బీజేపీపై అబ‌ద్దాలు ప్ర‌చారం చేస్తున్న బీఆర్ఎస్.. : కేంద్ర మంత్రి కిష‌న్ రెడ్డి

Hyderabad: స్వప్నలోక్ కాంప్లెక్స్ అగ్నిప్రమాద ఘటన తీవ్రంగా క‌ల‌చివేసింద‌నీ, తాను ఆర్థిక సాయం కోసం పీఎంవో దృష్టికి తీసుకెళ్లానని కిషన్ రెడ్డి తెలిపారు. ఇప్పటి వరకు నాలుగు అగ్ని ప్రమాదాలు జరగ్గా 29 మంది చనిపోయారు. ఇలాంటి ప్రమాదాలు జరగకుండా రాష్ట్ర ప్రభుత్వం బాధ్యత తీసుకోవాలని పేర్కొన్నారు.  

Union Minister Kishan Reddy: బీజేపీపై బీఆర్ఎస్ అబ‌ద్దాల‌ను ప్ర‌చారం చేస్తోంద‌ని కేంద్ర మంత్రి జీ.కిష‌న్ రెడ్డి ఆరోపించారు. ఢిల్లీ మద్యం కుంభకోణం కేసు నుంచి ప్రజల దృష్టి మరల్చేందుకే మహిళా రిజర్వేషన్ బిల్లు కోసం బీఆర్ఎస్ పోరాడుతోందని విమర్శించారు. అత్యధికంగా మహిళా ఎమ్మెల్యేలు, ఎంపీలు, మంత్రులు బీజేపీలోనే ఉన్నారని తెలిపారు. పార్టీ వారికి ఇవ్వాల్సిన గౌరవం ఇచ్చిందని, పలువురిని కీలక పదవుల్లో నియమించారని ఆయన మీడియా ప్రతినిధులతో అన్నారు. ప్రపంచం మొత్తం భారత్ వైపు చూస్తోందని తెలిపారు. కానీ, ముఖ్యమంత్రి కే చంద్రశేఖర్ రావు మాత్రం తన కుటుంబం వైపు చూస్తున్నారంటూ విమ‌ర్శించారు. అటు కేంద్రం గానీ, ఇటు బీజేపీ గానీ ఎవరినీ టార్గెట్ చేయడం లేదన్నారు. సీబీఐ దర్యాప్తు ముమ్మరం చేయడంతో కల్వకుంట్ల కుటుంబ సభ్యులు, ఇతరుల పేర్లు ఒక్కొక్కటిగా బయటకు వచ్చాయ‌ని పేర్కొన్నారు.

అవినీతిని రూపుమాపుతామనీ, వారసత్వ రాజకీయాలకు వ్యతిరేకంగా పోరాడుతామని 2014లో ప్రధాని నరేంద్ర మోడీ అధికారం చేపట్టిన తర్వాత ఎర్రకోట నుంచి చేసిన ప్రసంగాన్ని ఆయన గుర్తు చేశారు. దేశంలో ఒకదానిపై దృష్టి సారించడం కంటే పని చేయాల్సిన అంశాలు చాలా ఉన్నాయని మంత్రి అన్నారు. బీఆర్ఎస్ ప్రభుత్వం అబద్ధాలతో నడుస్తోందని, ఎంఎంటీఎస్ రెండో దశ పూర్తి చేసేందుకు సంగీత నాటక అకాడమీ, సైన్స్ సిటీ కేంద్రం ఏర్పాటు, ఘట్ కేస‌ర్ నుంచి యాదాద్రి వరకు ఎంఎంటీఎస్ విస్తరణ, అఫ్జల్ గంజ్ నుంచి ఫలక్ నుమా వరకు మెట్రో విస్తరణకు స్థలం కోరుతూ సీఎం కేసీఆర్ కు పలుమార్లు లేఖలు రాస్తే.. ఎలాంటి స్పందన రాలేదని పేర్కొన్నారు.

రాష్ట్రంలో షో నడుపుతున్న బీఆర్ఎస్.. బీజేపీని బాధ్యతారాహిత్యంగా చూస్తోందన్నారు. 'ప్రశ్నాపత్రం లీకేజీకి కారకులైన వారిని శిక్షించాలని తెలంగాణ ప్రజలు డిమాండ్ చేస్తున్నారు. కానీ, కల్వకుంట్ల కుటుంబం తన బాధ్యత నుంచి తప్పించుకుంటోంది' అని మండిపడ్డారు. సికింద్రాబాద్ నుంచి త్రిపురాంతకం వరకు మరో వందేభారత్ రైలును త్వరలోనే ప్రారంభిస్తామన్నారు. మంచిర్యాల నుంచి విజయవాడ, వరంగల్ నుంచి కరీంనగర్, రూ.2,200 కోట్లతో నిర్మించనున్న గ్రీన్ ఫీల్డ్ హైవే ప్రారంభోత్సవానికి ప్రధానిని ఆహ్వానించామ‌న్నారు. 

ఇటీవల జరిగిన ఉపాధ్యాయ ఎమ్మెల్సీ ఎన్నికల్లో బీజేపీ అభ్యర్థి విజయం ప్రభుత్వ మార్పును కోరుతున్న రాష్ట్ర ప్రజల ఆకాంక్షలకు ఉపాధ్యాయ సంఘాల మద్దతును ప్రతిబింబిస్తోందని ఆయన పేర్కొన్నారు. పాలకవర్గాన్ని ఎదుర్కొని ప్రజలు ఆకాంక్షిస్తున్న మార్పును తీసుకురావడానికి ఆత్మవిశ్వాసంతో ముందుకు సాగేందుకు బీజేపీ కట్టుబడి ఉందని, పీఎం మిత్ర పథకం, తెలంగాణలో మెగా ఇంటిగ్రేటెడ్ టెక్స్ టైల్ పార్కు ఏర్పాటు వల్ల ప్రత్యక్షంగా లక్ష మందికి, పరోక్షంగా రెండు లక్షల మందికి ఉపాధి లభిస్తుందని మంత్రి వివరించారు. భారత్ ను గ్లోబల్ టెక్స్ టైల్ ఛాంపియన్ గా తీర్చిదిద్దడమే తమ లక్ష్యమని, దేశం నుంచి టెక్స్ టైల్ ఉత్పత్తులను ఎగుమతి చేసేందుకు భారత్ తో అరబ్ దేశాల మధ్య ఒప్పందం కుదిరిందన్నారు. రాజకీయాలకు అతీతంగా రాష్ట్ర ప్రభుత్వం ముందుకు వచ్చి సహకరించాలని కోరారు.

స్వప్నలోక్ కాంప్లెక్స్ అగ్నిప్రమాద ఘటన తీవ్రంగా క‌ల‌చివేసింద‌నీ, తాను ఆర్థిక సాయం కోసం పీఎంవో దృష్టికి తీసుకెళ్లానని కిషన్ రెడ్డి తెలిపారు. ఇప్పటి వరకు నాలుగు అగ్ని ప్రమాదాలు జరగ్గా 29 మంది చనిపోయారు. ఇలాంటి ప్రమాదాలు జరగకుండా రాష్ట్ర ప్రభుత్వం బాధ్యత తీసుకోవాలని పేర్కొన్నారు. తెలంగాణ రాష్ట్ర పబ్లిక్ సర్వీస్ కమిషన్ (టీఎస్ పీఎస్సీ) ప్రశ్నాపత్రాల లీకేజీని ప్రస్తావిస్తూ ఇది తెలంగాణ ప్రభుత్వ అసమర్థతకు నిదర్శనమన్నారు. ఏదైనా మంచి జరిగితే ఆ క్రెడిట్ ను తండ్రీకొడుకులు (సీఎం, ఐటీ మంత్రి) చెప్పుకుంటారు. కానీ ఏదైనా పొరపాటు జరిగితే తమ బాధ్యతను వదిలేసి, ఎలా బాధ్యులని ప్రశ్నించారంటూ మండిప‌డ్డారు.