Strawberry Moon: నేడు ఆకాశంలో అద్భుత దృశ్యం.. భూమికి అత్యంత‌ చేరువ‌గా చంద్రుడు

Strawberry Moon:  స్ట్రాబెర్రీ చంద్రుడిని రోజ్ మూన్, హాట్ మూన్, హనీ మూన్ లేదా మీడ్ మూన్ అని కూడా అంటారు. ఈ సమయంలో కనిపించే సూపర్‌మూన్‌కు స్ట్రాబెర్రీ పికింగ్ సీజన్ నుండి పేరు వచ్చింది.  

Strawberry Moon: ప్రపంచవ్యాప్తంగా జూన్ 14 న  ఆకాశంలో అద్భుత దృశ్యం ఆవిషృతం కాబోతుంది. మంగళవారం రోజున‌ పౌర్ణమి చంద్రుడు విభిన్న రూపంలో కనిపించబోతున్నాడు. దీన్నే స్ట్రాబెర్రీ మూన్ అంటారు. చంద్రుడు భూమి చుట్టూ దాని కక్ష్యలో దాని సమీప బిందువులో ఉంటాడు, దీనిని పెరిజీ అని పిలుస్తారు, ఇది "సూపర్‌మూన్" లాగా కనిపిస్తుంది.

మంగ‌ళ‌వారం రోజున చంద్రుడు భూమికి అత్యంత దగ్గరగా వస్తుండ‌టంలో సూపర్‌మూన్‌గా క‌నిపించ‌నున్నాడు. ఈ సూపర్‌మూన్ భూమిపై ఉన్న వ్యక్తులకు చాలా ప్రకాశవంతంగా, పెద్దదిగా కనిపిస్తుంది, ఆకాశం స్పష్టంగా ఉంటే మీరు మంగళవారం ఈ అందమైన దృశ్యాన్ని చూడగలరు. 
నిపుణుల అభిప్రాయం ప్రకారం.. జూన్ 14 సాయంత్రం 5:22 గంటలకు.. చంద్రుడు గరిష్ట స్థాయికి చేరుకుంటాడు. 

స్ట్రాబెర్రీ మూన్(Strawberry Moon) అంటే ఏమిటి? 

స్ట్రాబెర్రీ మూన్ అనగానే.. స్ట్రాబెర్రీ రంగులోనో లేదా పింక్ రంగులోనో క‌నిపించ‌డం కాదు. అమెరికన్ల వ‌ల్ల ఈ పేరు వ‌చ్చింది. ది ఓల్డ్ ఫార్మర్స్ అల్మానాక్ ప్రకారం.. ఈ సమయంలో కనిపించే సూపర్‌మూన్‌కు స్ట్రాబెర్రీ పికింగ్ సీజన్ నుండి పేరు వచ్చింది. ఎందుకంటే అడవి స్ట్రాబెర్రీలు పండించడానికి సిద్ధంగా ఉన్న నెల జూన్. దీని పేరు మీదుగానే.. పౌర్ణమి చంద్రునికి ఆ పేరు వ‌చ్చింది. స్ట్రాబెర్రీ చంద్రుడిని రోజ్ మూన్, హాట్ మూన్, హనీ మూన్ లేదా మీడ్ మూన్ అని కూడా అంటారు.  తేనె కోతకు సిద్ధంగా ఉన్న సమయంలో వస్తుంది కాబట్టి దీనిని హనీ మూన్ అని కూడా అంటారు.

స్ట్రాబెర్రీ చంద్రుడు కనిపించిన రోజున, భారతదేశంలోని ఉత్తర, పశ్చిమ రాష్ట్రాలలోని హిందువులు వట్ పూర్ణిమ అనే పండుగను జరుపుకుంటారు. నేడు క‌నిపించే చంద్రుడిని  "సూపర్ మూన్" అని కూడా పిలుస్తారు, ఎందుకంటే..  చంద్రుడు పెరిజీలో ఉన్నాడు. ఇది భూమికి దగ్గరగా ఉన్న దాని కక్ష్యలో ఒక బిందువునే పెరిజీ అన్నారు. 

ఈ సంవత్సరం..  స్ట్రాబెర్రీ మూన్ జూన్ 14న ఉదయం 7:52 గంటలకు ఆకాశంలో కనిపిస్తుంది. అయితే, చంద్రుడు ఒక రోజు ముందు, తరువాత పూర్తిగా కనిపించనున్నాడు. అంటే జూన్ 13, జూన్ 15 న చంద్రుడు పూర్తిగా కనిపిస్తాడు. భార‌త కాల‌మానం ప్ర‌కారం .. చంద్రుడు సాయంత్రం 5:22 గంటలకు గరిష్ట స్థాయికి చేరుకుంటాడు. కానీ ఒక రాత్రి ముందు, తర్వాత సమానంగా అందంగా కనిపిస్తాడు. ప్రజలు బైనాక్యులర్‌లను ఉపయోగించి సున్నితమైన స్ట్రాబెర్రీ మూన్‌ను గమనించవచ్చు.

అలాగే.. ఈ నెల 24 న మ‌రో  ఆకాశంలో అద్భుత దృశ్యం కనువిందు చేయనున్నది. సౌర కుటుంబంలోని  ఐదు గ్రహాలు ఒకే సరళ రేఖపైకి రాబోతున్నాయి. ఈ ఖగోళ అద్భుతం ఈ నెల 24న ఆవిష్కృతం కానున్నది. బుధుడు, శుక్రుడు, అంగారకుడు, బృహస్పతి, శని గ్రహాలు ఒకే వరుసలో ద‌ర్శ‌నం ఇవ్వ‌నున్నాయి. అయితే, ఈ అరుదైన దృశ్యాన్ని టెలిస్కోప్‌ల ద్వారా చూడొచ్చని, తెల్లవారు జామున ఐదుగ్రహాలు ఒకదాని తర్వాత ఒకటి కనిపించనున్నాయి. ఈ అరుదైన దృశ్యం 18 సంవత్సరాల తర్వాత కనిపించనున్నది. ఇంతకు ముందు చివరి సారిగా 2004 డిసెంబర్‌లో కనిపించిందని ఖ‌గోళ శాస్త్ర‌వేత్త‌లు చెప్పుతున్నారు.