దేశంలో అశాంతి సృష్టించేందుకు కుట్రలు చేస్తున్నారు.. : సీఎం కేసీఆర్

హైద‌రాబాద్: భారతదేశంలో అశాంతి సృష్టించేందుకు కుట్రలు చేస్తున్నారని తెలంగాణ ముఖ్య‌మంత్రి కే.చంద్ర‌శేఖ‌ర్ రావు (కేసీఆర్) అన్నారు. అన్ని సహజ వనరులు, మానవ వనరులు ఉన్నప్పటికీ దేశం ఆశించిన ప్రగతిని సాధించలేదని పేర్కొన్నారు.   

హైద‌రాబాద్: విభజన రాజకీయాల ద్వారా దేశంలో అశాంతి సృష్టించేందుకు కుట్రలు పన్నుతున్నారని తెలంగాణ ముఖ్యమంత్రి కె. చంద్రశేఖర్ రావు (కేసీఆర్) అన్నారు. అశాంతి సృష్టించే ప్రయత్నాలను తిప్పికొట్టేందుకు దేశంలో ఏం జరుగుతోందో మాట్లాడాలని మేధావి వర్గాలకు సూచించారు. ఆందోళనకరమైన పోకడలను పట్టించుకోకుండా మేధావులు వ్యవహరించడం సరికాదన్నారు. సోమ‌వారం నాడు ఎల్బీ స్టేడియంలో జరిగిన భారత స్వాతంత్య్ర వజ్రోత్సవాల ముగింపు కార్యక్రమంలో సీఎం కేసీఆర్ మాట్లాడుతూ పై వ్యాఖ్య‌లు చేశారు. స్వాతంత్య్రం వచ్చి 75 ఏళ్లు అవుతున్నా పేదల ఆకాంక్షలు నెరవేరలేదన్నారు. ''అణగారిన వర్గాలు ఇప్పటికీ విస్మరించబడుతున్నాయి. స్వాతంత్య్ర ఫలాలు తమకు అందలేదనే భావన వివిధ వర్గాల ప్రజల్లో ఉంది’’ అని తెలిపారు. అన్ని సహజ వనరులు, మానవ వనరులు ఉన్నప్పటికీ దేశం ఆశించిన ప్రగతిని సాధించలేదని పేర్కొన్నారు. 

కుల, మత వివక్ష లేకుండా దేశం ప్రగతి పథంలో పయనించేలా చూడాల్సిన బాధ్యత నేటి తరంపై ఉందన్నారు. ప్రతి కుటుంబంలో దేశభక్తి, జాతీయ స్ఫూర్తిని పెంపొందించేందుకు రాష్ట్ర ప్రభుత్వం రెండు వారాల పాటు జరిగే ఉత్సవాల్లో ప్రతిరోజూ వివిధ కార్యక్రమాలను నిర్వహించిందని కేసీఆర్ చెప్పారు.  సామూహిక జాతీయ గీతాలాపన నిర్వహించే ఘనత తెలంగాణకు దక్కిందన్నారు. ఈ కార్యక్రమంలో కోటి మందికి పైగా ప్రజలు పాల్గొన్నారు. జాతిపిత మహాత్మాగాంధీని కొన్ని శక్తులు అవమానిస్తున్న తరుణంలో రాష్ట్ర ప్రభుత్వం గాంధీ సినిమాని రాష్ట్రవ్యాప్తంగా సినిమా థియేటర్లలో ప్రదర్శించిందని కేసీఆర్ అన్నారు. 22 లక్షల మంది చిన్నారులు సినిమా చూశారని, మహాత్మాగాంధీ స్ఫూర్తితో 10 శాతం మంది అయినా దేశంలో పెనుమార్పు తీసుకురాగలరని ముఖ్యమంత్రి అన్నారు.

ఈ కార్యక్రమంలో ముఖ్యమంత్రి జాతీయ జెండాను ఎగురవేసి మహాత్మాగాంధీ విగ్రహానికి పూలమాలలు వేసి నివాళులర్పించారు. క్రీడలు, సాహిత్యం, సంస్కృతి, సామాజిక సేవ వంటి వివిధ రంగాల్లో సాధించిన ప్రతిభ కనబర్చిన వారిని ఆయన సత్కరించారు. ఈ కార్యక్రమంలో మంత్రులు, ఎంపీలు, రాష్ట్ర శాసనసభ్యులు, ఇతర ప్రజాప్రతినిధులు, ప్రభుత్వ అధికారులు తదితరులు పాల్గొన్నారు. సింగర్‌ కంపోజర్‌ శంకర్‌ మహదేవన్‌, డ్రమ్మర్‌ శివమణి, వార్సీ సోదరుల కవ్వాలీ, పద్మజా రెడ్డి బృందం చేసిన నృత్యం ప్రేక్షకులను అలరించాయి. 'ఏకదంతాయ వక్రతుండాయ' శ్లోకంతో ప్రారంభించిన శంకర్ మహదేవన్, తనను ఆహ్వానించినందుకు తెలంగాణ ప్రభుత్వానికి కృతజ్ఞతలు తెలుపుతూ, బాలీవుడ్ చిత్రం 'లక్ష్య'లోని హిట్ పాట 'హాన్ యేహీ రాస్తా హై తేరా'ను ముఖ్యమంత్రి కె చంద్రశేఖర్ రావుకు అంకితం చేశారు. ముఖ్యమంత్రి హైదరాబాద్‌ను అందమైన జీవన ప్రదేశంగా తీర్చిదిద్దారని, ఆ లక్ష్యాన్ని చేరుకోవడం కోసం ఈ పాటను ఆయనకు అంకితమిస్తున్నట్లు తెలిపారు. మహదేవన్ తెలుగు, హిందీ భాషలలో ఇతర పాటలతో ప్రేక్షకులను అలరించారు, ప్రముఖ భక్తిగీతమైన 'ఓం మహాప్రాణ దీపం శివం శివం'ని కూడా పాడారు.

లక్ష్మీబాయి, సుభాష్ చంద్రబోస్ మరియు భగత్ సింగ్‌లతో సహా స్వాతంత్ర్య సమరయోధుల పట్ల కృతజ్ఞతా భావాన్ని ప్రదర్శించే నాటకాలకు అదనంగా ప్రదర్శనలు ఉన్నాయి. ప్రభుత్వ ప్రధాన కార్యదర్శి సోమేశ్‌కుమార్‌ మాట్లాడుతూ గత పక్షం రోజులుగా చేపట్టిన కార్యక్రమాలను ప్రస్తావిస్తూ.. స్వతంత్ర భారత వజ్రోత్సవాల్లో భాగంగా నిర్వహించిన వివిధ పోటీల్లో సుమారు 60 లక్షల మంది విద్యార్థులు పాల్గొన్నారని తెలిపారు.