Idli Podi: ఇడ్లీపొడితో ఒక్క రోజులోనే రూ.5 వేలు సంపాదించే బిజినెస్.. వివరాలు ఇవిగో

Idli Podi: ఇంటి నుంచే వ్యాపారం చేయాలనుకుంటున్నారా? అతి తక్కువ ఖర్చుతో మొదలుపెట్టే బిజినెస్ ఇడ్లీ పొడి.  ఇడ్లీ, దోశె పొడులను అమ్మడం ద్వారా చాలా తక్కువ పెట్టుబడితో రోజూ 5,000 రూపాయలు సంపాదించవచ్చు.

ఇడ్లీ పొడి వ్యాపారం ఎలా మొదలుపెట్టాలి?

ఇంటి దగ్గర్నుంచే చేసే అద్భుతమైన బిజినెష్ ఇడ్లీ, దోశె పొడుల బిజినెస్. ఈ బిజినెస్ చేస్తూ రోజుకు అయిదు వేల రూపాయల వరకు సంపాదించవచ్చు.  ఆర్గానిక్ ఇడ్లీ, దోశ పొడులకు మార్కెట్లో మంచి డిమాండ్ ఉంది.  ఈ వ్యాపారం మొదలుపెట్టడం చాలా సులువు.  పెద్దగా పెట్టుబడి, స్థలం అవసరం లేదు. మీ ఇంటి వంటగదే చాలు. వెల్లుల్లి పొడి, నువ్వుల పొడి, కరివేపాకు పొడి, పప్పుల పొడి, ఉలవల పొడి, మునగాకు పొడి ఇలా రకరకాల పొడులను తయారు చేయవచ్చు. దీనికి వాడే మినపప్పు, శనగపప్పు, ఎండు మిరపకాయలు, ఇంగువ, నువ్వులు వంటివన్నీ 'ఆర్గానిక్' సర్టిఫైడ్ షాపుల్లో హోల్‌సేల్‌గా కొనుక్కోవాలి. దినుసులను దోరగా వేయించి, సరైన పద్ధతిలో పొడి చేసి, శుభ్రంగా ప్యాక్ చేయాలి.

ఎక్కడ అమ్మాలి?

ఇంట్లో తయారు చేసిన పొడులను మార్కెట్లో ఎలా అమ్మాలి? ఇదే పెద్ద ప్రశ్న. ఇక్కడే ఎంతో మంది భయంతో ఆగిపోతారు.  100 గ్రాములు, 250 గ్రాముల ప్యాకెట్లలో ఆకర్షణీయంగా గాలి చొరబడని జిప్‌లాక్ సంచులలో ప్యాక్ చేయాలి. ప్యాకెట్‌పై మీ బ్రాండ్ పేరు, తయారీ తేదీ, వాడిన ఆర్గానిక్ పదార్థాలు, FSSAI ఫుడ్ సేఫ్టీ లైసెన్స్ నంబర్‌ను పెట్టాలి. ఇది కస్టమర్ల నమ్మకాన్ని పెంచుతుంది. మొదట మీ ఏరియాలోని ఇళ్లు, అపార్ట్‌మెంట్లు, ఆఫీసు ఉద్యోగులు, తెలిసిన స్నేహితులకు శాంపిల్స్ ఇచ్చి రుచి చూపించండి. తరువాత వారి నుంచే మీకు ఆర్డర్లు వస్తాయి.

సోషల్ మీడియాను కూడా ఉపయోగించుకోవచ్చు. ఇన్‌స్టాగ్రామ్, ఫేస్‌బుక్, వాట్సాప్ గ్రూపులలో పోస్టు చేయాలి. తయారీ విధానం వంటివాటిని వీడియోలుగా పోస్ట్ చేసి ఆర్డర్లు పొందవచ్చు. అమెజాన్, ఫ్లిప్‌కార్ట్ వంటి ఇ-కామర్స్ సైట్లలో, 'స్విగ్గీ మినీస్' వంటి లోకల్ డెలివరీ యాప్‌లలో మీ బ్రాండ్‌ను రిజిస్టర్ చేసి అమ్మకాలను చేయవచ్చు.

ఎంత ధరలకు అమ్మాలి?

ఒక కిలో ఆర్గానిక్ పొడి తయారీకి దాదాపు 200 రూపాయల నుంచి 250 వరకు మీకు ఖర్చు అవుతుంది. కానీ మార్కెట్లో 100 గ్రాముల ఆర్గానిక్ పొడి ప్యాకెట్ రూ.70 నుంచి రూ.90 వరకు అమ్ముడుపోతెంది. ఒక కిలో పొడిపై కనీసం రూ.400 నుంచి రూ.500 వరకు  లాభం వస్తుంది. మీరు రోజూ 10 నుంచి 12 కిలోల పొడిని తయారు చేసి  అమ్మగలిగితే, రోజుకు రూ.5,000 వరకు సులభంగా సంపాదించవచ్చు.