గన్నవరం ఇక ఎన్టీఆర్ విమానాశ్రయం

చంద్రబాబు మాట్లాడుతూ విమానాశ్రయానికి ఎన్టీఆర్-అమరావతి విమానాశ్రయంగా పేరు ఖరారు చేయాలంటూ పౌర విమానయాన శాఖ మంత్రి, ఉన్నతాధికారులను కోరారు.

గన్నవరం విమానాశ్రయంకు ఎన్టీఆర్-అమరావతి విమానాశ్రయంగా నామకరణం జరిగింది. శుక్రవారం విమానాశ్రయంలో నూతనంగా నిర్మించిన అంతర్జాతీయ  టెర్మినల్ భవనాన్ని ప్రారంభించారు. 

ఈ సందర్భంగా అశోక్ మాట్లాడుతూ గన్నవరం విమానాశ్రయం పేరును ఎన్టీఆర్ విమానాశ్రయంగా మారుస్తున్నట్లు చెప్పారు. అనంతరం చంద్రబాబు మాట్లాడుతూ విమానాశ్రయానికి ఎన్టీఆర్-అమరావతి విమానాశ్రయంగా పేరు ఖరారు చేయాలంటూ పౌర విమానయాన శాఖ మంత్రి, ఉన్నతాధికారులను కోరారు. కేంద్రమంత్రి, ముఖ్యమంత్రి ఇద్దరూ విజ్ఞప్తి చేసారు కాబట్టి ఇకనుండి గన్నవరం విమానాశ్రయాన్ని ఎన్టీఆర్-అమరావతి విమానాశ్రయంగా పిలవటం ఖాయం.

హైదరాబాద్ లో కట్టినపుడు శంషాబాద్ విమానాశ్రయంలో ఓ టెర్మినల్ కు చంద్రబాబు సిఎంగా ఉన్నపుడే ఎన్టీఆర్ టెర్మినల్ గా పేరు పెట్టారు. అయితే, ఆ తర్వాత సిఎం అయిన వైఎస్ రాజశేఖర్ రెడ్డి మొత్తం విమానాశ్రయం పేరునే రాజీవ్ గాంధి అంతర్జాతీయ విమానాశ్రయంగా మార్చారు. దాంతో అప్పటి నుండి ఎన్టీఆర్ పేరుతో రాష్ట్రంలోని ఏ విమానాశ్రయంలోనూ టెర్మినల్ లేదు. అయితే, తాజా ప్రతిపాదనతో మళ్ళీ ఎన్టీఆర్ పేరు ఖాయమైంది.

అదే సమయంలో చంద్రబాబు ప్రసంగిస్తూ, జిల్లాకో విమానాశ్రయం ఏర్పాటు కావాలన్నారు. జిల్లాల మధ్య రాకపోకలు సులభతరం కావాలంటే ప్రతీ జిల్లాలోనూ ఓ విమానాశ్రయం ఉండాలన్నది చంద్రబాబు విజన్. అలాగే, నెల్లూరు జిల్లాలోని దగదర్తి వద్ద విమానాశ్రయం ఏర్పాటు చేసేబదులు కృష్ణపట్నం వద్ద ఏర్పాటు చేస్తే అన్నీ విధాలుగా లాభదాయకమని సూచించారు.

 ఈ కార్యక్రమంలో కేంద్ర విమానయాన శాఖ మంత్రి అశోక్ గజపతిరాజు, వెంకయ్యనాయడు, సురేష్ ప్రభు, ముఖ్యమంత్రి చంద్రబాబునాయుడు, బండారు దత్తాత్రేయ, సుజనా చౌదరితో పాటు పలువురు ఎంపిలు, స్పీకర్ కోడెల శివప్రసాదరావు తదితరులు పాల్గొన్నారు.