హోం గార్డుతో అఫైర్: మహిళను చితకబాది, కిటికీకి కట్టేసి...

హోంగార్డుతో అక్రమ సంబంధం పెట్టుకుందనే అనుమానంతో ఓ ఒంటరి మహిళపై దాడి చేశారు. హోంగార్డు బంధువులు ఈ దాడికి పాల్పడ్డారు. ఆమెను బయట కిటికీకి కట్టేశారు.

ఖమ్మం: తెలంగాణలోని ఖమ్మం జిల్లాలో అమానుషమైన సంఘటన చోటు చేసుకుంది. హోంగార్డుతో వివాహేతర సంబంధం పెట్టుకుందనే అనుమానంతో ఓ మహిళపై అత్యంత దారుణంగా దాడి చేశారు. ఈ సంఘటన ఖమ్మం జిల్లాలోని ఇల్లందులో చోటు చేసుకుంది. ఇల్లందులోని ఎల్బీఎస్ నగర్ లో నివాసం ఉంటున్న ఒంటరి మహిళ స్థానికంగా ఓ కిరాణా షాపులో పనిచేస్తుంది.

ఇల్లందు పోలీసు స్టేషన్ లో హోంగార్డుగా పనిచేస్తున్న నరేష్ అనే వ్యక్తి ఇల్లందులోని ఆర్ అండ్ ఆర్ కాలనీలో నివాసం ఉంటున్నాడు. ఈ క్రమంలో నరేష్ ఆదివారం మధ్యాహ్నం నరేష్ మహిళ ఇంట్లో ఆమెతో మాట్లాడుతుండగా నరేష్ తల్లితో పాటు అతడి బంధువులు ఆ మహిళ ఇంటిపై దాడి చేశారు.

ఆమెను విచక్షణారహితంగా చితకబాది ఆమెను బయట కిటికీకి కట్టేశారు. అయితే బాధితురాలు మాత్రం నరేష్ తన వద్ద నుంచి కొందరికి డబ్బులు ఇప్పిస్తాడని, ఆ క్రమంలోనే ఆదివారం డబ్బులు కోసం వచ్చాడని చెబుతోంది.

గత కొన్ని రోజులుగా నరేష్ ఇంటికి సరిగా రాకపోవడం, తరుచుగా ఆ మహిళ ఇంటికి వెళ్తుండడం వంటి కారణాలతో ఆ మహిళకు, నరేష్ కు మధ్య అక్రమ సంబంధం కొనసాగుతోందని నరేష్ బంధువులు నమ్ముతున్నారు. దాంతో ఆమెపై దాడికి పాల్పడ్డారు. పోలీసుల జోక్యంతో గొడవ సద్దుమణిగింది.