మధ్యప్రదేశ్‌లో భన్వర్లాల్ జైన్‌ను మొహమ్మద్‌గా భావించి కొందరు దుండగులు మూక దాడి చేసి చంపేశారు. పేరు మొహమ్మద్ కదూ అంటూ బీజేపీ మాజీ కార్పొరేటర్ భర్త దాడి చేశాడు. ఆధార్ కార్డు చూపించాలంటూ పిడిగుద్దులు కురిపించాడు. ఆ వృద్ధుడు తర్వాత విగతజీవుడై కనిపించాడు.
భోపాల్: మధ్యప్రదేశ్‌లో దారుణం జరిగింది. ఓ వ్యక్తిని పేరు చెప్పాలని పట్టుబడుతూ ఓ మూక దాడి చేసింది. ఆధార్ కార్డు చూపించాలని చితకబాదింది. ఆ వ్యక్తి మానసిక స్థిమితం లేనివాడని తెలిసింది. రాజస్తాన్‌లో ఓ మతపరమైన కార్యక్రమానికి హాజరు కావడానికి మధ్యప్రదేశ్ నుంచి వెళ్లి మల్లీ ఇంటికి రాలేదు. మానసిక స్థిమితం లేని ఆ వ్యక్తి తర్వాత మిస్ అయ్యాడు. ఈ వ్యక్తిని బీజేపీ మాజీ కార్పొరేటర్ భర్త దాడి చేస్తున్న వీడియో సోషల్ మీడియాలో వైరల్ అయింది. ఈ ఘటన మధ్యప్రదేశ్ నీమచ్ జిల్లాలో చోటుచేసుకుంది.
మధ్యప్రదేశ్ రత్లాం జిల్లాలోని సార్సికి చెందిన 65 ఏళ్ల భన్వర్లాల్ జైన్ రాజస్తాన్‌లో జరిగే ఓ ఆధ్యాత్మిక కార్యక్రమానికి వెళ్లి అదృశ్యమయ్యాడు. మళ్లీ ఇంటికి తిరిగిరాలేదు. ఆయన మానసికంగా అనారోగ్యంగా ఉన్నాడు. ఈ వ్యక్తి ఓ బెంచీపై కూర్చుని ఉండగా బీజేపీ మాజీ కార్పొరేటర్ భర్త దినేశ్ కుష్వాహా ఆయనపై దాడి చేయడం ప్రారంభించినట్టు వీడియో చూపిస్తున్నది.
నీ పేరు మహమ్మద్ కదూ.. అంటూ మళ్లీ మళ్లీ అడుగుతూ ఆ వృద్ధుడిపై దాడి చేశాడు. ఆ వృద్ధుడు సమాధానం చెప్పడానికి ఆపసోపాలు పడ్డాడు. కానీ, సమాధానం ఇవ్వలేకపోయాడు. దీంతో నీ పేరు సరిగా చెప్పు. నీ ఆధార్ కార్డు తియ్ అంటూ బెదిరించాడు. ఆధార్ కార్డు తీయమని చెబుతూ మళ్లీ వరుసగా ఆ వృద్ధుడిపై దాడి చేశాడు. ఈ వీడియో వైరల్ అయింది. అయితే, ఈ వీడియోలో దాడికి గురైన భన్వర్లాల్ జైన్ తర్వాత విగతజీవుడై కనిపించాడు.
| MP: Bhanwarlal Jain mistaken for 'Mohammed', beaten to death by ex-BJP corporator's husband pic.twitter.com/CxOENkhV82
— Free Press Journal (@fpjindia)నీమచ్ జిల్లా మానస పోలీసు స్టేషన్ హౌజ్ ఆఫీసర్ కన్హయ్య లాల్ దంగి మాట్లాడుతూ, మానసిక వైకల్యం గల భన్వర్లాల్ ఓ వర్గానికి చెందిన వ్యక్తిగా భావించి నీమచ్‌లో దాడి చేసి చంపారని తెలిపారు. ఈ వీడియోలో దినేశ్ కుష్వాహా.. భన్వర్లాల్ జైన్‌ను దాడి చేస్తున్నట్టు కనిపిస్తున్నదని, ఆ తర్వాత వృద్ధుడు మరణించినట్టు చెప్పారు.
సోషల్ మీడియాలో ఈ వీడియో వైరల్ అయ్యాక భన్వర్లాల్ జైన్ కుటుంబ సభ్యులు పోలీసు స్టేషన్‌లో ఫిర్యాదు చేశారు. వారి ఫిర్యాదుపై కేసు నమోదైంది. దినేశ్ కుష్వాహాను అరెస్టు చేయాలని డిమాండ్ చేశారు.