యూకేలో భారత వ్యతిరేక శక్తులపై కఠిన చర్యలు తీసుకోండి - రిషి సునక్ తో ప్రధాని నరేంద్ర మోడీ

యూకేలో భారత వ్యతిరేక శక్తులపై చర్యలు తీసుకోవాలని ప్రధాని నరేంద్ర మోడీ ఆ దేశ ప్రధాని రిషి సునక్ ను కోరారు. గురువారం ఇరువురు నేతలు పలు ద్వైపాక్షిక అంశాలపై చర్చలు జరిపారు. ఈ సందర్భంగా ఇద్దరు నేతలు ఫోన్ లో సంభాషించారు.

పలు ద్వైపాక్షిక అంశాలపై ముఖ్యంగా వాణిజ్య, ఆర్థిక రంగాల్లో పురోగతిని యూకే ప్రధాని రిషి సునక్, భారత్ ప్రధాని నరేంద్ర మోడీ గురువారం సమీక్షించారు. ఇటీవలి అత్యున్నత స్థాయి ఎక్స్ఛేంజీలు వాణిజ్యం, ఆర్థిక రంగాలలో పెరుగుతున్న సహకారం పట్ల వారు సంతృప్తిని వ్యక్తం చేశారు. ఇరు దేశాల మధ్య పరస్పర ప్రయోజనకరమైన స్వేచ్ఛా వాణిజ్య ఒప్పందాన్ని త్వరగా ముగించాల్సిన అవసరాన్ని ఇరువురు నేతలు అంగీకరించారు.

కాగా.. ఈ సందర్భంగా ప్రధాన మంత్రి మోడీ యునైటెడ్ కింగ్‌డమ్‌లోని భారతీయ దౌత్య సంస్థల భద్రత అంశాన్ని లేవనెత్తారు. భారతదేశ వ్యతిరేక శక్తులపై కఠిన చర్యలు తీసుకోవాలని పిలుపునిచ్చారు. భారత హైకమిషన్‌పై దాడి పూర్తిగా ఆమోదయోగ్యం కాదని యునైటెడ్ కింగ్‌డమ్ భావిస్తున్నట్లు రిషి సునక్ ప్రధాని మోడీకి తెలియజేశారు. భారత కమిషన్, సిబ్బందికి పూర్తి భద్రత కల్పిస్తామని ఆయన హామీ ఇచ్చారు.

ఆర్థిక నేరగాళ్లు యునైటెడ్ కింగ్‌డమ్‌లో ఆశ్రయం పొందుతున్న అంశాన్ని కూడా ప్రధాని మోడీ లేవనెత్తారు. పారిపోయిన ఈ వ్యక్తులను తిరిగి భారత న్యాయవ్యవస్థ ముందు హాజరుపరిచేందుకు వీలుగా కేసుల పురోగతిపై సమాచారాన్ని ఆయన కోరారు. సెప్టెంబరు 2023లో జరగనున్న జి20 సదస్సుకు హాజరుకావాలని ప్రధాని మోదీ ప్రధానమంత్రి సునక్‌ను ఆహ్వానించారు. జీ20కి భారతదేశం అధ్యక్షత వహించిన సమయంలో సాధించిన పురోగతిని ప్రధాన మంత్రి సునక్ ప్రశంసించారు. భారతదేశ వివిధ కార్యక్రమాలకు, వాటి విజయానికి యునైటెడ్ కింగ్‌డమ్ పూర్తి మద్దతును పునరుద్ఘాటించారు.

బైసాకి సందర్భంగా యునైటెడ్ కింగ్‌డమ్‌లోని ప్రధాన మంత్రి సునాక్ మరియు భారతీయ సమాజానికి ప్రధాన మంత్రి శుభాకాంక్షలు తెలియజేశారు. ఇరువురు నేతలు పరస్పరం టచ్‌లో ఉండేందుకు అంగీకరించారు.