కుక్కను నేను కరవమని చెప్పానా?: జీహెచ్ఎంసీ మేయర్ గద్వాల విజయలక్ష్మి

రాజకీయాల్లోకి వచ్చిన  మహిళలను చూస్తే  కొందరు ఓర్వలేరని  జీహెచ్ఎంసీ  మేయర్  గద్వాల విజయలక్ష్మి  చెప్పారు.    

  హైదరాబాద్: ఎవరినో  కుక్క కరిస్తే   తానే  కరమనట్టుగా  బురద చల్లారని జీహెచ్ఎంసీ మేయర్  గద్వాల విజయలక్ష్మి ఆవేదన వ్యక్తం  చేశారు. సోమవారం నాడు బీఆర్ఎస్ మహిళా విభాగం  ఆధ్వర్యంలో  నిర్వహించిన  మ:హిళా దినోత్సవ వేడుకల్లో  మేయర్  పాల్గొన్నారు. ఈ సందర్భంగా  ఆమె  ప్రసంగించారు.  రాజకీయాల్లో   మహిళల గురించి చెడుగా  మాట్లాడుతారన్నారు.  మహిళలు బయటకు వస్తే   కొందరు  ఓర్వేరని ఆమె  అభిప్రాయపడ్డారు. మేయర్ గా  తాను  ఎన్నో బాధ్యతలు , కష్టాలను  చూసినట్టుగా  ఆమె తెలిపారు. 

ఈ ఏడాది ఫిబ్రవరి  19వ తేదీన అంబర్ పేటలో  వీధి కుక్కల దాడిలో  నాలుగేళ్ల ప్రదీప్ అనే చిన్నారి మృతి చెందాడు.  ఈ ఘటనతో  జీహెచ్ఎంసీ పై  పలువురు విమర్శలు గుప్పించారు.  

వీధి కుక్కలను అరికట్టడంలో  జీహెచ్ఎంసీ  పాలకవర్గం  వైఫల్యం చెందినట్టుగా విమర్శలు వెల్లువెత్తాయి.   ఈ విమర్శలపై  ఇవాళ  ఆమె  పరోక్షంగా స్పందించారు. రాష్ట్రలలోని  పలు జిల్లాల్లో   వీధి కుక్కల దాడులు  చోటు  చేసుకుంటున్నాయి.   వీధి కుక్కలను నియంత్రించేందుకు  చర్యలు తీసుకుంటున్నామని  ప్రభుత్వం  ప్రకటించింది.