టీచర్ ఎమ్మెల్సీ ఓటరు జాబితాలో అవకతవకలు: ఏపీ హైకోర్టులో యూటీఎఫ్ పిటిషన్
By narsimha lode | First Published Dec 26, 2022, 3:58 PM IST
నెల్లూరు, ప్రకాశం, చిత్తూరు జిల్లాల ఉపాధ్యాయ ఎమ్మెల్సీ ఓటరు జాబితాలో అవకతవకలు చోటు చేసుకున్నాయని ఏపీ హైకోర్టులో ఏపీ యూటీఎఫ్ ఇవాళ పిటిషన్ దాఖలు చేసింది. ఈ పిటిషన్ పై ఏపీ హైకోర్టు రేపు విచారణ చేయనుంది.
విజయవాడ: ఆంధ్రప్రదేశ్ రాష్ట్రంలోని నెల్లూరు, ప్రకాశం, చిత్తూరు జిల్లాల ఎమ్మెల్సీ ఉపాధ్యాయ ఓటరు జాబితాలో అవకతవకలు చోటు చేసుకున్నాయని యూటీఎఫ్ ఆరోపించింది. ఉపాధ్యాయుల ఓటరు జాబితాలో చేర్చిన అనర్హులను తొలటించాలని యూటీఎఫ్ ఏపీ హైకోర్టులో సోమవారం నాడు పిటిషన్ దాఖలు చేసింది. . ఈ పిటిషన్ పై విచారణను రేపటికి వాయిదా వేసింది ఏపీ హైకోర్టు.
వచ్చే ఏడాది మార్చి 29న రాష్ట్రంలో ఐదు ఎమ్మెల్సీ స్థానాలు ఖాళీ కానున్నాయి.ఉపాధ్యాయ , గ్రాడ్యుయేట్స్ ఎమ్మెల్సీ స్థానాల నుండి ప్రాతినిథ్యం వహిస్తున్న ఐదుగురు సభ్యులు 2023 మార్చిలో రిటైర్ కానున్నారు. దీంతో ఈ ఐదు స్థానాల్లో ఓటర్ల నమోదు ప్రక్రియను ఎన్నికల సంఘం ప్రారంభించింది. ఈ ఏడాది నవంబర్ 7వ తేదీ నుండి ఓటర్ల నమోదు ప్రక్రియ ప్రారంభమైంది. అర్హులైన ఓటర్లు తమ ఓటు హక్కును నమోదు చేసుకొనే వెసులుబాటును ఈసీ కల్పించింది. అయితే ఈ ప్రక్రియలో భాగంగా ఉపాధ్యాయ ఎమ్మెల్సీకి చెందిన ఓటరు జాబితాలో అవకతవకలు చోటు చేసుకున్నాయని యూటీఎప్ ఆరోపించింది. ఈ విషయమై ఏపీ హైకోర్టులో పిటిషన్ దాఖలు చేసింది. అనర్హులను ఓటరు జాబితాలో చేర్చినట్టుగా యూటీఎఫ్ నేతలు ఆ పిటిషన్ లో పేర్కొన్నారు. ప్రకాశంలో 50, చిత్తూరులో 30, నెల్లూరులో 50 శాతం జాబితాలో మార్పులు చేశారని యూటీఎప్ ఆ పిటిషన్ లో ఆరోపించింది. ఉపాధ్యాయ ఓటరు జాబితాలో అనర్హుల పేర్లను తొలగించాలని ఆ పిటిషన్ లో యూటీఎఫ్ నేతలు కోరారు.ఈ పిటిషన్ పై ఏపీ హైకోర్టు రేపు విచారణను నిర్వహించనుంది.
Latest Videos
undefined
శ్రీకాకుళం -విజయనగరం -విశాఖ పట్టభద్రుల నియోజకవర్గం నుండి ప్రాతినిథ్యం వహిస్తున్న మాధవ్ పదవీ కాలం వచ్చే ఏడాది మార్చిలో ముగియనుంది. ప్రకాశం - నెల్లూరు- చిత్తూరు ఉపాధ్యాయ ఎమ్మెల్సీ స్థానం నుండి ప్రాతినిథ్యం వహిస్తున్న కత్తి నరసింహరెడ్డి కూడా వచ్చే ఏడాదిలో రిటైర్ కానున్నారు.
ప్రకాశం - నెల్లూరు- చిత్తూరు జిల్లాల గ్రాడ్యుయేట్స్ ఎమ్మెల్సీ స్థానం నుండి ప్రాతినిథ్యం వహిస్తున్న వై. శ్రీనివాసులు రెడ్డి పదవీకాలం కూడా ముగియనుంది. కడప -అనంతపురం -కర్నూల్ గ్రాడ్యుయేట్స్ స్థానం నుండి ప్రాతినిథ్యం వహిస్తున్న వై. గోపాల్ రెడ్డి కూడా రిటైర్ కానున్నారు.ప్రకాశం - నెల్లూరు- చిత్తూరు జిల్లాల ఉపాధ్యాయ ఎమ్మెల్సీ స్థానం నుండి ప్రాతినిథ్యం వహిస్తున్న విఠపు బాలసుబ్రమణ్యం పదవీకాలం వచ్చే ఏడాది ముగియనుంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి