హిమాచ‌ల్ ప్ర‌దేశ్ ను ముంచెత్తిన ఆక‌స్మిక వ‌ర‌ద‌లు.. 15 కిలో మీట‌ర్ల మేర ట్రాఫిక్ జామ్..

Dharamshala: ఉత్తర భారత కొండ ప్రాంతమైన హిమాచల్ ప్రదేశ్ లో రెండు రోజులుగా ఎడతెరిపి లేకుండా వర్షాలు కురుస్తున్నాయి. సోమవారం ఉదయం హిమాచల్ ప్రదేశ్ లోని మండి జిల్లాలోని బాగిపుల్ ప్రాంతంలో ఆకస్మిక వరదల సంభ‌వించాయి. వినాశకరమైన ఆకస్మిక వరదలు, అత్యంత బలమైన అలల ప్రవాహాల్లో అనేక ఇండ్లు, వాహ‌నాలు కొట్టుకుపోయాయి.  

Himachal Pradesh - flash floods: భారీ వర్షాల కారణంగా హిమాచల్ ప్రదేశ్ లోని చండీగఢ్-మనాలి హైవేపై సోమవారం ఉదయం కొండచరియలు విరిగిపడి మండీ- కులు మధ్య రాక‌పోక‌లు నిలిచిపోయాయి. ఈ ఘటనతో మండీలోని ఔట్ సమీపంలో వందలాది మంది ప్రయాణికులు చిక్కుకుపోయారని అధికారులు తెలిపారు. దాదాపు 15 కిలో మీట‌ర్ల‌కు పైగా ట్రాఫిక్ జామ్ ఏర్ప‌డింది. వీరిలో దాదాపు 200 మందికి పైగా ప‌ర్యాట‌కులు ఉన్నారు. అయితే, ప్ర‌స్తుత మార్గంలో ఎలాంటి హోట‌ళ్లు గానీ, నివాస‌యోగ్య ప్రాంతాలు గాని లేక‌పోవ‌డంతో తీవ్ర ఇబ్బందులు ప‌డుతున్నారు. ఎంత స‌మ‌యం వ‌ర‌కు ఈ ప‌రిస్థితులు ఉంటాయోన‌ని ఆందోళ‌న వ్య‌క్తం చేస్తున్నారు.

భారీ వర్షాల కారణంగా హైవే వెంబడి పలు చోట్ల కొండచరియలు విరిగిపడటంతో ఆదివారం సాయంత్రం నుంచి రహదారులు మూసుకుపోయాయి. అయితే కొండచరియలు విరిగిపడిన శిథిలాలను తొలగించే చర్యలు కొనసాగుతున్నాయి. మార్గమధ్యంలో భారీ బండరాళ్లను పేల్చేందుకు పేలుడు పదార్థాలను వినియోగిస్తున్నట్లు అధికారులు తెలిపారు. హిమాచల్ ప్రదేశ్ లో ఎడతెరిపి లేకుండా కురుస్తున్న వర్షాలకు కొండచరియలు విరిగిపడటంతో నిలిచిపోయిన చండీగఢ్-మనాలీ హైవేను తొలగించేందుకు ప్రయాణికులు ఎదురుచూస్తున్నార‌ని సంబంధిత వ‌ర్గాలు తెలిపాయి. కనీసం ఏడెనిమిది గంటల తర్వాత ఈ రహదారిని రాకపోకలకు తెరుస్తామని అధికారులు తెలిపారు.

పండోహ్-కులు మార్గంలో ఔట్ ప్రాంతానికి ఇరువైపులా పెద్ద సంఖ్యలో వాహనాలు నిలిచిపోవడంతో నిన్న సాయంత్రం నుంచి ప్రయాణికులు ఇబ్బందులు పడుతున్నారు. నిన్న సాయంత్రం నుంచి రోడ్డును మూసివేయడంతో ట్రాఫిక్ జామ్ అయిందనీ, ఆరు మైళ్ల వద్ద రోడ్లకు ఇరువైపులా పెద్ద సంఖ్యలో వాహనాలు నిలిచిపోయాయని మీడియా నివేదిక‌లు పేర్కొంటున్నాయి, పలుమార్లు కొండచరియలు విరిగిపడిన నేపథ్యంలో అధికారులు ప్రయాణికులను ఆపి వెనుదిరిగారు. కానీ, 15 కిలోమీటర్ల పొడవైన ట్రాఫిక్ జామ్ వల్ల వారు తిరిగి వెళ్లడం కూడా కష్టంగా మారింది.

హైవేపై కొండచరియలు విరిగిపడటం తప్ప మరే సమాచారం తమకు తెలియదని స్కాట్లాండ్ కు చెందిన ఓ పర్యాటకుడు తెలిపారు. 'మున్ముందు కొండచరియలు విరిగిపడే అవకాశం ఉందని అధికార యంత్రాంగం చెబుతోంది. నాకు పెద్దగా సమాచారం లేదు, మేము ఉదయం 5 గంటల నుండి ఇక్కడ ఉన్నాము" అని పర్యాటకుడు వార్తా సంస్థ ఏఎన్ఐతో చెప్పారు. ఎడతెరిపి లేకుండా కురుస్తున్న వర్షాలతో బియాస్ నదిలో నీటిమట్టం పెరిగింది. మేఘావృతంతో సిమ్లా సహా ఇతర ప్రాంతాల్లోనూ భారీ వర్షం కురిసింది. హిమాచల్ ప్రదేశ్ కు రానున్న 24 గంటల్లో ఆకస్మిక వరద హెచ్చరికతో పాటు మరో ఐదు రోజుల పాటు వాతావరణ హెచ్చరికను భారత వాతావరణ శాఖ (ఐఎండీ) ఆదివారం జారీ చేసింది. జూన్ 25, 26 తేదీల్లో మైదాన ప్రాంతాలు, లోతట్టు, మధ్య కొండల్లో భారీ వర్షాలు, ఉరుములు, మెరుపులతో కూడిన వర్షాలు కురిసే అవకాశం ఉంది. కాంగ్రా, మండి, సోలన్ జిల్లాల్లో ఆకస్మిక వరదలు సంభవించే అవకాశం ఉందని, ట్రాఫిక్ రద్దీ, తక్కువ దృశ్యమానత, విద్యుత్ సరఫరాలో అంతరాయం ఏర్పడుతుందని ఐఎండీ తెలిపింది.