తెలుగు సినిమా సత్తాని ప్రపంచానికి చాటిచెప్పిన బాహుబలి చిత్రం కేవలం కలెక్షన్స్ పరంగానే కాక... దర్శకుడు రాజమౌళికి, హీరో ప్రభాస్ కు కూడా దేశవ్యాప్తంగా క్రేజ్ తెచ్చిపెట్టింది. ఈ మూవీతో హీరో ప్రభాస్ కు మరింత ఫ్యాన్ ఫాలోయింగ్ పెరిగిందనటంలో ఎలాంటి సందేహం లేదు.
అసలు బాహుబలి చిత్రం ముందు ప్రభాస్ వేరు. ఆతర్వాత ప్రభాస్ వేరు. ప్రభాస్ ఒక్కసారిగా సినీ ఐకాన్‌గా మారిపోయారు. బాలీవుడ్‌తోపాటు పలు భాషల్లో సినీ ప్రముఖుల దృష్టి యంగ్ రెబల్ స్టార్‌పై పడింది. ప్రభాస్‌తో ఒక్క సినిమాలోనైనా నటింప చేయాలనే సినీ నిర్మాతల క్యూ భారీగానే పెరిగిపోయింది. బాలీవుడ్ నుంచి వెల్లువలా ఆఫర్లు వచ్చి పడ్డాయి. అయినా ప్రభాస్ చెక్కుచెదర్లేదు. ఇదంతా నాణానికి మరో వైపు.. ఇక అసలు విషయానికి వస్తే గతంలో ప్రభాస్‌తో నటించడానికి ముఖం చాటేసినా హీరోయిన్లు ఇప్పుడు ఆయన నటించాలని తహతహలాడుతుండటం గమనార్హం. తాజాగా తమిళ స్టార్ శరత్ కుమార్ కూతురు కూడా ఈ జాబితాలో చేరింది.
తమిళంలో హీరోయిన్‌గా కొనసాగుతోన్న వరలక్ష్మి ‘శక్తి’ చిత్రం ద్వారా తెలుగు తెరకు పరిచయం కానున్నారు. ఈ సందర్భంగా ఆమె మాట్లాడుతూ– ‘‘ప్రభాస్‌తో కలిసి నటిస్తారా? అని చాలామంది అడుగుతున్నారు. ఆయనతో నటించాలని అందరూ అనుకుంటారు. ఆ అవకాశం వస్తే ఏ హీరోయిన్‌ మాత్రం వదులుకుంటుంది. అందుకు నేనేమీ మినహాయింపు కాదు. ‘బాహుబలి’ సినిమాలో ప్రభాస్ నటన సూపర్బ్‌. నాకు చాలా బాగా నచ్చింది. తెలుగు చిత్రపరిశ్రమలో ఎన్టీఆర్, రామ్‌చరణ్‌ వంటి టాలెంట్‌ ఉన్న నటులున్నారు. వారితోనూ సినిమాలు చేయాలనుంది’’ అన్నారు.