ప్రైవేట్ ఆస్పత్రిలో వీర్యం తారుమారు.. రూ. 1.5కోట్ల జరిమానా విధింపు..

ఓ ఆస్పత్రి కృత్రిమ పద్ధతిలో సంతానం కోసం ప్రయత్నించిన దంపతులకు వీర్యమార్పిడి తీవ్ర మానసికవేదనను మిగిల్చింది. దీంతో వీరికి రూ. 1.5 కోట్ల జరిమానా విధించాలని ఎన్ సీడిఆర్సీ తెలిపింది. 

ఢిల్లీ : ఎన్ సీడిఆర్సీ దేశ రాజధాని ఢిల్లీలోని ఓ ప్రైవేట్ ఆసుపత్రికి రూ.1.5 కోట్ల భారీ జరిమానా విధించింది. జాతీయ వినియోగదారుల వివాదాల పరిష్కార కమిషన్ ఈ మేరకు ఇంత భారీ మొత్తంలో జరిమానా విధించడానికి కారణం ‘వీర్య మార్పిడి’. కృత్రిమ గర్వధారణ కోసం ఓ మహిళ ఆసుపత్రికి వచ్చింది. అయితే ట్రీట్మెంట్ చేస్తున్న సమయంలో ఆమె భర్త వీర్యానికి బదులు మరొకరి వీర్యాన్ని ఆసుపత్రి వర్గాలు తప్పుగా ఎక్కించారు. 

ఏఆర్టీ విధానంలో వారు సంతానం కోసం ప్రయత్నిస్తున్నారు.  దీనికోసమే ఆ ప్రైవేట్ ఆసుపత్రిలో చేరారు. ఈ ప్రక్రియ విజయవంతంగా పూర్తి అవడంతో 2009 జూన్ లో ఆ దంపతులకు కవల పిల్లలు జన్మించారు. పుట్టిన తర్వాత శిశువులకు డిఎన్ఏ పరీక్షలు చేయించారు. ఆ పరీక్షల్లో వారి తండ్రి ఆ మహిళ భర్త కాదని తేలింది. మరొకరి వీర్యంతో వారు పుట్టినట్లుగా  నిర్ధారణ అయింది. దీంతో ఆ దంపతులు తీవ్ర మనోవేదనకు గురయ్యారు.

ఆస్పత్రి చేసిన పొరపాటుకు తమకు న్యాయం చేయాలంటూ  కోరారు. ఆస్పత్రి  కలిగించిన మానసిక వేదనకు రూ.2కోట్ల నష్టపరిహారం చెల్లించాలని డిమాండ్ చేశారు. ఈ మేరకు ఎన్సిడిఆర్సిని ఆశ్రయించారు దంపతులు. ఈ కేసు మీద ఎన్సిడిఆర్సీ సుదీర్ఘ విచారణ జరిపింది. ఈ విచారణ అనంతరం దంపతులకు అనుకూలంగా కమిషన్ ఉత్తర్వులు జారీ చేసింది.

వారు కోరినట్లుగా దంపతులకు రూ.1.5 కోట్ల నష్టపరిహారం చెల్లించాలని ఆ ప్రైవేట్ ఆస్పత్రికి కమిషన్ ఆదేశించింది, అంతేకాదు అన్ని ప్రైవేట్ హాస్పిటల్లో కృత్రిమ గర్భధారణ వల్ల జన్మించిన ప్రతి శిశువు డిఎన్ఏ ప్రొఫైల్ ను తయారు చేసి ఇచ్చేలా.. నిబంధనలు అమలు చేయాల్సిన అవసరం ఉందని కమిషన్ ఈ సందర్భంగా అభిప్రాయపడింది.