పార్లమెంటు కొత్త భవనం ప్రారంభోత్సవ వేడుకను బహిష్కరించిన 19 ప్రతిపక్ష పార్టీలు.. ఎందుకంటే ?

పార్లమెంట్ కొత్త భవన ప్రారంభోత్సవ వేడుకకు ప్రతిపక్షాలు దూరంగా ఉండాలని నిర్ణయించుకున్నాయి. తాము ఈ వేడుకను బహిష్కరిస్తున్నట్టు 19 పార్టీలు ఇప్పటికే ప్రకటించాయి. అయితే ప్రతిపక్షాలు ఈ విషయంలో పునరాలోచించాలని పార్లమెంటరీ వ్యవహారాల మంత్రి ప్రహ్లాద్ జోషి కోరారు.

వచ్చే ఆదివారం న్యూఢిల్లీలో జరిగే భారత పార్లమెంటు కొత్త భవనం ప్రారంభోత్సవానికి ప్రతిపక్షాలు డుమ్మా కొట్టాలని నిర్ణయించుకున్నాయి. ఈ వేడుకల్లో పాల్గొనబోమని ఇప్పటికే 19 పార్టీలు ప్రకటించాయి. ఈ కార్యక్రమాన్ని తాము బహిష్కరిస్తున్నట్టు తేల్చి చెప్పాయి. ఈ పరిణామం గతంలో చైనాలో జరిగిన ఘటనను తలపిస్తోంది. అక్కడ కూడా ఇలాగే ప్రతిపక్షాల నుంచి ఒక్క పార్టీ కూడా ప్రాతినిధ్యం వహించలేదు. 

పార్లమెంట్ నూతన భవన ప్రారంభోత్సవానికి కాంగ్రెస్, ఆమ్ ఆద్మీ పార్టీ (ఆప్), తృణమూల్ కాంగ్రెస్, ద్రవిడ మున్నేట్ర కజగం (డీఎంకే), వామపక్షాలు, రాష్ట్రీయ జనతా దళ్ (ఆర్జేడీ), జనతాదళ్-యునైటెడ్ (జేడీయూ), నేషనలిస్ట్ కాంగ్రెస్ పార్టీ (ఎన్సీపీ), సమాజ్ వాదీ పార్టీ, ఉద్ధవ్ ఠాక్రేకు చెందిన శివసేన వర్గం పాల్గొనబోమని బుధవారం ప్రకటించాయి.

వచ్చే ఏడాది జరగనున్న సార్వత్రిక ఎన్నికలకు ముందు రాష్ట్రపతి ద్రౌపది ముర్ముకు బదులుగా ప్రధాని నరేంద్ర మోడీ పార్లమెంటు కొత్త భవనాన్ని ప్రారంభించడాన్ని విపక్షాలు తప్పుపడుతున్నాయి. అలాగే జాతిపిత మహాత్మాగాంధీకి భిన్నమైన అభిప్రాయాలను కలిగి ఉన్న, సుదీర్ఘకాలం జైలు జీవితం గడిపిన తర్వాత బ్రిటీష్ వారికి జీవితాంతం అండగా ఉంటామని హామీ ఇచ్చిన హిందుత్వ సిద్ధాంతకర్త వీడీ సావర్కర్ జయంతిని పురస్కరించుకుని ఈ కార్యక్రమాన్ని నిర్వహించడాన్ని పలు పార్టీలు తప్పుబడుతున్నాయి.

‘‘రాష్ట్రపతి ముర్మును పూర్తిగా పక్కనపెట్టి కొత్త పార్లమెంటు భవనాన్ని తానే ప్రారంభించాలని ప్రధాని మోడీ నిర్ణయించడం తీవ్రమైన అవమానమే కాదు, ప్రజాస్వామ్యంపై ప్రత్యక్ష దాడి. ఈ అమానవీయ చర్య రాష్ట్రపతి ఉన్నత పదవిని అవమానించడమే కాకుండా రాజ్యాంగ స్ఫూర్తిని ఉల్లంఘిస్తుంది. దేశం తన తొలి మహిళా ఆదివాసీ రాష్ట్రపతి నియమించుకున్న వేళ చేరిక స్ఫూర్తిని ఇది దెబ్బతీస్తుంది’’ అని ప్రతిపక్షాలు ఒక ప్రకటనలో పేర్కొన్నాయి.

‘‘పార్లమెంటును నిరంతరం నిర్వీర్యం చేస్తున్న ప్రధానికి అప్రజాస్వామిక చర్యలు కొత్తేమీ కాదు. భారత ప్రజల సమస్యలను లేవనెత్తిన ప్రతిపక్ష ఎంపీలపై అనర్హత వేటు వేయడం, సస్పెండ్ చేయడం, మౌనం వహించడం... ప్రజాస్వామ్య ఆత్మను పార్లమెంటు నుంచి లాక్కున్నప్పుడే కొత్త భవనంలో మాకు విలువ లేకుండా పోయింది’’ అని తెలిపారు. 

అయితే దీనిపై స్పందించేందుకు కేంద్ర హోం మంత్రి అమిత్ షా ఓ వార్తా సమావేశంలో నిరాకరించారు. ‘‘మేము ప్రతి ఒక్కరినీ ఆహ్వానించాము. ఇక వారు వారి విజ్ఞత ప్రకారం నిర్ణయం తీసుకోవచ్చు’’ అని అన్నారు. కాగా.. ఈ వేడుకలను బహిష్కరించే నిర్ణయాన్ని ప్రతిపక్ష పార్టీలు పునరాలోచించాలని పార్లమెంటరీ వ్యవహారాల మంత్రి ప్రహ్లాద్ జోషి కోరారు.

అంతకు ముందు కేంద్ర మంత్రి హర్దీప్ సింగ్ పూరి మాట్లాడుతూ.. భారతదేశ పురోగతిపై కాంగ్రెస్ కు జాతీయ స్ఫూర్తి లేదని అన్నారు. 1975 అక్టోబర్ 24న మాజీ ప్రధాని ఇందిరాగాంధీ పార్లమెంట్ అనెక్స్ భవనాన్ని ప్రారంభించారని, 1987 ఆగస్టు 15న రాజీవ్ గాంధీ పార్లమెంట్ లైబ్రరీకి శంకుస్థాపన చేశారని గుర్తు చేశారు. ‘‘మీ ప్రభుత్వాధినేత పార్లమెంటు అనుబంధాన్ని, లైబ్రరీని ప్రారంభించగలిగినప్పుడు, ఇప్పటి ప్రధాని ఎందుకు అలా చేయకూడదు’’అని అన్నారు. దీనిపై కాంగ్రెస్ సీనియర్ నేత జైరాం రమేష్ స్పందిస్తూ.. అధికారులు పనిచేసే అనెక్స్ ను, ఒకవైపు పెద్దగా ఉపయోగించని లైబ్రరీని ప్రారంభించడానికి, ప్రజాస్వామ్య దేవాలయాన్ని, గర్భగుడిని ప్రారంభించడానికి చాలా తేడా ఉందని అన్నారు.