EV Insurance : కొత్త ఎలక్ట్రిక్ కారు కొనాలని ప్లాన్ చేస్తున్నారా? అయితే మీకు EV ఇన్సూరెన్స్ గురించి అసలు నిజాలు తెలియాల్సిందే

సాధారణ వాహనాలు ఇన్సూరెన్స్ తో పోలిస్తే ఎలక్ట్రిక్ వాహనాల ఇన్సూరెన్స్ ప్రీమియం చాలా ఎక్కువగా ఉంటుంది. ఇందుకు కారణాలేంటో తెలుసుకొండి, వివిధ కంపెనీల ప్లాన్లను పోల్చి చూశాకే నిర్ణయం తీసుకొండి.

ఇండియాలో EV వాహనాలకు యమ క్రేజ్

ఇండియాలో ఎలక్ట్రిక్ వాహనాలకు (EV) ఆదరణ విపరీతంగా పెరుగుతోంది. పెట్రోల్, డీజిల్ ధరలు అంతకంతకు పెరుగుతుండటంతో ప్రజలు ఈవి వాహనాలకు షిప్ట్ అవుతున్నారు. తక్కువ నిర్వహణ ఖర్చు, పర్యావరణ హితం కావడం కూడా EVల వాడకం పెరగడానికి మరో కారణం. అయితే కొత్త EV కారు కొనాలనుకునే వారిని ఇన్సూరెన్స్ ప్రీమియం కాస్త ఆందోళనకు గురిచేస్తోంది. సాధారణ కార్లతో పోలిస్తే ఎలక్ట్రిక్ కార్ల ఇన్సూరెన్స్ ప్రీమియం ఎక్కువగా ఉంటుంది.

ఈవి కార్ల ఇన్సూరెన్స్ ప్రీమియం ఎక్కువగా ఉండటానికి కారణాలివే..

EV వాహనాల్లో అసలు ఖర్చు బ్యాటరీదే

ఎలక్ట్రిక్ కారులో అత్యంత ఖరీదైన భాగం బ్యాటరీనే. కొన్ని మోడళ్లలో కారు మొత్తం ధరలో 30 నుంచి 50 శాతం బ్యాటరీదే ఉంటుంది. ప్రమాదాలు, వరదలు, మంటలు, షార్ట్ సర్క్యూట్ వంటి కారణాలతో బ్యాటరీ దెబ్బతింటే దాన్ని బాగుచేయించడానికి లేదా మార్చడానికి లక్షల్లో ఖర్చవుతుంది. ఈ రిస్క్‌ను దృష్టిలో పెట్టుకునే ఇన్సూరెన్స్ కంపెనీలు ఎక్కువ ప్రీమియం వసూలు చేస్తాయి.

EV కారు రిపేర్ ఖర్చులు కూడా ఎక్కువే

ఎలక్ట్రిక్ వాహనాల్లో అత్యాధునిక ఎలక్ట్రానిక్ సిస్టమ్స్, సెన్సర్లు, కంట్రోల్ యూనిట్లు, సాఫ్ట్‌వేర్ ఉంటాయి. వీటి రిపేర్లకు ప్రత్యేక శిక్షణ పొందిన టెక్నీషియన్లు, ప్రత్యేక సర్వీస్ సెంటర్లు అవసరం. దేశంలోని అన్ని ప్రాంతాల్లో ఇలాంటి సౌకర్యాలు ఇంకా అందుబాటులోకి రాలేదు. అందుకే రిపేర్ ఖర్చులు కూడా చాలా ఎక్కువగా ఉంటాయి. ఇది కూడా ఇన్సూరెన్స్ ప్రీమియం పెరగడానికి ఒక కారణం.

బ్యాటరీ ప్రొటెక్షన్ కవర్ తప్పనిసరిగా చూసుకోండి

ఎలక్ట్రిక్ కారు ఇన్సూరెన్స్ తీసుకునేటప్పుడు 'బ్యాటరీ ప్రొటెక్షన్ కవర్' యాడ్-ఆన్ తీసుకోవడం చాలా ముఖ్యం. ప్రమాదం, వరదలు, మంటలు, షార్ట్ సర్క్యూట్ లేదా ఇతర ఎలక్ట్రికల్ సమస్యల వల్ల బ్యాటరీ పాడైతే ఈ కవర్ ఆర్థికంగా ఆదుకుంటుంది. భవిష్యత్తులో బ్యాటరీ ప్రాబ్లమ్స్ వల్ల లక్షల్లో అయ్యే ఊహించని ఖర్చుల నుంచి ఇది మిమ్మల్ని కాపాడుతుంది.

రోడ్‌సైడ్ అసిస్టెన్స్ కూడా ముఖ్యమే

దూర ప్రయాణాల్లో ఉన్నప్పుడు కారు బ్యాటరీ అయిపోవచ్చు, దగ్గర్లో ఛార్జింగ్ స్టేషన్ లేకపోవచ్చు. ఇలాంటి సమయంలో ఇబ్బందిపడకుండా 'రోడ్‌సైడ్ అసిస్టెన్స్' చాలా ఉపయోగపడుతుంది. దీని ద్వారా టోయింగ్ సర్వీస్, అత్యవసర సహాయం, దగ్గర్లోని ఛార్జింగ్ స్టేషన్ లేదా సర్వీస్ సెంటర్‌కు వాహనాన్ని తరలించడం వంటి సేవలు పొందవచ్చు.

ప్రీమియం తక్కువని పాలసీ తీసుకోవద్దు

చాలామంది తక్కువ ప్రీమియం చూసి ఇన్సూరెన్స్ పాలసీని ఎంచుకుంటారు. కానీ తర్వాత అవసరమైన కవరేజీలు పాలసీలో లేవని తెలుసుని బాధపడుతుంటారు. అందుకే ఇన్సూరెన్స్ తీసుకునేటప్పుడు కేవలం ధర మాత్రమే కాకుండా లభించే కవరేజీని కూడా వివరంగా చెక్ చేసుకోవాలి. బ్యాటరీ ప్రొటెక్షన్, జీరో డిప్రిసియేషన్ కవర్, రోడ్‌సైడ్ అసిస్టెన్స్, ఎలక్ట్రికల్ పార్ట్స్ కవరేజ్, వరదలు వంటి ప్రకృతి వైపరీత్యాల నుంచి రక్షణ కల్పించే పాలసీని ఎంచుకోవడం ఉత్తమం.

కొత్త ఎలక్ట్రిక్ కారు కొనే ముందు, వివిధ ఇన్సూరెన్స్ కంపెనీల పాలసీలను పోల్చి చూడటం మంచిది. కవరేజ్, క్లెయిమ్ సెటిల్‌మెంట్ రికార్డ్, యాడ్-ఆన్ ప్రయోజనాలు, ప్రీమియం వంటివి అంచనా వేసిన తర్వాతే సరైన పాలసీని ఎంచుకోవాలి. ఇది భవిష్యత్తులో మీకు ఆర్థిక భద్రతను ఇస్తుంది.