మళ్లీ బీసీసీఐ చీఫ్ సెలక్టర్ రేసులోకి వచ్చిన అగార్కర్.. ఈసారైనా కోరిక నెరవేరేనా..?

BCCI: భారత క్రికెట్ కంట్రోల్ బోర్డు (బీసీసీఐ) ఇటీవలే     సెలక్షన్ కమిటీలో సభ్యుడి కోసం నోటిఫికేషన్ జారీ చేసిన విషయం తెలిసిందే. 

టీమిండియా మాజీ క్రికెటర్, ఐపీఎల్ లో ఢిల్లీ క్యాపిటల్స్ కోచింగ్ సిబ్బందిలో భాగమైన అజిత్ అగార్కర్  కోరిక నెరవేరబోతుందా..?  సెలక్షన్ కమిటీకి చీఫ్ గా ఉండాలని కోరుకుంటున్న అగార్కర్ ఎట్టకేలకు తన కోరికను నెరవేర్చుకోబోతున్నట్టు టాక్.  బీసీసీఐ వర్గాల ద్వారా తెలుస్తున్న సమాచారం మేరకు.. చీఫ్ సెలక్టర్ రేసులో  అజిత్ అగార్కర్ ముందు వరుసలో ఉన్నట్టు  తెలుస్తున్నది.   వారం రోజుల క్రితం  బీసీసీఐ..   చేతన్ శర్మ ఖాళీ చేసిన స్థానానికి  దరఖాస్తులను ఆహ్వానించిన విషయం తెలిసిందే.   దీనికి  జూన్ 30ను చివరి  తేదీగా విధించింది.  

అయితే కొత్తగా ఎంపిక కాబోయే  సెలక్టర్ ను చీఫ్ సెలక్టర్ గా నియమించాలని, అందుకే ఆ రేసులో  పేరున్న మాజీ క్రికెటర్ ను నియమించాలని  బీసీసీఐ భావిస్తోంది.  ఇదే క్రమంలో కొద్దిరోజుల క్రితం  చీఫ్ సెలక్టర్ రేసులో  టీమిండియా మాజీ క్రికెటర్ వీరేంద్ర సెహ్వాగ్ పేరు వినిపించింది.  కానీ దీనిపై వీరూ స్పందిస్తూ.. ‘అవన్నీ పుకార్లు’ అని  కొట్టిపారేశాడు. 

ఇక  వీరూ  స్పష్టతనివ్వడంతో  మళ్లీ ఈ రేసులోకి అగార్కర్ వచ్చాడు. వాస్తవానికి అగార్కర్..  గంగూలీ  బీసీసీఐ అధ్యక్షుడు అయినప్పుడే  చీఫ్ సెలక్టర్ రేసుకు పోటీ పడ్డాడు. కానీ గంగూలీతో ఉన్న చనువుతో  చేతన్ శర్మ ఆ  పదవి దక్కించుకున్నాడు.  గతేడాది  సెలక్షన్ కమిటీని రద్దు చేసినప్పుడు కూడా   చీఫ్ సెలక్టర్ రేసులో  వెంకటేశ్ ప్రసాద్ తో పాటు అగార్కర్ పేర్లు ప్రముఖంగా వినిపించాయి.  

కానీ ఈ ఇద్దరినీ కాదని బీసీసీఐ మళ్లీ చేతన్ శర్మకే పగ్గాలు అప్పజెప్పింది. కానీ చేతన్ ఈ ఏడాది ఫిబ్రవరిలో  ఓ  ప్రముఖ ఛానెల్ నిర్వహించిన స్టింగ్ ఆపరేషన్ లో బీసీసీఐ నిజాలన్నీ బట్టబయలు చేయడం సంచలనం కలిగిచింది. దీంతో అతడు  తన పదవి నుంచి వైదొలగడంతో బీసీసీఐ అతడి  స్థానాన్ని భర్తీ చేసే ప్రక్రియను మొదలుపెట్టింది. 

అయితే అగార్కర్ ను ఎంపిక చేస్తారా..? చట్టపరంగా అది వీలవుతుందా..? అన్న ప్రశ్న కూడా తలెత్తుతున్నది.   ముంబైకి చెందిన అగార్కర్  వెస్ట్ జోన్‌కు చెందినవాడు. ఇదే జోన్ నుంచి ఇప్పటికే   సెలక్షన్ కమిటీలో సలీల్ అంకోలా   ప్రాతినిథ్యం వహిస్తున్నాడు.  ఇదే అగార్కర్ కు అడ్డంకిగా మారింది. చేతన్ శర్మ నార్త్ జోన్ నుంచి ప్రాతినిథ్యం వహించేవాడు.  అతడి స్థానాన్ని భర్తీ చేయడానికే  బీసీసీఐ దరఖాస్తులను  ఆహ్వానిస్తున్నది. 

మరి అగార్కర్ వెస్ట్ జోన్ నుంచి ప్రాతినిథ్యం వహిస్తుండటంతో అతడిని  ఎంపిక చేస్తారా..? లేక  మరేదైనా షాకులిస్తారా..?  అన్నది త్వరలోనే తేలనుంది. ఒకవేళ అగార్కర్ కే ఓటేస్తే జులై మొదటివారంలోనే అతడు చీఫ్ సెలక్టర్ పదవి  చేపట్టే అవకాశాలున్నాయి.