T20 Worldcup2021: ప్రపంచమంతా ఆసక్తిగా చూస్తున్నది.. మరి మీరో..? భారత్-పాక్ మ్యాచ్ పై ఐసీసీ జబర్ధస్త్ ప్రోమో

India vs Pakistan: చిరకాల ప్రత్యర్థుల మధ్య పోరాటానికి సర్వం సిద్ధమైన వేళ ఐసీసీ ఈ మ్యాచ్ కు ముందు విడుదల చేసిన ప్రోమో.. నేటి పోరుపై మరింత హైప్ పెంచింది. 

దాయాదుల మధ్య పోరుకు అంతా సిద్ధమైంది. స్టేడియంలో హోరాహోరి తలపడటానికి రెండు జట్ల ఆటగాళ్లు  బ్యాట్లు, బంతులు సిద్ధం చేసుకుంటున్నారు. ఈ హై ఓల్జేజీ మ్యాచ్ ను వీక్షించడానికి భారత్ , పాకిస్థాన్ తో పాటు ప్రపంచ నలుమూలల నుంచి క్రికెట్ అభిమానులు కండ్లు అప్పగించి చూస్తున్నారు. ఐసీసీ టీ20 ప్రపంచకప్ (ICC T20 World cup 2021) లో భాగంగా గ్రూప్-2 లో ఉన్న భారత్, పాక్ (India vs Pakistan) ల మ్యాచ్ మరికొద్దిసేపట్లో దుబాయ్ వేదికగా మొదలుకానున్నది. 

చిరకాల ప్రత్యర్థుల మధ్య పోరాటానికి సర్వం సిద్ధమైన వేళ ఐసీసీ (ICC) ఈ మ్యాచ్ కు ముందు విడుదల చేసిన ప్రోమో (ICC india vs pakistan match promo).. నేటి పోరుపై మరింత హైప్ పెంచింది. ఇందులో ఇరు దేశాలకు చెందిన ఆటగాళ్ల గత ప్రదర్శనలు, హైలైట్ లతో ఐసీసీ ఈ వీడియోను రూపొందించింది. 58 సెకన్ల నిడివి ఉన్న ఈ ప్రోమోను ఐసీసీ.. సోషల్ మీడియా ఖాతాలలో పోస్టు చేసింది. 

నేటి సాయంత్రం 7:30 గంటలకు రెండు జట్ల మధ్య టీ20 ప్రపంచకప్ లో భాగంగా మ్యాచ్ జరుగనున్న విషయం తెలిసిందే. ఈ నేపథ్యంలో ఐసీసీ విడుదల చేసిన వీడియో ఇప్పుడు సోషల్ మీడియాను షేక్ చేస్తున్నది. టీ 20 ప్రపంచకప్ లో ఎన్ని మ్యాచ్ లున్నా భారత్-పాక్ కు ఉండే క్రేజే వేరు కాబట్టి ఐసీసీ కూడా ఈ ఈవెంట్ ను బాగానే సొమ్ము చేసుకుంటున్నది. 

‘టుడే ఈజ్ ది బిగ్ డే’ అంటూ మొదలయ్యే ఈ వీడియోలో.. ఒక్కొక్క పదం అభిమానుల నాడిని, రెండు దేశాల మధ్య ఉన్న వైరాన్ని తెలియజెప్పే పదాలున్నాయి.  ఇక చివర్లో ‘ప్రపంచం మొత్తం మిమ్మల్ని చూస్తుంది’ అని వ్యాఖ్యంతో వీడియో ముగుస్తుంది. నరాలు తెగే ఉత్కంఠ మధ్య జరుగనున్న భారత్-పాక్ పోరుకు ముందు  విడుదలైన  ఈ వీడియో అభిమానులను అలరించడమే గాక..  చూస్తున్న ప్రేక్షకులలో మ్యాచ్ పై మరింత ఉత్కంఠను పెంచేలా చేస్తున్నది.