యువకుడిని తలకిందులుగా.. చెట్టుకు వేలాడదీసి చిత్రహింసలు.. వీడియో వైరల్.. కారణం ఏంటంటే...

గ్రామంలోని యువతితో సంబంధం పెట్టుకున్నాడని ఓ యువకుడి పట్ల అమానుషంగా ప్రవర్తించారు కొందరు. యువకుడికి తలకిందులుగా చెట్టుకు వేలాడదీసి చిత్రహింసలు పెట్టారు. 

రాజస్థాన్ : రాజస్థాన్లోని ఉదయపూర్ లో ఓ అమానవీయ ఘటన చోటుచేసుకుంది. ఈ గ్రామానికి చెందిన యువతితో ఓ యువకుడు సంబంధం పెట్టుకున్నాడని కొంతమంది ఆరోపణలు చేశారు.  అంతేకాదు కొందరు దుండగులు ఆ యువకుడిని ఈ ఆరోపణల నేపథ్యంలో తీవ్రంగా హింసించారు. ఆ యువకుడిని తాళ్లతో కట్టి  చెట్టుకు తలకిందులుగా వేలాడదీశారు. గ్రామానికి చెందిన ఓ యువతితో సన్నిహితంగా ఉంటున్నాడని..  ఆమెను కిడ్నాప్ చేశాడని ఆ యువకుడి మీద గ్రామస్తులు ఆరోపిస్తున్నారు.

దీనికి సంబంధించిన ఓ వీడియో బయటికి వచ్చింది. ఈ వీడియోలో యువకుడిని చెట్టుకి తలకిందులుగా వేలాడదీసి కొడుతున్న  దృశ్యాలు ఉన్నాయి. ఈ వీడియో బయటకి రావడంతో పోలీసులు రంగంలోకి దిగారు. ఘటనకు సంబంధించి ముగ్గురు నిందితులను అదుపులోకి తీసుకొని అరెస్టు చేశారు. వీడియోలో చూపించిన బాధిత యువకుడిని.. ఆ ఘటనకు కారణమైన.. యువకుడితో సంబంధం ఉందని ఆరోపిస్తున్న యువతిని కూడా పోలీసులు విచారణ  చేసి..  వారి వివరణను నమోదు చేశారు. 

ఇదిలా ఉండగా, ఉత్తరప్రదేశ్ రాష్ట్రంలో దారుణ ఘటన వెలుగు చూసింది. 20 ఏళ్ల యువతిని దారుణంగా హత్య చేశారు. ఆ తర్వాత ఆమె మృతదేహాన్ని బియ్యం బస్తాలో కుక్కారు. ఆ బస్తాను నదిలో పడేశారు. అయితే,  ఆమె మృతదేహం నది ఒడ్డుకు కొట్టుకు వచ్చింది. దీంతో ఘటన వెలుగు చూసింది. ఇది పరువు హత్యగా అనుమానిస్తున్నారు. యువతి ఒక యువకుడితో ప్రేమలో ఉందని ఆ వ్యవహారం నచ్చకే కుటుంబ సభ్యులే హత్య చేసి ఉంటారని అనుమానిస్తున్నారు. ఈ నేపథ్యంలోనే  మృతురాలైన యువతి మేనమామ, తండ్రి, సోదరులను పోలీసులు అదుపులోకి తీసుకున్నారు. వీరిని  విచారిస్తున్నారు. 

ఈ ఘటనకు సంబంధించిన పూర్తి వివరాల్లోకి వెళితే.. ఉత్తర ప్రదేశ్ లోని ఖుషి నగర్ జిల్లాలోని బూఢీ గంఢక్ నదిని ఆనుకుని నర్వాజ్యోత్ డ్యామ్ ను నిర్మించారు. కాగా.. ఈ డ్యాముకు దగ్గరలో ఓ యువతి మృతదేహం దొరికింది. ఇది స్థానికంగా కలకలం రేపింది. వెంటనే పోలీసులకు సమాచారం అందడంతో అక్కడికి చేరుకున్న పోలీసులు.. మృతదేహాన్ని స్వాధీనం చేసుకుని పోస్టుమార్టం నిమిత్తం ఆస్పత్రికి తరలించారు. పోలీసుల దర్యాప్తులో ఆ యువతి గ్రామానికి చెందిన ఓ యువకుడితో ప్రేమలో ఉన్నట్లు పోలీసులకు సమాచారం తెలిసింది. 

దీంతో పరువు హత్యగా అనుమానించి ఆ దిశగా దర్యాప్తు చేస్తున్నారు.యువతి తండ్రి, సోదరుడు, మేనమామలతో పాటు.. చనిపోయిన యువతి కుటుంబంలోని మహిళలను కూడా పోలీసులు ప్రశ్నిస్తున్నారు. ఈ కేసులో అన్ని అంశాలను దృష్టిలో ఉంచుకుని..  తీవ్రతను బట్టి దర్యాప్తు చేస్తున్నట్లుగా ఉత్తరప్రదేశ్లోని ఖుషి నగర్ జిల్లా ఎస్పీ రితేష్ కుమార్ సింగ్ తెలిపారు.