దిల్ రాజు తెలివికి దాసోహం అన్న జాతీయ చలనచిత్ర అవార్డు

దిల్ రాజు తెలివికి దాసోహం అన్న జాతీయ అవార్డు బాహుబలికి పోటీ లేకుండా ముందే సెన్సార్ చేయించిన దిల్ రాజు అవార్డు కమిటీకి ఏడాది క్రితమే పంపి జాతీయ అవార్డు దక్కించుకున్న శతమానం భవతి

ఇటీవల ప్రకటించిన జాతీయ అవార్డుల లిస్ట్ లో తెలుగు చలన చిత్ర పరిశ్రమ నుంచి శతమానం భవతికి జాతీయ ఉత్తమ చలన చిత్రంగా అవార్డు దక్కడం తెలిసిందే. అయితే ఈ అవార్డు దక్కడం వెనుక ఓ ఇంట్రెస్టింగ్ స్టోరీ ఉంది. 

విషయమేంటంటే ‘శతమానం భవతి’ సినిమా విడుదలైంది 2017లో. కానీ ఈ చిత్రం 2016 సంవత్సరానికి జాతీయ అవార్డు అందుకుంది. ఇందుకు కారణం ఈ చిత్రాన్ని 2016లోనే సెన్సార్ చేయించి.. ఆ ఏడాది జాతీయ అవార్డులకు పంపడమే. ఐతే ఇది యాదృచ్ఛికంగా జరిగిందేమీ కాదని.. ఉద్దేశపూర్వకంగానే ఆ సినిమాను గత ఏడాదే సెన్సార్ చేయించి జాతీయ అవార్డులకు పంపామని అంటున్నాడు దిల్ రాజు. ఇదంతా ‘బాహుబలి: ది కంక్లూజన్’ను దృష్టిలో ఉంచుకుని చేసిందే అని ఆయన వెల్లడించడం విశేషం.

‘‘శతమానం భవతి సినిమా ఓ క్లాసిక్‌ అవుతుందని అనుకున్నా. దీనికి నంది అవార్డు కూడా వస్తుందనుకున్నా. ఏకంగా జాతీయ అవార్డే వచ్చింది. 2017లో ‘బాహుబలి–2’ రిలీజ్‌ అవుతుంది. ఏ అవార్డులైనా చాలా వరకు ఆ సినిమాకే వచ్చే ఛాన్స్‌ ఎక్కువ. అందుకే ‘శతమానం భవతి’ సినిమాను 2016లోనే సెన్సార్‌ చేయించాం. నా బ్రదర్‌ నర్సింహారెడ్డి ఎడిటింగ్‌ రూంలో ‘శతమానం భవతి’ సినిమా చూసి కన్నీళ్లు పెట్టుకున్నాడు. కచ్చితంగా ఈ సినిమాకు నేషనల్ అవార్డు వస్తుందని ఆయన అంచనా వేశారు. ఆ మాటే నిజమైంది’’ అని దిల్ రాజు తెలిపాడు. ‘బాహుబలి: ది బిగినింగ్’ 2015 సంవత్సరానికి ఉత్తమ చిత్రంగా జాతీయ అవార్డు అందుకోవడం తెలిసిందే. దీంతో పాటుగా అనేక పురస్కారాలు ఆ చిత్రానికి దక్కాయి. ఈ నేపథ్యంలోనే దిల్ రాజు ‘బాహుబలి-2’తో పోటీ లేకుండా 2016 సంవత్సరానికే ‘శతమానం భవతి’ని అవార్డులకు పంపేశాడన్నమాట. దిల్ రాజు తెలివే తెలివి.