త్వరలోనే 5 ట్రిలియన్‌ డాలర్ల ఆర్థిక వ్యవస్థగా భార‌త్.. : ప్రధాని మోడీ

Johannesburg: భారత్‌ త్వరలో 5 ట్రిలియన్‌ డాలర్ల ఆర్థిక వ్యవస్థగా మారుతుందని ప్రధాని న‌రేంద్ర మోడీ అన్నారు. బ్రిక్స్‌ బిజినెస్‌ ఫోరమ్‌ లీడర్స్‌ డైలాగ్‌లో మోడీ మాట్లాడుతూ.. ‘మిషన్‌ మోడ్‌’ సంస్కరణలు భారత్‌లో సులభతర వ్యాపార సౌలభ్యాన్ని మెరుగుపరిచాయని చెప్పారు.

BRICS Business Forum Leaders' Dialogue: భారత్ త్వరలోనే 5 ట్రిలియన్ డాలర్ల ఆర్థిక వ్యవస్థగా అవతరిస్తుందనీ, రాబోయే సంవత్సరాల్లో ప్రపంచ వృద్ధి ఇంజిన్ గా మారుతుంద‌ని ప్రధాని నరేంద్ర మోడీ అన్నారు. బ్రిక్స్ బిజినెస్ ఫోరం లీడర్స్ డైలాగ్ లో మోడీ మాట్లాడుతూ మిషన్ మోడ్ సంస్కరణలు భారత్ లో సులభతర వాణిజ్యాన్ని మెరుగుపరిచాయని అన్నారు. దేశ అభివృద్ధి ప్రయాణంలో భాగస్వాములు కావాలని వ్యాపారాలను ఆహ్వానించారు. డిజిటల్ చెల్లింపుల రంగంలో భారత్ సాధించిన పురోగతి గురించి ప్రస్తావిస్తూ, బ్రిక్స్ కోసం యూనిఫైడ్ పేమెంట్స్ ఇంటర్ఫేస్ (యూపీఐ) ను ఉపయోగించడానికి అనేక అవకాశాలు ఉన్నాయని మోడీ అన్నారు. బ్రెజిల్, రష్యా, ఇండియా, చైనా, దక్షిణాఫ్రికా (బ్రిక్స్) దేశాలు కలిసి ప్రపంచ సంక్షేమానికి, ముఖ్యంగా గ్లోబల్ సౌత్ కు గణనీయంగా దోహదం చేయగలవని ఆయన అన్నారు.

2019 తర్వాత బ్రిక్స్ దేశాల తొలి వ్యక్తిగత సదస్సులో పాల్గొనేందుకు దక్షిణాఫ్రికాలో పర్యటిస్తున్న ప్రధాని మోడీ.. ప్రపంచ ఆర్థిక వ్యవస్థలో కల్లోలం ఉన్నప్పటికీ, భారత్ నేడు ప్రపంచంలో వేగంగా అభివృద్ధి చెందుతున్న ప్రధాన ఆర్థిక వ్యవస్థ అని అన్నారు. త్వరలోనే భారత్ 5 ట్రిలియన్ డాలర్ల ఆర్థిక వ్యవస్థగా అవతరిస్తుందన్నారు. రాబోయే సంవత్సరాల్లో భారతదేశం ప్రపంచ వృద్ధి చోదక శక్తిగా ఉంటుందనడంలో ఎటువంటి సందేహం లేదని తెలిపారు. దేశం విపత్తులను, కష్టాలను ఆర్థిక పునరుద్ధరణకు అవకాశాలుగా మార్చుకుందని అన్నారు. గత కొన్నేళ్లుగా మిషన్ మోడ్ లో తాము చేసిన సంస్కరణల ఫలితంగా భారత్ లో ఈజ్ ఆఫ్ డూయింగ్ బిజినెస్ నిరంతరం మెరుగుపడిందని చెప్పారు. సామాజిక, ఆర్థిక సవాళ్లను పరిష్కరించడానికి సాంకేతిక ఆధారిత పరిష్కారాలతో సహా చేపట్టిన సంస్కరణలను, అలాగే సమ్మతి భారాన్ని తగ్గించే ప్రయత్నాలను హైలైట్ చేసిన మోడీ, భారతదేశం ఇప్పుడు రెడ్ టేప్ ను తొలగించడం ద్వారా రెడ్ కార్పెట్ ను అమలు చేస్తోందని అన్నారు.

వస్తు, సేవల పన్ను (జీఎస్టీ), దివాలా చట్టం అమలుతో ఇన్వెస్టర్ల విశ్వాసం పెరిగిందనీ, 2047 నాటికి అభివృద్ధి చెందిన దేశంగా ఎదగాలని భారత ప్రజలు ప్రతిజ్ఞ చేశారని ప్రధాని పేర్కొన్నారు. భారత అభివృద్ధి ప్రయాణంలో చేరాలని వ్యాపారాలను ఆహ్వానించిన మోడీ.. రక్షణ, అంతరిక్షం వంటి రంగాలను ప్రైవేట్ పెట్టుబడులకు తెరిచిందనీ, లాజిస్టిక్స్ ఖర్చు తగ్గడం వల్ల తయారీ రంగం పోటీగా మారుతోందని అన్నారు. సోలార్ ఎనర్జీ, విండ్ ఎనర్జీ, ఎలక్ట్రిక్ వెహికల్స్, గ్రీన్ హైడ్రోజన్, గ్రీన్ అమ్మోనియా వంటి రంగాల్లో భారత్ ను గ్లోబల్ మాన్యుఫ్యాక్చరింగ్ హబ్ గా మార్చేందుకు తమ ప్రభుత్వం చర్యలు తీసుకుంటోందని చెప్పారు. ఇది భారత్ లో పునరుత్పాదక సాంకేతిక పరిజ్ఞానానికి పెద్ద మార్కెట్ ను సృష్టించడం సహజమేనని అన్నారు. సాంకేతిక పరిజ్ఞానం వినియోగంతో ఆర్థిక సమ్మిళితం దిశగా భారత్ పెద్ద ముందడుగు వేసిందనీ, గ్రామీణ మహిళలు ఎక్కువ ప్రయోజనం పొందారని మోడీ అన్నారు.

360 బిలియన్ డాలర్లకు పైగా విలువైన డైరెక్ట్ బెనిఫిట్ ట్రాన్స్ ఫర్స్ (డీబీటీ) చేశామనీ, ఫలితంగా సేవల పంపిణీలో పారదర్శకత పెరిగిందని, అవినీతి, దళారులు తగ్గుముఖం పట్టారన్నారు. యూపీఐ (యూనిఫైడ్ పేమెంట్స్ ఇంటర్ఫేస్) ప్లాట్ ఫామ్ గురించి ప్రస్తావిస్తూ, భారతదేశంలో వీధి వ్యాపారుల నుండి పెద్ద షాపింగ్ మాల్స్ వరకు దీనిని ఉపయోగిస్తున్నారని మోడీ అన్నారు. సింగపూర్, ఫ్రాన్స్ వంటి దేశాలు యూపీఐ ప్లాట్ ఫామ్ లో చేరుతున్నాయనీ, బ్రిక్స్ దేశాలతో కూడా దీనిపై పనిచేయడానికి అనేక అవకాశాలు ఉన్నాయని మోడీ అన్నారు. భవిష్యత్ నవభారతానికి బలమైన పునాది వేసే మౌలిక సదుపాయాలపై పెద్ద ఎత్తున పెట్టుబడులు వ‌స్తున్న విష‌యాల‌ను కూడా మోడీ ప్ర‌స్తావించారు.