Asia Cup 2022 IND vs SL: శ్రీలంక ముందు ఊరించే టార్గెట్ పెట్టిన టీమిండియా... బౌలర్లపైనే భారం..

India vs Sri Lanka: 8 వికెట్ల నష్టానికి 173 పరుగుల స్కోరు చేసిన టీమిండియా... హాఫ్ సెంచరీతో ఆదుకున్న రోహిత్ శర్మ... మళ్లీ విఫలమైన మిడిల్ ఆర్డర్... 

ఆసియా కప్ 2022 ఫైనల్ రేసులో నిలవాలంటే తప్పక గెలవాల్సిన మ్యాచ్‌లో భారత జట్టు, 20 ఓవర్లలో 8 వికెట్ల నష్టానికి 173 పరుగుల స్కోరు చేయగలిగింది. టాపార్డర్‌లో కెఎల్ రాహుల్, విరాట్ కోహ్లీ ఫెయిల్ అయినా రోహిత్ శర్మ, సూర్యకుమార్ యాదవ్ బాధ్యతాయుత ఇన్నింగ్స్‌లతో టీమిండియాకి మంచి స్కోరు అందించగలిగారు. 

టాస్ ఓడి బ్యాటింగ్‌కి దిగిన భారత జట్టుకి రెండో ఓవర్‌లోనే షాక్ తగిలింది. గాయం తర్వాత పరుగులు రాబట్టడానికి ఇబ్బంది పడుతున్న కెఎల్ రాహుల్‌ని మహీశ్ తీక్షణ, ఎల్బీడబ్ల్యూ రూపంలో అవుట్ చేశాడు. అంపైర్ అవుట్ ఇవ్వగానే డీఆర్‌ఎస్ తీసుకున్నాడు కెఎల్ రాహుల్. అయితే టీవీ రిప్లైలో అంపైర్స్ కాల్‌గా రావడంతో 11 పరుగుల వద్ద తొలి వికెట్ కోల్పోయింది భారత జట్టు.  

వన్‌డౌన్‌లో క్రీజులోకి వచ్చిన విరాట్ కోహ్లీ... దిల్షాన్ ముదుశంక బౌలింగ్‌లో మొదటి మూడు బంతుల్లో పరుగులు చేయలేకపోయాడు... నాలుగో బంతికి అద్భుతమైన ఇన్‌స్వింగర్‌తో విరాట్ కోహ్లీని క్లీన్ బౌల్డ్ చేశాడు దిల్షాన్ మదుశంక. దీంతో 13 పరుగులకే 2 వికెట్లు కోల్పోయింది భారత జట్టు. ఆసియా కప్ టోర్నీలో విరాట్ కోహ్లీకి ఇది మొట్టమొదటి డకౌట్ కాగా కెరీర్‌లో 33వ డకౌట్...

భారత జట్టు తరుపున టాప్ ఆర్డర్‌లో అత్యధిక సార్లు డకౌట్ అయిన ప్లేయర్‌గా సచిన్ టెండూల్కర్ (34 సార్లు) డకౌట్ అయ్యి, విరాట్ కోహ్లీ కంటే ముందున్నాడు. శ్రీలంకపై టీ20ల్లో ఘనమైన రికార్డు ఉన్న విరాట్ కోహ్లీ, గత ఆరు మ్యాచుల్లో నాలుగు హాఫ్ సెంచరీలు, రెండు సార్లు 25+ స్కోర్లు నమోదు చేశాడు...

ఓవరాల్‌గా భారత జట్టు తరుపున అత్యధిక సార్లు డకౌట్ అయిన ప్లేయర్‌గా ఆరో స్థానంలో నిలిచాడు విరాట్ కోహ్లీ. జహీర్ ఖాన్ 44 సార్లు, ఇషాంత్ శర్మ 40 సార్లు, హర్భజన్ సింగ్ 37, అనిల్ కుంబ్లే 35, సచిన్ టెండూల్కర్ 34 సార్లు డకౌట్ అయ్యి... విరాట్ కోహ్లీ కంటే ముందున్నారు... 

13  పరుగులకే 2 వికెట్లు కోల్పోయిన భారత జట్టును ఆదుకున్నాడు రోహిత్ శర్మ. సూర్యకుమార్ యాదవ్‌తో కలిసి మూడో వికెట్‌కి 97 పరుగుల భాగస్వామ్యం నెలకొల్పిన రోహిత్ శర్మ, 41 బంతుల్లో 5 ఫోర్లు, 4 సిక్సర్లతో 72 పరుగులు చేసి కరుణరత్నే బౌలింగ్‌లో భారీ షాట్‌కి ప్రయత్నించి అవుట్ అయ్యాడు...

ఆసియా కప్ టోర్నీ చరిత్రలో 1000 పరుగులు పూర్తి చేసుకున్న రోహిత్ శర్మ, ఈ ఫీట్ సాధించిన మొట్టమొదటి భారత బ్యాటర్‌గా రికార్డు క్రియేట్ చేశాడు. ఇంతకుముందు సచిన్ టెండూల్కర్ 971, విరాట్ కోహ్లీ 920 పరుగులతో రోహిత్ తర్వాతి స్థానాల్లో ఉన్నారు.

ఆసియా కప్‌లో రోహిత్ శర్మకు ఇది 9వ 50+ స్కోరు. ఆసియా కప్‌లో అత్యధిక 50+ స్కోర్లు చేసిన భారత బ్యాటర్‌గా సచిన్ టెండూల్కర్ రికార్డును సమం చేశాడు రోహిత్ శర్మ. ఆసియా కప్‌లో 27 సిక్సర్లు బాదిన రోహిత్ శర్మ, అత్యధిక సిక్సర్లు బాదిన బ్యాటర్‌గానూ రికార్డు క్రియేట్ చేశాడు. 26 సిక్సర్లు బాదిన షాహిదీ ఆఫ్రిదీ రికార్డును అధిగమించాడు రోహిత్ శర్మ...

రోహిత్ శర్మ అవుటైన కొద్దిసేపటికే సూర్యకుమార్ యాదవ్ వికెట్ కోల్పోయింది భారత జట్టు. 29 బంతుల్లో ఓ ఫోర్, ఓ సిక్సర్‌తో 34 పరుగులు చేసిన సూర్యకుమార్, శనక బౌలింగ్‌లో తీక్షణకి క్యాచ్ ఇచ్చి పెవిలియన్ చేరాడు... హార్ధిక్ పాండ్యా 13 బంతుల్లో ఓ సిక్సర్‌తో 17 పరుగులు చేసి శనక బౌలింగ్‌లో నిశ్శంకకి క్యాచ్ ఇచ్చి అవుట్ అయ్యాడు...

ఆ తర్వాత రెండో బంతికే దీపక్ హుడా భారీ షాట్‌కి ప్రయత్నించి దిల్షాన్‌కి క్యాచ్ ఇచ్చాడు. అయితే టీవీ రిప్లైలో అది నో బాల్‌గా తేలడంతో బతికిపోయిన  హుడా,ఈ అవకాశాన్ని వాడుకోలేకపోయాడు. 4 బంతుల్లో 3 పరుగులు చేసిన దీపక్ హుడాని క్లీన్ బౌల్డ్ చేసిన దిల్షాన్ మదుశనక, ఆ తర్వాత రెండో బంతికే రిషబ్ పంత్‌ని అవుట్ చేశాడు...

13 బంతుల్లో 3 ఫోర్లతో 17 పరుగులు చేసిన రిషబ్ పంత్, నిశ్శంకకి క్యాచ్ ఇచ్చి పెవిలియన్ చేరాడు. ఆఖరి ఓవర్‌లో భువనేశ్వర్ కుమార్‌‌ని కరుణరత్నే డకౌట్ చేశాడు. ఐదో బంతికి సిక్సర్ బాదిన రవిచంద్రన్ అశ్విన్, ఆఖరి బంతికి 2 పరుగులు తీశాడు. 7 బంతుల్లో 15 పరుగులు చేసిన అశ్విన్, ఆఖరి బంతికి హసరంగ క్యాచ్ డ్రాప్ చేయడంతో బతికిపోయాడు.