సంక్రాంతి వేడుకలకు సిద్దమవుతున్న ఆంధ్ర ప్రదేశ్ ప్రజలకు వాతావరణ శాఖ షాక్ ఇచ్చింది. రాబోయే రెండుమూడు రోజులు ఏపీలో వర్షాలు కురుస్తాయన్న ప్రకటన పండగ మూడ్ ను నాశనం చేస్తోంది. ఇంతకూ ఏఏ జిల్లాల్లో వర్షాలు కురిసే అవకాశం వుందో తెలుసా?
ఇరు తెలుగు రాష్ట్రాల్లోనూ సంక్రాంతి సెలవులు ప్రారంభయ్యాయి. ఇప్పటికే హైదరాబాద్ తో పాటు దేశంలోని వివిధ ప్రాంతాల్లో స్థిరపడ్డవారు ఆంధ్ర ప్రదేశ్ కు పయనం అయ్యారు. దీంతో హైదరాబాద్ నుండి ఏపీకి వెళ్లే రహదారులు వాహనాలతో నిండిపోయాయి... బస్సులు, రైళ్లు కూడా కిక్కిరిసిపోతున్నాయి.
ఇలా సొంతూళ్లకు వెళ్లి సంక్రాంతి పండగను ఘనంగా జరుపుకోవడానికి తెలుగు ప్రజలు సిద్దమయ్యారు. ఇలాంటి సమయంలో వాతావరణ శాఖ బాంబు పేల్చింది. సంక్రాంతి పండగ సమయంలో ఏపీలో వర్షాలు కురిసే అవకాశం వుందని ప్రకటించింది.
బంగాళాఖాతంలో ఏర్పడిన ఉపరితల ఆవర్తనం కారణంగా రాబోయే రెండుమూడు రోజులు వర్షాలు కురుస్తాయని వాతావరణ శాఖ హెచ్చరిస్తోంది. జనవరి 12, 13 (ఆది, సోమవారం) తేలికపాటి నుండి మోస్తరు వర్షాలు కురుస్తాయని ప్రకటించారు. ముఖ్యంగా దక్షిణ కోస్తా, రాయలసీమలోని పలు ప్రాంతాలకు వర్షసూచన వుంది. నెల్లూరు, తిరుపతి, చిత్తూరు, కడప, ప్రకాశం, అన్నమయ్య జిల్లాల్లో వర్షాలు పడే అవకాశం వుందని వాతావరణ శాఖ ప్రకటించింది.
ఇలా సంక్రాంతి పండగ సమయంలో ఏపీలోకి పలు ప్రాంతాల్లో వర్షాలు కురుస్తాయని... మిగతాప్రాంతాల్లో మేఘాలు కమ్ముకుని వాతావరణం చల్లగా వుంటుందని తెలిపారు. దీంతో సంక్రాంతి వేడుకలకు ఈ వర్షాలు ఎక్కడ ఆటంకం కలిగిస్తాయోనని ఏపీ ప్రజలు ఆందోళన చెందుతున్నారు. వర్ష ప్రభావిత జిల్లాల్లోని రైతులు కూడా మళ్లీ వర్షాలు కురుస్తాయన్న హెచ్చరికలతో కంగారు పడుతున్నారు.
బంగాళాఖాతంలో మారుతున్న వాతావరణ పరిస్థితుల కారణంగా ఏపీతో పాటు తమిళనాడు, పుదుచ్చెరి లోని ఒకటి రెండు చోట్ల తేలికపాటి నుంచి మోస్తరు వర్షాలు కురిసే అవకాశం ఉంది. ఈ రాష్ట్రాల్లోని మిగతా ప్రాంతాల్లో వర్షాలు కురవకున్నా మబ్బులు కమ్ముకుని వుంటాయి. ఈ ప్రాంతాల్లో రాత్రులు, ఉదయం వేళల్లో తేలికపాటి పొగమంచు కనిపిస్తుంది.
జనవరి 12న తీరప్రాంతాల్లో చాలా చోట్ల వర్షాలు కురిసే అవకాశం వుందని వాతావరణ శాఖ హెచ్చరిస్తోంది. ఒకటి రెండు చోట్ల ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. తమిళనాడులోని తంజావూరు, తిరువారూర్, నాగపట్నం, మయిలాడుతురై, పుదుక్కోటై జిల్లాల్లోని ఒకటి రెండు చోట్ల, కారైకాల్ ప్రాంతాల్లో కూడా భారీ వర్షాలు కురిసే అవకాశం ఉంది.
అదేవిధంగా జనవరి 13న కూడా ఏపీ, తమిళనాడు, పుదుచ్చెరిలో వర్షాలు కురుస్తాయని ప్రకటించారు. బంగాళాఖాతంలో పరిస్థితి మారకుంటే జనవరి 14, 15 తేదీల్లో కూడా వర్షాలు కురిసే అవకాశాలుంటాయని వాతావరణ శాఖ సూచించింది. వర్షసూచన గల దక్షిణాది రాష్ట్రాల్లో గరిష్ట ఉష్ణోగ్రత 29-30° సెల్సియస్, కనిష్ట ఉష్ణోగ్రత 22° సెల్సియస్ ఉండే అవకాశం ఉందని వాతావరణ శాఖ అంచనా వేసింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి