నవీన్ హత్య కేసు.. హరిహరకృష్ణను వారం రోజులు కస్టడీకి అనుమతించిన కోర్టు..

తెలుగురాష్ట్రాల్లో తీవ్ర సంచలనం రేపిన బీటెక్ విద్యార్థి నవీన్ హత్య కేసులో నిందితుడు హరిహరకృష్ణను పోలీసు కస్టడీకి కోర్టు అనుమతించింది. అమ్మాయి విషయంలో నవీన్‌పై పగ పెంచుకున్న హరిహరకృష్ణ  అత్యంత దారుణంగా హత్య చేసిన సంగతి తెలిసిందే. ఆ తర్వాత తనకు ఏం తెలియనట్టుగా సైలెంటుగా ఉన్న హరిహరకృష్ణ కొద్ది రోజులకు పోలీసుల ఎదుట లొంగిపోయాడు. ప్రస్తుతం రిమాండ్ ఖైదీగా  ఉన్న హరిహరకృష్ణను కస్టడీ కోరుతూ పోలీసులు రంగారెడ్డి జిల్లా  కోర్టులో పిటిషన్ దాఖలు చేశారు. నిందితుడి నుంచి మరిన్ని వివరాలు రాబట్టాల్సి ఉందని పేర్కొన్నారు. అయితే పోలీసులు 8 రోజులు హరిహరకృష్ణను కస్టడీకి ఇవ్వాలని కోరగా..  రంగారెడ్డి  జిల్లా కోర్టు ఏడు రోజుల పాటు కస్టడీకి అనుమతించింది. 

హరిహరకృష్ణను వారం  రోజుల కస్టడీకి రంగారెడ్డి జిల్లా కోర్టు అనుమతించడంతో.. అతడిని పోలీసులు అదుపులోకి తీసుకుని విచారించనున్నారు. ఈ విచారణ సందర్భంగా నవీన్ హత్యకు సంబంధించి మరిన్ని కీలక విషయాలు వెలుగులోకి వస్తాయని పోలీసులు భావిస్తున్నారు. హత్యకు వినియోగించిన ఆయుధాలు, ఇతర ఆధారాలను పోలీసులు సేకరించే అవకాశం ఉంది. అలాగే సీన్‌ రీకన్‌స్ట్రక్షన్ చేయనున్నట్టుగా తెలుస్తోంది. 

ఇక, ఇంటర్మీడియట్ చదివే రోజుల నుంచే నవీన్, హరిహరకృష్ణలు స్నేహితులు. వీరిద్దరూ ఒకే కాలేజీలో  చదువుకున్నారు. ఇంటర్ లో చదువుకునే రోజుల్లోనే  పరిచయం ఉన్న అమ్మాయితో  వీరిద్దరూ ప్రేమలో పడ్డారు. ఈ ప్రేమ అంశమే  వీరిద్దరి మధ్య అగాధాన్ని పెంచింది. ఈ క్రమంలో నవీన్ పై   హరిహరకృష్ణ   అక్కసును పెంచుకున్నాడు. నవీన్ ను హత్య చేస్తే  లవర్ తనకు దక్కుతుందని  హరిహరకృష్ణ భావించాడు. దీంతో  నవీన్ ను హైద్రాబాద్ కు రప్పించి హత్య  చేసినట్టుగా  పోలీసులు దర్యాప్తులో గుర్తించారు. ఈ విషయాన్ని హరిహరకృష్ణ రిమాండ్ రిపోర్టులో  పోలీసులు తెలిపారు.

ఇదిలా ఉంటే.. నవీన్‌ను హత్య చేసిన విషయాన్ని  హరిహరకృష్ణ తన స్నేహితుడు, స్నేహితురాలు, తండ్రికి  చెప్పాడు. ఇంత జరిగినా వీరిలో ఏ ఒక్కరు కూడా పోలీసులకు సమాచారం అందించకపోవడంతో.. ఉన్నతాధికారులు ఈ ముగ్గురిపై ఆగ్రహం వ్యక్తం చేసినట్లుగా తెలుస్తోంది. ఇక అన్నింటికి మించి హరిహరకృష్ణ స్నేహితురాలు పోలీసులను ముప్పుతిప్పలు పెడుతోంది. ఇప్పటికే మూడు సార్లు ఆమెను విచారించగా.. నోరు విప్పకపోవడంతో పోలీసులు ఆమెను సఖి సెంటర్‌లో కౌన్సెలింగ్‌కు పంపారు. అయినప్పటికీ ఆ అమ్మాయి తీరు మారలేదని సమాచారం.