మహారాష్ట్రలో ఘోర రోడ్డు ప్రమాదం.. బస్సు బోల్తా పడటంతో ఇద్దరు మృతి.. 30 మందికి గాయాలు

మహారాష్ట్రలో సింధుదుర్గ్ జిల్లాలో ఓ బస్సు బోల్తా పడటంతో ఇద్దరు మరణించారు. 30 మందికి గాయాలయ్యాయి. క్షతగాత్రులను స్థానికులు హాస్పిటల్ కు తరలించారు. 

మహారాష్ట్రలో ఘోర రోడ్డు ప్రమాదం జరిగింది. సింధుదుర్గ్ జిల్లాలో ఓ బస్సు బోల్తా పడింది. ఈ ఘటనలో ఇద్దరు మృతి చెందారు. మరో 30 మంది గాయాలు అయ్యాయి. రాష్ట్ర రాజధాని ముంబైకి 480 కిలో మీటర్ల దూరంలో ఉన్న కంకవ్లీలోని గాడ్ నది వంతెన సమీపంలోని ఓ మలుపు వద్ద డ్రైవర్ కంట్రోల్ కోల్పోయాడు. దీంతో బస్సు బోల్తా పడింది.

ఈ ఘటన ఉదయం 5.30 గంటలకు చోటు చేసుకుందని ఓ అధికారి తెలిపారు. ఈ ప్రమాదానికి గురైన లగ్జరీ బస్సు 36 మంది ప్రయాణికులతో పూణె నుంచి గోవా వెళ్తోందని పేర్కొన్నారు. ఈ ప్రమాదంలో ఇద్దరు వ్యక్తులు మృతి చెందారు. క్షతగాత్రులను చికిత్స నిమిత్తం కంకవ్లిలోని సివిల్ ఆసుపత్రికి తరలించారు.

ముంబై-గోవా హైవేపై కూడా ఇలాంటి ప్రమాదమే చోటు చేసుకుంది. ఈ ఘటనలో ఓ చిన్నారితో పాటు 9 మంది మరణించారు. కారు, ట్రక్కు ఎదురెదురుగా వేగంగా ఢీకొనడంతో కారులో ఉన్న వారందరూ మరణించారు. అదే సమయంలో లారీలో కూర్చున్న వారు కూడా ప్రాణాలు కోల్పోయారు. మరొకరు తీవ్ర గాయాలతో ప్రాణాలతో బయపడ్డారు.