దేశాన్ని అవినీతి రహితంగా మార్చడమే సీబీఐ ప్రధాన బాధ్యత: ప్రధాని మోదీ

సెంట్రల్ బ్యూరో ఆఫ్ ఇన్వెస్టిగేషన్‌ సామాన్యులకు ఆశ, బలాన్ని నింపిందని ప్రధాని నరేంద్ర మోదీ అన్నారు. సీబీఐ వంటి వృత్తిపరమైన, సమర్థవంతమైన సంస్థలు లేకుండా భారతదేశం ముందుకు సాగదని పేర్కొన్నారు. బ్యాంకు మోసాల నుంచి వన్యప్రాణులకు సంబంధించిన మోసాల వరకు సీబీఐ పని పరిధి అనేక రెట్లు పెరిగిందని అన్నారు. అయితే సీబీఐ ప్రధాన బాధ్యత దేశాన్ని అవినీతి రహితంగా మార్చడమని పేర్కొన్నారు. సీబీఐ డైమండ్ జూబ్లీ వేడుకల్లో పాల్గొన్న ప్రధాని  మోదీ మాట్లాడుతూ.. ‘‘మీరు(సీబీఐ) దేశ ప్రీమియం ఇన్వెస్టిగేషన్ ఏజెన్సీగా 60 సంవత్సరాల ప్రయాణాన్ని పూర్తి చేసారు. ఈ 6 దశాబ్దాలు ఖచ్చితంగా విజయాలతో నిండి ఉన్నాయి. సీబీఐ తన పనితనం, నైపుణ్యంతో సామాన్యులకు నమ్మకాన్ని కల్పించింది. 

సీబీఐ న్యాయం కోసం బ్రాండ్‌గా అవతరించినందున సీబీఐ విచారణను డిమాండ్ చేయడానికి ప్రజలు నిరసనలు చేపడుతున్నారు. న్యాయానికి సంబంధించిన బ్రాండ్‌గా సీబీఐ అందరి నోళ్లలో నానుతోంది. అవినీతి నుంచి దేశాన్ని విముక్తి చేయడమే సీబీఐ ప్రధాన బాధ్యత. అవినీతి సాధారణ నేరం కాదు. అవినీతి పేదల హక్కులను హరించి అనేక నేరాలకు జన్మనిస్తుంది. ప్రజాస్వామ్యం, న్యాయ మార్గంలో అవినీతి అతిపెద్ద అడ్డంకి.

అవినీతి ఉన్నచోట యువతకు సరైన అవకాశాలు రావడం లేదు. అక్కడ ఒక ప్రత్యేక పర్యావరణ వ్యవస్థ మాత్రమే వర్ధిల్లుతుంది. ప్రతిభకు అవినీతి అతిపెద్ద శత్రువు, ఇక్కడి నుంచే బంధుప్రీతి, కుటుంబ వాదం బలపడతాయి. బంధుప్రీతి, కుటుంబ వాదం పెరిగితే సమాజం, దేశం బలం తగ్గుతుంది. ఎప్పుడైతే దేశం సామర్థ్యం తక్కువగా ఉంటుందో అప్పుడు అభివృద్ధి దెబ్బతింటుంది.

దశాబ్దాలుగా సాగుతున్న దేశ ఖజానాను దోచుకోవడానికి అవినీతిపరులు మరో మార్గం వేశారు. దీంతో ప్రభుత్వ పథకాల లబ్ధిదారుల నుంచి దోచుకున్నారు. నేడు జన్‌ధన్‌, ఆధార్‌, మొబైల్‌ అనే త్రిమూర్తులతో ప్రతి లబ్ధిదారుడు తన పూర్తి హక్కును పొందుతున్నారు’’ అని  పేర్కొన్నారు. 

‘‘మీరు ఎవరికి వ్యతిరేకంగా చర్య తీసుకుంటున్నారో వారు చాలా శక్తివంతులని, వారు సంవత్సరాలుగా ప్రభుత్వం, వ్యవస్థలో భాగంగా ఉన్నారని నాకు తెలుసు. ఈ రోజు కూడా వారు కొన్ని రాష్ట్రాల్లో అధికారంలో ఉన్నారు. కానీ మీరు (సీబీఐ) మీ పనిపై దృష్టి పెట్టాలి, అవినీతిపరులను వదిలిపెట్టకూడదు’’ అని మోదీ అన్నారు.