UCC: కేసీఆర్‌కు నచ్చకుంటే దేశం వదిలిపోవచ్చు.. ఎవ్వరూ ఆపరు: బీజేపీ ఎంపీ అర్వింద్

ఉమ్మడి పౌరస్మృతి సునాయసంగా పార్లమెంటులో పాస్ అవుతుందని బీజేపీ ఎంపీ అర్వింద్ అన్నారు. ఈ బిల్లు ఆమోదం పొందిన తర్వాత కేసీఆర్‌కు నచ్చకుంటే ఆయన దేశం విడిచి వెళ్లిపోవచ్చని చెప్పారు. ఆయనను ఎవ్వరూ ఆపరని పేర్కొన్నారు.  

తెలంగాణలోనూ ఉమ్మడి పౌరస్మృతిపై రాజకీయంగా చర్చ మొదలైంది. ఎంఐఎం ఎంపీ అసదుద్దీన్ ఒవైసీ సీఎం కేసీఆర్‌ను కలవడం, ఆ తర్వాత సీఎం కేసీఆర్ ముస్లిం పర్సనల్ బోర్డు ప్రతినిధులతో సమావేశం కావడం, ఆ తర్వాత సీఎం కేసీఆర్ ఉమ్మడి పౌరస్మృతిని వ్యతిరేకించడం చకచకా జరిగిపోయాయి. ఈ నేపథ్యంలోనే బీజేపీ దీనిపై తీవ్ర వ్యాఖ్యలు చేసింది. నిజామాబాద్ ఎంపీ ధర్మపురి అర్వింద్ ఈ సందర్భంలో సీఎం కేసీఆర్‌ను నేరుగా టార్గెట్ చేసి కామెంట్ చేశారు.

ఉమ్మడి పౌరస్మృతి విషయమై అసదుద్దీన్, ఆ తర్వాత ముస్లిం పెద్దలతో సీఎం కేసీఆర్‌తో సమావేశమయ్యారనే విషయాన్ని ఎంపీ అర్వింద్ గుర్తు చేశారు. బీజేపీ ప్రభుత్వం కచ్చితంగా ఉమ్మడి పౌరస్మృతిని తెచ్చి తీరుతుందని, పార్లమెంటులో ఈ బిల్లును సునాయసంగా ఆమోదం పొందుతుందని ఆయన చెప్పారు. పార్లమెంటులో ఈ బిల్లు ఆమోదం పొందిన తర్వాత సీఎం కేసీఆర్‌కు ఇబ్బంది అనిపిస్తే దేశం వదిలి వెళ్లిపోవచ్చని తీవ్ర వ్యాఖ్యలు చేశారు. ఆయన దేశం విడిచి వెళ్లితే ఎవ్వరూ వద్దనరని పేర్కొన్నారు.

బీఆర్ఎస్, బీజేపీ ఒక్కటని కొన్ని చానెల్స్ కావాలనే ఉద్దేశపూర్వకంగా తప్పుడు ప్రచారం చేశాయని, ఇది కేసీఆరే ఈ ప్రచారం చేయించారని ఆరోపించారు. కానీ, ముస్లిం ఓట్లు కాంగ్రెస్ వైపు వెళ్లుతున్నాయనే సమాచారం రాగానే.. యూసీసీని వ్యతిరేకిస్తున్నట్టు ఇప్పుడు కొత్త వైఖరి ఎత్తుకున్నారని తెలిపారు.