డిల్లీలో మరో దారుణం...ఎనిమిదేళ్ల చిన్నారిపై అత్యాచారయత్నం

దేశ రాజధాని డిల్లీలో రోజురోజుకు అమ్మాయిలు, చిన్నారులపై అఘాయిత్యాలు పెరిగిపోతున్నాయి. నిర్భయ చట్టాన్ని తీసుకువచ్చిన తర్వాత ఈ అఘాయిత్యాలు ఆగుతాయని భావించారు. కానీ కామాంధుల ఆగడాలకు ఈ చట్టం ఆపలేకపోతోంది. మరీ ముఖ్యంగా డిల్లీ వంటి మెట్రోపాలిటిన్ నగరాల్లో యువతులపై, చిన్నారులపై అత్యాచార ఘటనలు పెరిగిపోతున్నాయి. 

తాజాగా ఓ ఎనిమిదేళ్ల చిన్నారిపై పక్కింట్లో వుండే 15 ఏళ్ల యువకుడు అత్యాచారయత్నానికి పాల్పడ్డ సంఘటన డిల్లీలో వెలుగుచేసింది. ఈ ఘటనపై బాధిత చిన్నారి తల్లిదండ్రులు పోలీసులకు పిర్యాదు చేశారు.  

ఈ అఘాయిత్యంపై నగర డిప్యూటి పోలీస్ కమీషనర్ అస్లాం ఖాన్ తెలిపిన వివరాలిలా ఉన్నాయి. సోమవారం సాయంత్రం నార్త్ డిల్లీ స్వరూప్ నగర్ లోని ఓ ఇంట్లో ఎనిమిదేళ్ల చిన్నారి ఒంటరిగా ఉంది. ఈ విషయాన్ని గమనించిన పక్కింట్లోని యువకుడు చిన్నారిపై అత్యాచార యత్నం చేశాడు. అయితే చిన్నారి అతడిని ప్రతిఘటించింది. దీంతో ఆ యువకుడు అక్కడి నుండి పరారయ్యాడు. 

తల్లిదండ్రులు ఇంటికి రాగానే చిన్నారి జరిగిన విషయాన్ని తల్లిదండ్రులకు తెలిపింది. దీంతో వారు పోలీసులకు ఫిర్యాదు చేశారు. వెంటనే నిందితున్ని అదుపులోకి తీసుకుని ఎఫ్ఐఆర్ నమోదు చేసినట్లు పోలీసులు తెలిపారు. 

మరిన్ని వార్తలు