ఏపీ శాసనమండలి: అంగుళం భూమి లేదు, చేతులు జోడించి వేడుకొన్న లోకేష్

ఏపీ శాసనమండలిలో బుధవారం నాడు టీడీపీ ఎమ్మెల్సీ నారా లోకేష్ చేతులు జోడంచి అమరావతిని చంపొద్దు అంటూ ప్రభుత్వాన్ని వేడుకొన్నారు. 

అమరావతి: ఏపీ రాష్ట్రంలో తన పేరున అంగుళం భూమి కూడ లేదని మాజీ మంత్రి, టీడీపీ ఎమ్మెల్సీ నారా లోకేష్ స్పష్టం చేశారు. అమరావతిని చంపొద్దని లోకేష్ చేతులు జోడించి వేడుకొన్నారు. 

బుధవారం నాడు పాలనా వికేంద్రీకరణ, సీఆర్‌డీఏ రద్దు బిల్లులపై జరిగిన చర్చలో లోకేష్ మాట్లాడారు. అమరావతిని రాజధానిగా జగన్ స్వాగతించిన విషయాన్ని టీడీపీ ఎమ్మెల్సీ లోకేష్ గుర్తు చేశారు.

తాము అధికారంలో ఉన్న సమయంలో ప్రతి జిల్లాకు ప్రాధాన్యం ఉండేలా అభివృద్ధిని విస్తరించినట్టుగా లోకేష్ చెప్పారు. రాజధానిగా అమరావతినే శివరామకృష్ణ కమిటీ సూచించినట్టుగా లోకేష్ సభలో ఈ సందర్భంగా ప్రస్తావించారు.

2013లో పుట్టా సుధాకర్ యాదవ్ భూమిని కొనుగోలు చేస్తే అక్రమం ఎలా అవుతుందని లోకేష్ ప్రశ్నించారు. వరదల్లో రాజధాని మునిగిపోతోందని  తప్పుడు ప్రచారం చేస్తున్నారని  లోకేష్ చెప్పారు. 

వైఎస్ఆర్ ముఖ్యమంత్రిగా ఉన్న కాలంలో కూడ ప్రభుత్వ భూములను విక్రయించారని   లోకేష్ ఈ సందర్భంగా గుర్తు చేశారు.
అమరావతిలో కట్టిన లేఖను ఏం చేస్తారని లోకేష్ ప్రభుత్వాన్ని ప్రశ్నించారు.  190 దేశాల్లో ఒక్క దేశంలోనే మూడు రాజధానులు ఉన్నాయని లోకేష్ చెప్పారు.

20 కోట్ల జనాభా ఉన్న యూపీ రాష్ట్రంలో కూడ ఒకే రాజధాని ఉందన్నారు లోకేష్. అమరావతిని కాపాడాలని  కోరుతూ లోకేష్ అధికార పక్షానికి చెందిన మంత్రులకు దండం పెట్టి వేడుకొన్నారు.అమరావతి ని చంపొద్దు,నరకొద్దు అని చేతులు జోడించి వేడుకున్నారు లోకేష్. 

ఐదేళ్ల పసికందు ను చంపేసి తల ఒకచోట, మొండెం ఒక చోట,కాళ్లు మరోచోట పడేయవద్దని కోరారు. జై అమరావతి, జైజై అమరావతి అంటూ నినాదాలు చేశారు. మూడు రాజధానుల విధానానికి తాము పూర్తిగా  వ్యతిరేకమని లోకేష్ తేల్చి చెప్పారు.