హైదరాబాద్ లో నేడే మోడీ పర్యటన... ఎదురుచూస్తున్నానంటూ ట్వీట్ చేసిన ప్రధాని..

నేడు ప్రధాని నరేంద్ర మోడీ తెలంగాణలో పర్యటించనున్నారు. దీంట్లో భాగంగా ఇక్రిశాట్ 50యేళ్ల ఉత్సవాల్లో పాల్గొంటారు. ఆ తరువాత ముచ్చింతల్ లో ఏర్పాటు చేసిన స్టాచ్యూ ఆఫ్ లిబర్టీ విగ్రహావిష్కరణలో పాల్గొంటారు. ఈ మేరకు మోడీ స్వయంగా ట్వీట్ చేశారు. 

హైదారబాద్ : ప్రధానమంత్రి నరేంద్ర మోడీ నేడు తెలంగాణ పర్యటనకు రానున్న సంగతి తెలిసిందే. ఈ మేరకు ప్రధాని మోడీ స్వయంగా ట్విట్టర్ వేదికగా తన కార్యక్రమాన్ని వివరించారు. ఈ విజిట్ కు సంబంధించిన విషయాన్ని ఆయన ట్వీట్ చేస్తూ.. ‘హైదరాబాద్ కు రావడానికి తాను ఎదురుచూస్తున్నానని చెప్పారు. హైదరాబాద్ లో రెండు కార్యక్రమాల్లో పాల్గొనబోతున్నాను. మధ్యాహ్నం 2.45 నిమిషాలకు ICRISAT 50యేళ్ల గోల్డెన్ జూబ్లీ ఉత్సవాల్లో పాల్గొనబోతున్నాను. వ్యవసాయం, ఆవిష్కరణల రంగంలో అత్యంత ప్రభావవంతంగా పనిచేసే ఎంతో ముఖ్యమైన ఇనిస్టిట్యూట్ ఇది’ అంటూ చెప్పుకొచ్చారు.

ఇక రెండో ట్వీట్ లో ‘సాయంత్రం ఐదు గంటలకు సమతామూర్తి శ్రీ రామానుజాచార్యుల ‘statue of equality'విగ్రహావిష్కణలో పాల్గొనబోతున్నారు. తన ఆధ్యాత్మిక బోధనలతో మనల్ని ఉత్తేజితం చేసిన రామానుజుల వారికి ఇది గొప్ప ట్రిబ్యూట్’ అని మోదీ ట్వీట్ చేశారు.

పర్యటన ఇలా... 
ప్రధాన మంత్రి నరేంద్ర మోదీ జనవరి 5, 2022న హైదరాబాద్‌ను సందర్శిస్తారు. మధ్యాహ్నం 2:45 గంటలకు, హైదరాబాద్‌లోని పటాన్‌చెరులోని ఇంటర్నేషనల్ క్రాప్స్ రీసెర్చ్ ఇన్‌స్టిట్యూట్ ఫర్ సెమీ-ఎరిడ్ ట్రాపిక్స్ (ICRISAT) క్యాంపస్‌ని ప్రధాన మంత్రి సందర్శిస్తారు. ICRISAT  50వ వార్షికోత్సవ వేడుకలను ప్రారంభిస్తారు. సాయంత్రం 5 గంటలకు, హైదరాబాద్‌లోని ‘స్టాట్యూ ఆఫ్ ఈక్వాలిటీ’ని ప్రధాని జాతికి అంకితం చేస్తారు.

216 అడుగుల ఎత్తైన సమానత్వ విగ్రహం 11వ శతాబ్దపు ఆధ్యాత్మిక గురువు శ్రీ రామానుజాచార్యుల జ్ఞాపకార్థం ఏర్పాటు చేశారు. విశ్వాసం, కులం, మతంతో సహా అన్ని జీవన అంశాలలో సమానత్వం అనే ఆలోచనను రామానుజాచార్యులు ప్రోత్సహించారు. ఈ పంచలోహ విగ్రహం బంగారం, వెండి, రాగి, ఇత్తడి, జింక్ ఐదు లోహాల కలయికతో తయారు చేయబడింది. ప్రపంచంలోని కూర్చున్న స్థితిలో ఉన్న ఎత్తైన లోహ విగ్రహాలలో ఇదొకటి. ఇది 54-అడుగుల ఎత్తైన బేస్ బిల్డింగ్‌పై అమర్చబడింది.. దీనికి 'భద్ర వేదిక' అని పేరు పెట్టారు. 

ఈ విగ్రహంలో వేద డిజిటల్ లైబ్రరీ, పరిశోధనా కేంద్రం, ప్రాచీన భారతీయ గ్రంథాలు, థియేటర్, శ్రీ రామానుజాచార్యకు సంబంధించిన అనేక రచనలను వివరించే విద్యా గ్యాలరీ కోసం అంకితం చేసిన ఫ్లోర్స్ ఉన్నాయి. ఈ విగ్రహాన్ని శ్రీ రామానుజాచార్య ఆశ్రమానికి చెందిన చిన్న జీయర్ స్వామి రూపొందించారు. ఈ కార్యక్రమంలో రామానుజాచార్యుల జీవిత ప్రయాణం, బోధనపై త్రీడీ ప్రెజెంటేషన్ మ్యాపింగ్ కూడా ప్రదర్శించబడుతుంది. సమానత్వ విగ్రహం చుట్టూ ఉన్న 108 దివ్య దేశాలు (అలంకృతంగా చెక్కబడిన దేవాలయాలు)ను కూడా ప్రధాన మంత్రి సందర్శిస్తారు.

రామానుజాచార్యులు దేశ, లింగ, జాతి, కుల, వర్ణాలకు అతీతంగా ప్రతి మానవుడు సమానమన్న స్ఫూర్తితో ప్రజల అభ్యున్నతి కోసం అవిశ్రాంతంగా కృషి చేశారు. రామానుజాచార్యుల 1000వ జయంతి ఉత్సవాలలో 12 రోజుల పాటు జరిగే శ్రీ రామానుజ సహస్రాబ్ది సమారోహంలో భాగంగా ఈ సమానత్వ విగ్రహం ప్రారంభోత్సవం జరగనుంది. ఈ పర్యటనలో ముందుగా, ప్రధాన మంత్రి ICRISAT 50వ వార్షికోత్సవ వేడుకలను ప్రారంభిస్తారు. మొక్కల సంరక్షణపై ICRISAT  వాతావరణ మార్పు పరిశోధనా సదుపాయాన్ని,  ICRISAT రాపిడ్ జనరేషన్ అడ్వాన్స్‌మెంట్ ఫెసిలిటీని కూడా ప్రధాన మంత్రి ప్రారంభిస్తారు. 

ఈ రెండు సౌకర్యాలు ఆసియా, సబ్-సహారా ఆఫ్రికాలోని చిన్న రైతుల కోసం అంకితం చేయబడ్డాయి. ICRISAT ప్రత్యేకంగా రూపొందించిన లోగోను కూడా ప్రధాని ఆవిష్కరిస్తారు. ఈ సందర్భంగా విడుదల చేసిన స్మారక స్టాంపును కూడా ప్రధాన మంత్రి ఆవిష్కరించనున్నారు.

ICRISAT అనేది ఆసియా & సబ్-సహారా ఆఫ్రికాలో వ్యవసాయం, ఆవిష్కరణలు, వాటి అభివృద్ధి కోసం వ్యవసాయ పరిశోధనలను నిర్వహించే అంతర్జాతీయ సంస్థ. మెరుగైన పంట రకాలు, హైబ్రిడ్‌లను అందించడం ద్వారా రైతులకు సహాయపడుతుంది, పొడి భూముల్లోని చిన్నకారు రైతులకు వాతావరణ మార్పులతో పోరాడటానికి కూడా సహాయపడుతుంది.

స్వాగతం పలకనున్న మంత్రులు...
హైదరాబాద్ లో జరిగే పలు కార్యక్రమాలలో పాల్గొనేందుకు నేడు నగరానికి రానున్న దేశ ప్రధాన మంత్రి నరేంద్ర మోడీ రాష్ట్ర ప్రభుత్వం తరపున రాష్ట్ర పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్ యాదవ్ స్వాగతం పలుకనున్నారు. మధ్యాహ్నం 2.10 గంటలకు డిల్లీ నుండి ప్రత్యేక విమానంలో శంషాబాద్ ఎయిర్ పోర్ట్ కు ప్రధానమంత్రి చేరుకోనున్నారు. డిల్లీకి తిరిగి వెళ్ళేటప్పుడు ప్రధానమంత్రికి మంత్రి తలసాని శ్రీనివాస్ యాదవ్ వీడ్కోలు పలకనున్నారు.