పేరు మార్చుకుని మహిళను నమ్మించి మోసం చేశాడు.. తండ్రితోనూ అక్రమ సంబంధానికి బలవంతం

ఉత్తరప్రదేశ్‌లో ఓ దుండగుడు తన పేరును మార్చి చెప్పి ఓ మహిళను మోసం చేశాడు. పరిచయం పెంచుకుని పెళ్లి చేసుకుంటానని చెప్పి శారీరకంగా వశపరుచుకున్నాడు. ఆ తర్వాత తండ్రితోనూ అక్రమ సంబంధానికి బలవంతం చేశాడు.  

లక్నో: ఉత్తరప్రదేశ్‌లో ఓ దారుణ ఘటన వెలుగులోకి వచ్చింది. ఓ దుండగుడు తన పేరును మార్చుకుని మహిళతో పరిచయం చేసుకున్నాడు. పెళ్లి చేసుకుంటానని నమ్మించి శారీరకంగా ఆమెతో కలిశాడు. ఆ తర్వాత తనను పెళ్లి చేసుకోవాలని, లేదంటే ఆ వీడియోలు ఇంటర్నెట్‌లో అప్‌లోడ్ చేస్తానని బెదిరించాడు. అనంతరం, తన తండ్రితోనూ అక్రమ సంబంధం పెట్టుకోవాలని బలవంతం చేశాడు. ఈ ఘటన ఉత్తరప్రదేశ్‌లోని బరేలీ జిల్లాలో చోటుచేసుకుంది. తన గుర్తింపును దాచినందుకు ఈ వ్యక్తి పై కేసు నమోదైంది. పోలీసులు అరెస్టు కూడా చేశారు.

అబిద్ అనే ఓ వ్యక్తి 24 ఏళ్ల మహిళతో పరిచయం పెంచుకున్నాడు. తన పేరు అంకిత్ అని అబద్ధం చెప్పాడు. ఆమెతో సన్నిహితంగా మెలిగి పెళ్లి చేసుకుంటానని మాట ఇచ్చాడు. అదే హామీ పై శారీరకంగా ఆమెతో కలిశాడు.

ఆ తర్వాత ఆమె ప్రైవేట్ ఫొటోలను, వీడియోలతో బెదిరించాడు. తనను పెళ్లి చేసుకోవాలని, లేదంటే ఆ వీడియోలను ఇంటర్నెట్‌లో అప్‌లోడ్ చేస్తామని బ్లాక్ మెయిల్ చేశాడు. ఆ తర్వాత కొన్ని రోజులకు తనను బలవంతంగా మతం మార్పించారని, మాంసం పెట్టి బలవంతంగా తినిపించారని ఆమె ఆరోపించింది. అంతేకాదు, తన తండ్రితో అక్రమ సంబంధం పెట్టుకునేలా నిందితుడు బలవంతం చేశాడని పేర్కొంది.

ఆ కుటుంబం అంతా కలిసి తనను నిర్బంధించారని, తనపై దాడి చేశారని ఆమె ఆరోపణలు చేసింది. ఎలాగోలా వారి నుంచి తప్పించుకుని ఈ ఫిర్యాదు చేసినట్టు వివరించింది. 

ఈ ఫిర్యాదు ఆధారంగా కేసు నమోదు చేసినట్టు సిటీ ఎస్పీ రాహుల్ భాటి తెలిపారు. దర్యాప్తు మొదలు పెట్టామని, ఆధారాలు సేకరించాక లీగల్ యాక్షన్ తీసుకుంటామని వివరించారు.