నెమలి ఈకలు పీకి, చిత్ర హింసలు పెట్టి చంపిన యువకుడు.. వీడియో తీస్తూ పైశాచికానందం.. సోషల్ మీడియాలో వైరల్

 ఓ యువకుడు నెమలిని చిత్ర హింసలకు గురి చేస్తూ చంపాడు. ఈ దారుణాన్ని వీడియో తీస్తూ పైశాచికానందం పొందాడు. ఈ ఘటన మధ్యప్రదేశ్ లోని కట్నీలో వెలుగులోకి వచ్చింది. దీనిపై పోలీసులు, ఫారెస్టు అధికారులు దర్యాప్తు ప్రారంభించారు. 

మధ్యప్రదేశ్‌లోని కట్నీలో హృదయ విదారక ఘటన వెలుగులోకి వచ్చింది. జాతీయ పక్షి నెమలిని ఓ యువకుడు చిత్ర హింసలకు గురి చేసి చంపేశాడు. అది ఎగురకుండా దాని ఈకలు పీకేశాడు. ఈ చర్యనంతా అతడు వీడియో కూడా తీశాడు. ఆ యువకుడి పక్కన ఓ బాలిక కూడా ఉంది. దీనికి సంబంధించిన వీడియో సోషల్ మీడియాలో వైరల్ అవుతోంది. అధికారులు ఈ ఘటనపై దర్యాప్తు చేపట్టారు.

వివరాలు ఇలా ఉన్నాయి. మధ్యప్రదేశ్ రాష్ట్రంలోని కట్నీ లోని రితి పోలీస్ స్టేషన్ పరిధిలోని అటవీ ప్రాంతంలో అతుల్ అనే యువకుడు ఓ నెమలిపై తన క్రూరత్వాన్ని ప్రవర్శించాడు. సోషల్ మీడియాలో వైరల్ అవుతున్న వీడియే ప్రకారం.. కనికరం లేకుండా దాని ఈకలు పీకాడు. ఈ సమయంలో అతడి పక్కన ఓ బాలిక కూడా ఉంది. ఈకలు పీకుతున్న సమయంలో పక్క నుంచి హిందీ పాటు ప్లే అవుతున్నాయి. ఈకలు పీకుతూ, నవ్వుతూ ప్లే అవుతున్న పాటల్లో వీరు కూడా శ్రుతి కలిపారు.

అతుల్ పెట్టిన చిత్రహింసలు తట్టుకోలేక పాపం ఆ నెమలి మరణించింది. అయితే ఈ వీడియో బయటకు రావడంతో సోషల్ మీడియాలో వైరల్ అయ్యింది. సోషల్ మీడియాలో అతడిపై నెటిజన్లు విరుచుకుపడ్డారు. ఈ వీడియో ఫారెస్టు అధికారులకు చేరడంతో ఈ ఘటనపై దర్యాప్తు చేపట్టారు. నిందితుడిపై కేసు నమోదు చేశారు.

నెమలిని చిత్రహింసలకు గురి చేసి చంపిన విషయం తమ దృష్టికి వచ్చిందని కట్నీ జిల్లా డీఎఫ్‌ఓ గౌరవ్ శర్మ తెలిపారు. ‘‘ఈ విజువల్స్‌ను గుజరాత్‌కు చెందిన ఎన్‌జీవో మాకు పంపింది. ఈ వీడియోలో కనిపించిన మోటర్‌బైక్ రిజిస్ట్రేషన్ నంబర్ ఆధారంగా నిందితుడిని గుర్తించాం. అతడు రితి ప్రాంతానికి చెందినవాడు. ఈ ఘటనపై అటవీశాఖ, జిల్లా పోలీసులు సంయుక్తంగా విచారణ ప్రారంభించినట్లు తెలిపారు. భారతీయ వన్యప్రాణి (రక్షణ) చట్టం 1972 కింద కేసు నమోదు చేశామని, నిందితులను పట్టుకునేందుకు గాలింపు చర్యలు చేపడుతున్నామని పేర్కొన్నారు.