కరోనా దారుణం : నాన్నను మీరే తగలబెట్టండి.. ఆస్తి డాక్యుమెంట్లు నాకు పంపండి !

కరోనా మానవత్వాన్ని మంట గలుపుతోంది. కారుణ్యం అనే మాటకు అర్థాన్ని తుడిపేస్తోంది. అనుబంధాలకు అంతిమ గీతం పాడుతోంది. సొంత కుటుంబ సభ్యులు చనిపోతే కనీసం చావుకు వెళ్లలేని దౌర్భాగ్య పరిస్థితికి దిగజార్చింది.

ఆత్మీయుల చివరి చూపుకు కూడా నోచుకోలేక.. ఆ దు:ఖాన్ని దిగమింగుకోలేక అనేకమంది మానసికక్షోభ అనుభవిస్తున్నారు. ఇలాంటి క్రమంలో తండ్రి కరోనాతో చనిపోతే.. ఓ కొడుకు అమానుషంగా ప్రవర్తించాడు

తండ్రి చనిపోయాడని సమాచారం ఇచ్చిన వారికి.. అతని మృతదేహాన్ని మీరే తగలబెట్టుకోండి.. కాకపోతే అతని దగ్గరున్న రూ.6 లక్షల విలువైన డబ్బులు, డాక్యుమెంట్లను తెచ్చి ఇవ్వండంటూ ఒక కుమారుడు చాలా అసహ్యంగా మాట్లాడాడు. 

ఈ ఘటన కర్నాటక లోని మైసూరు, హెబ్బాళలో జరిగింది. అక్కడి స్థానిక సూర్య బేకరి వద్దనున్న ఓ ఇంట్లో ఓ వృద్ధుడు కరోనాతో మరణించాడు. ఆ వృద్ధుడి కొడుకు కువెంపు నగర శాంతి సాగర్ కాంప్లెక్స్ దగ్గర్లో నివసిస్తున్నాడు. 

తండ్రి మృతి సంగతి తెలిసిన కొడుకు.. స్థానిక కార్పొరేటర్‌ కేవీ శ్రీధర్‌కు ఫోన్ చేసి తన తండ్రి అంత్యక్రియలను మీరే పూర్తి చేయాలని, కాకపోతే అతని దగ్గరున్న రూ. 6 లక్షల డబ్బు, ఆస్తి పత్రాలను మాత్రం తనకు తెచ్చి ఇవ్వాలని పరుషంగా మాట్లాడాడు. 

ఆ విధానానికి కార్పొరేటర్ షాక్ అయ్యాడు. తరువాత మున్సిపాలిటీ సిబ్బందితో తానే దగ్గరుండి అంత్యక్రియలు పూర్తిచేయించాడు. కొడుకు నిర్వాకం గురించి స్థానికంగా అందరూ మండి పడుతున్నారు.