సీల్డ్‌కవర్లో వివరణ: కోమటిరెడ్డి భవితవ్యంపై ఉత్కంఠ

కాంగ్రెస్ పార్టీ అధిష్టానంపై తీవ్ర విమర్శలు గుప్పించిన ఎమ్మెల్సీ కోమటిరెడ్డి రాజగోపాల్‌రెడ్డి.. కాంగ్రెస్ పార్టీ క్రమశిక్షణ సంఘానికి  తన వివరణను అందించారు. 

హైదరాబాద్:కాంగ్రెస్ పార్టీ అధిష్టానంపై తీవ్ర విమర్శలు గుప్పించిన ఎమ్మెల్సీ కోమటిరెడ్డి రాజగోపాల్‌రెడ్డి.. కాంగ్రెస్ పార్టీ క్రమశిక్షణ సంఘానికి  తన వివరణను అందించారు.  సీల్డ్ కవర్లో తన వివరణను పీఏ ద్వారా సోమవారం నాడు గాంధీభవన్‌కు పంపారు.

రెండు రోజుల క్రితం గాంధీభవన్‌‌పై, కొందరు   కాంగ్రెస్ పార్టీ నాయకులపై ఎమ్మెల్సీ కోమటిరెడ్డి రాజగోపాల్ రెడ్డి తీవ్ర విమర్శలు చేశారు. ఈ విమర్శలను  కాంగ్రెస్ పార్టీ సీరియస్‌గా తీసుకొంది.

రెండు రోజుల క్రితం కోదండరెడ్డి నేతృత్వంలో సమావేశమైన కాంగ్రెస్ పార్టీ క్రమశిక్షణ సంఘం  ఎమ్మెల్సీ కోమటిరెడ్డి  రాజగోపాల్ రెడ్డికి షోకాజ్ నోటీసులు జారీ చేసింది. ఈ షోకాజ్‌ నోటీసులు జారీ చేసిన రోజు సాయంత్రం కూడ కోమటిరెడ్డి రాజగోపాల్ రెడ్డి మీడియాతో మాట్లాడారు. 

అదే రోజు సాయంత్రం తన నివాసంలో మీడియాతో మాట్లాడుతూ మరోసారి కాంగ్రెస్ పార్టీ నేతలపై  కోమటిరెడ్డి రాజగోపాల్ రెడ్డి తీవ్ర విమర్శలు గుప్పించారు.అయితే పార్టీ క్రమశిక్షణ సంఘం రెండు రోజుల్లోపుగా వివరణ ఇవ్వాలని ఆదేశించింది. దీంతో కోమటిరెడ్డి రాజగోపాల్ రెడ్డి పార్టీ  క్రమశిక్షణ సంఘానికి  సోమవారం నాడు తన వివరణను సీల్డ్ కవర్లో పంపారు.

పార్టీ కార్యకర్తల ఆవేదనను వివరించినట్టుగా ఆ లేఖలో ఉన్నట్టు సమాచారం. అయితే కోమటిరెడ్డి రాజగోపాల్ రెడ్డి  వివరణపై  క్రమశిక్షణ సంఘం కోదండరెడ్డి నేతృత్వంలో సమావేశమై చర్చిస్తోంది.

సంబంధిత వార్తలు