గ్రూప్-2 పరీక్ష వాయిదాకై: టీఎస్‌పీఎస్‌సీ వద్ద అభ్యర్థుల ధర్నా, ఉద్రిక్తత

గ్రూప్-2 పరీక్షలను వాయిదా వేయాలని అభ్యర్థులు  కోరుతున్నారు.  టీఎస్‌పీఎస్‌సీ కార్యాలయం ముందు ఆందోళనకు దిగారు.

హైదరాబాద్: గ్రూప్-2  పరీక్షలను వాయిదా వేయాలని కోరుతూ  అభ్యర్థులు  గురువారంనాడు  టీఎస్‌పీఎస్‌సీని ముట్టడించేందుకు  ప్రయత్నించారు.  గ్రూప్ -2 పరీక్ష రాసే అభ్యర్థులకు  ఎన్ఎస్‌యూఐ, ఓయూ  విద్యార్థి సంఘాలు మద్దతు ప్రకటించాయి.   టీఎస్‌పీఎస్‌సీ వరకు  ర్యాలీగా వచ్చిన  గ్రూప్-2 అభ్యర్థులు కార్యాలయం లోపలికి వెళ్లేందుకు  ప్రయత్నించారు.

 అయితే  గ్రూప్-2 అభ్యర్థులను  టీఎస్‌పీఎస్‌సీ కార్యాలయంలోనికి వెళ్లేందుకు  వెళ్లకుండా  పోలీసులు అడ్డుకున్నారు. ఆందోళనకు దిగిన  వారిని పోలీసులు అదుపులోకి తీసుకున్నారు.  మరో వైపు  గ్రూప్-2 పరీక్ష రాసే  అభ్యర్థులకు తెలంగాణ జనసమితి  చీఫ్  కోదండరామ్  మద్దతిచ్చారు.  గ్రూప్-2 పరీక్షలను  వాయిదా వేయాలని ఆయన ప్రభుత్వాన్ని  కోరారు.ఈ విషయమై అసెంబ్లీలో కోరినా కూడ  ప్రభుత్వం నుండి స్పందన రాకపోవడంపై  ఆయన  అసంతృప్తి వ్యక్తం  చేశారు.

ఈ నెల  29, 30 తేదీల్లో  గ్రూప్ 2 పరీక్షలను నిర్వహించాలని టీఎస్‌పీఎస్‌సీ నిర్ణయం తీసుకుంది. గత ఏడాది డిసెంబర్ మాసంలో ఈ పరీక్షల నిర్వహణకు  సంబంధించిన నోటిఫికేషన్ ను టీఎస్‌పీఎస్‌సీ జారీ చేసింది. ప్రభుత్వ రంగంలోని వివిధ విభాగాల్లోని  783 ఉద్యోగాలను భర్తీ చేసేందుకు టీఎస్‌పీసీఎస్  గ్రూప్ 2 పరీక్షలను నిర్వహించనుంది. అయితే  ఇదే నెలలో గురుకుల,  జూనియర్ లెక్చరర్ పరీక్షలున్నాయి. దీంతో గ్రూప్ 2 పరీక్షలను వాయిదా వేయాలని అభ్యర్థులు కోరుతున్నారు. ఒకే నెలలో మూడు  ముఖ్యమైన పరీక్షలు ఉండడంతో  ఇబ్బందులున్నాయని వారు చెబుతున్నారు.

గ్రూప్-2 పరీక్షలను వాయిదా వేయాలని అభ్యర్థులు ఆందోళనలు నిర్వహిస్తున్నారు.  రెండు రోజుల క్రితం ఓయూలో  ఆందోళనకు దిగారు.  ఇవాళ టీఎస్‌పీఎస్‌సీ వద్ద ఆందోళనకు దిగారు. టీఎస్‌పీఎస్‌సీ కార్యాలయం వద్ద బైఠాయించారు. గ్రూప్-2 పరీక్షలను వాయిదా వేయాలని  డిమాండ్  చేశారు.

ఆందోళన చేస్తున్న  వారిలో ఆరుగురిని చర్చలకు టీఎస్‌పీఎస్‌సీ పిలిచారు. కనీసం మూడు మాసాల పాటు  పరీక్షలను వాయిదా వేయాలని  అభ్యర్థులు కోరుతున్నారు.  అయితే ఈ విషయమై  టీఎస్‌పీఎస్‌సీ ఎలాంటి నిర్ణయం తీసుకొంటుందోననే  ఉత్కంఠ నెలకొంది. టీఎస్‌పీఎస్‌సీ పరీక్షలను వాయిదా వేస్తే పరీక్షలు నిర్వహించేందుకు రానున్న రోజుల్లో కష్టమనే అభిప్రాయంతో టీఎస్‌పీఎస్‌సీ ఉందనే  ప్రచారం సాగుతుంది.