర్లలో ఇంగ్లాండ్ కోలుకుంటున్న సమయంలో ఆసీస్ కెప్టెన్ సోఫీ మోలినాక్స్, కిమ్ గార్త్ దెబ్బకొట్టారు. బాగా ఆడుతున్న అలిస్ క్యాప్సే (23) రివర్స్ స్వీప్ ఆడబోయి మోలినాక్స్ బౌలింగ్‌లో క్లీన్ బౌల్డ్ అయింది. ఆ వెంటనే వెటరన్ ప్లేయర్ హీథర్ నైట్ (2)ను కిమ్ గార్త్ తన స్లోయర్ డెలివరీతో ఎల్బీడబ్ల్యూగా ట్రాప్ చేసింది. ఈ ఇద్దరూ కేవలం 2 పరుగుల వ్యవధిలోనే అవుట్ కావడంతో ఇంగ్లాండ్ బ్యాటింగ్ మొమెంటం పూర్తిగా దెబ్బతింది. రన్ రేట్ పెంచాల్సిన టైమ్‌లో ఇలా బ్యాక్-టు-బ్యాక్ వికెట్లు పడటం ఆసీస్‌కు ప్లస్ పాయింట్ అయింది.

4. బౌలింగ్‌లో ప్లాన్ రివర్స్ అవ్వడం

డిఫెండింగ్ సమయంలో ఇంగ్లాండ్ కెప్టెన్ నాట్ సివర్-బ్రంట్ తీసుకున్న నిర్ణయాలు షాక్ ఇచ్చాయి. రెగ్యులర్ ఫాస్ట్ బౌలర్ లారెన్ బెల్ లేదా లిన్సే స్మిత్‌తో బౌలింగ్ స్టార్ట్ చేయించకుండా, చార్లోట్ డీన్‌తో ఫస్ట్ ఓవర్ వేయించింది. ఆ ఓవర్లోనే జార్జియా వోల్ ఫోర్ కొట్టి అటాక్ స్టార్ట్ చేసింది. రెండో ఓవర్ వేసిన లారెన్ బెల్ ఏకంగా 15 పరుగులు సమర్పించుకుంది. ఆస్ట్రేలియా కేవలం 4.4 ఓవర్లలోనే 50 పరుగుల మార్కును దాటేసింది. పవర్‌ప్లే ముగిసేసరికి ఆసీస్ 1 వికెట్‌కు 62 పరుగులు చేయడంతో మ్యాచ్ ఇంగ్లాండ్ చేతుల్లోంచి పూర్తిగా జారిపోయింది.

5. బెత్ మూనీని అడ్డుకోలేకపోవడం

ఆస్ట్రేలియా ఓపెనర్, ప్లేయర్ ఆఫ్ ది మ్యాచ్ బెత్ మూనీని అవుట్ చేయడంలో ఇంగ్లాండ్ బౌలర్లు పూర్తిగా ఫెయిల్ అయ్యారు. మూనీ 49 బంతుల్లో 10 ఫోర్లతో 64 పరుగులు చేసి ఇంగ్లాండ్ బౌలింగ్‌ను ఉతికేసింది. ఫీబీ లిచ్‌ఫీల్డ్ (35 బంతుల్లో 48)తో కలిసి ఆమె రెండో వికెట్‌కు 100 పరుగుల పార్ట్‌నర్‌షిప్ బిల్డ్ చేసింది.

ఇంగ్లాండ్ బౌలర్లు లెంత్‌లు మిస్ చేస్తూ భారీగా పరుగులు ఇచ్చారు. స్పిన్ క్వీన్ సోఫీ ఎక్లెస్టోన్ 16వ ఓవర్లో మూనీని అవుట్ చేసినప్పటికీ అప్పటికే జరగాల్సిన నష్టం జరిగిపోయింది. చివరలో ఎక్లెస్టోన్ వేసిన వైడ్ బాల్‌తో ఐదు వైడ్లు రావడంతో ఆసీస్ మ్యాచ్‌ను చాలా క్లినికల్‌గా ముగించింది.