5500 కి.మీ. రేంజ్ టార్గెట్:అగ్ని-5 మిస్సైల్ ప్రయోగం సక్సెస్

అగ్ని-5 క్షిపణిని  రాత్రిపూట  భారత్  విజయవంతంగా  ప్రయోగించింది.  అబ్దుల్ కలాం  ఐలాండ్  నుండి  ఇవాళ  ప్రయోగించారు. 

న్యూఢిల్లీ: అగ్ని-5 బాలిస్టిక్  క్షిపణిని రాత్రిపూట  భారత్  గురువారం నాడు విజయవంతంగా ప్రయోగించింది.  డీఆర్‌డీఓ  అభివృద్ధి చేసిన  ఈ క్షిపణిని  ఒడిశా తీరంలోని అబ్దుల్ కలాం ద్వీపం  నుండి పరీక్షించారు. గతంలో కంటే  అగ్ని-5 మిస్సైల్  తేలికగా ఉందని రక్షణ వర్గాలు చెబుతున్నాయి.  అగ్ని-5 మిస్సైల్  సామర్ధ్యాన్ని  ఈ ట్రయల్  రుజువు చేసిందని  రక్షణశాఖ వర్గాలు చెబుతున్నాయి.ఈ మిస్సైల్  ప్రయోగానికి  ముందు బంగాళాఖాతం  ప్రాంతాన్ని నో ఫ్లై జోన్ గా ప్రకటించారు.

ఈ నెల 9వ తేదీన అరుణాచల్ ప్రదేశ్ రాష్ట్రంలోని తవాంగ్  సెక్టార్ లో  చైనా, ఇండియా ఆర్మీ మధ్య  ఘర్షణ చోటు చేసుకుంది.ఈ  తరుణంలో  ఇండియా  అగ్ని-5 క్షిపణిని ప్రయోగించింది.  ఈ క్షిపణి  5500 కి.మీ. దూరంలోని  లక్ష్యాన్ని కచ్చితంగా  చేధించగలదు.  అగ్ని-5 క్షిపణికి చెందిన  అనేక రకాలు గతంలో విజయవంతంగా ప్రయోగించారు.

ఇంటర్ కాంటినెంటల్ బాలిస్టిక్ మిస్సైల్, ఐసీబీఎం, అగ్ని5 ని  దేశీయంగా  డీఆర్‌డీఓ అభివృద్ది చేసింది.   భారతదేశం  అగ్ని-6 పై పని చేస్తుంది.  ఇది జలాంతర్గాముల నుండి  భూమి  నుండి ప్రయోగించగలదు. 8 వేల నుండి  10 వేల కి.మీ. దూరంలోని లక్ష్యాలను  చేధించగలదు.గత రెండు దశాబ్దాలలో  భారతదేశం  అగ్ని-1, అగ్ని- 2, అగ్ని -3, అగ్ని -4, అగ్ని- 5 క్షిపణులను అభివృద్ది  చేసి విజయవంతంగా  ప్రయోగాలు చేసింది. డీఆర్‌డీఓ 2021లో కొత్త తరం అణు సామర్ధ్యం గల బాలిస్టిక్  క్షిపణి  అగ్ని పీ ని విజయవంతంగా పరీక్షించింది