మేడ్చల్ జిల్లా ఘట్ కేసర్ లో చిన్నారి కిడ్నాప్ కలకలం..

ఘట్ కేసర్ ఈడబ్ల్యూఎస్ కాలనీలో ఓ నాలుగేళ్ల చిన్నారి కిడ్నాప్ అయ్యింది. ఇంటిముందు ఆడుకుంటూ కనిపించకుండా పోయింది.

హైదరాబాద్ : తెలంగాణలోని మేడ్చల్ జిల్లా ఘట్ కేసర్ లో ఓ నాలుగేళ్ల చిన్నారి కిడ్నాప్ అయ్యింది. దీంతో స్థానికంగా కలకలం రేపింది. మేడ్చల్ లోని ఈడబ్ల్యూఎస్ కాలనీలో ఇంటిముందు ఆడుకుంటూ ఆ చిన్నారి కనిపించికుండా పోయింది. దీంతో అంతటా వెతికిన తల్లిదండ్రులు దొరకకపోవడంతో పోలీసులను ఆశ్రయించారు. వారి ఫిర్యాదు మేరకు కేసు నమోదు చేసుకుని, దర్యాప్తు చేస్తున్నారు. 

బాలిక పేరు క్రిష్ణవేణిగా తెలుస్తోంది. రాత్రి షాప్ కు వెళ్లి తిరిగి రాలేదు. తల్లిదండ్రుల ఫిర్యాదుతో పోలీసులు బృందాలుగా ఏర్పడి గాలింపు చేపట్టారు. సీసీ టీవీ ఫుటేజ్ లో మతిస్థిమితం లేని వ్యక్తి దగ్గర ఉన్నట్లుగా పోలీసులు గుర్తించారు. సురేష్ అనే వ్యక్తిని అనుమానితుడిగా గుర్తించారు పోలీసులు. సురేష్ రాత్రి 8 గం.ల సమయంలో కిరాణా షాప్ దగ్గరికి వచ్చాడని.. అదే సమయంలో పాప చాక్లెట్ కొనుక్కోవడానికి వెళ్లిందని అంటున్నారు. 

స్థానికులు పాపను సురేష్ తీసుకెళ్లడం చూశామని పోలీసులకు చెబుతున్నారు. తల్లిదండ్రులు పాప కనిపించకపోవడంతో కన్నీరు మున్నీరవుతున్నారు. సురేష్ తమ పాపను ఏం చేశాడోనని.. తమ పాప తమకు దక్కితే చాలంటూ ఆందోళన వ్యక్తం చేస్తున్నారు. అనిల్ అనే వ్యక్తి రాత్రి 8.30 గం.ల తరువాత సురేష్, క్రిష్ణవేణిని తీసుకువెళ్లడం చూశాడు. వెంటనే తల్లిదండ్రులకు సమాచారం ఇచ్చాడు. వారు వెంటనే పోలీసులకు సమాచారం ఇచ్చారు. 

సురేష్ గతంలో సినిమా థియేటర్లో పనిచేసే సమయంలో ఓ అమ్మాయిని కిడ్నాప్ చేశాడు. ఆ తరువాత ఆమెను ఏపీకి తీసుకువెళ్లినట్లు తెలుస్తోంది. ఈ నేపథ్యంలో ప్రస్తుతం చిన్నారి కిడ్నాప్ భయాందోళనలు రేకెత్తిస్తోంది. చిన్నారి కోసం ఘట్కేసర్ పరిసరాల్లో పోలీసులు జల్లెడ పడుతున్నారు.