Cyclone Mocha: బంగాళాఖాతంలో అల్ప‌పీడ‌నం.. భారీ వ‌ర్షాలు.. మోచా తుఫాను హెచ్చ‌రిక‌లు జారీ

Cyclone Mocha: మోచా తుఫాను ప్ర‌భావంతో అండమాన్ నికోబార్ దీవుల్లో భారీ వర్షాలు కురుస్తాయ‌ని భార‌త వాతావ‌ర‌ణ శాఖ (ఐఎండీ) హెచ్చ‌రించింది. బంగాళాఖాతంలో ఏర్పడిన వాయుగుండం కారణంగా అండమాన్ నికోబార్ దీవుల యంత్రాంగం ఇప్పటికే హెచ్చరికలు జారీ చేసింది.   

Cyclone Mocha-Heavy Rains: ఆగ్నేయ బంగాళాఖాతంలో ఏర్పడిన వాయుగుండం పశ్చిమ వాయవ్య దిశగా పయనించి తీవ్ర అల్పపీడనంగా మారిందని, అండమాన్ నికోబార్ దీవుల్లోని పోర్ట్ బ్లెయిర్ కు పశ్చిమ నైరుతి దిశగా 540 కిలోమీటర్ల దూరంలో కేంద్రీకృతమైందని వాతావరణ శాఖ (ఐఎండీ) తెలిపింది. మోచా తుఫాను ప్ర‌భావంతో అండమాన్ నికోబార్ దీవుల్లో భారీ వర్షాలు కురుస్తాయ‌ని హెచ్చ‌రించింది. బంగాళాఖాతంలో ఏర్పడిన వాయుగుండం కారణంగా అండమాన్ నికోబార్ దీవుల యంత్రాంగం ఇప్పటికే హెచ్చరికలు జారీ చేసింది. తుఫాను ప‌రిస్థితుల‌ను నిశితంగా పరిశీలిస్తున్న ఐఎండీ,  బంగ్లాదేశ్ లోని కాక్స్ బజార్ కు దక్షిణ నైరుతి దిశగా 1460 కిలోమీటర్లు, మయన్మార్ లోని సిట్వేకు దక్షిణ నైరుతి దిశగా 1350 కిలోమీటర్ల దూరంలో తీవ్ర అల్పపీడనం ఉందని పేర్కొంది.

ఈ అల్పపీడనం కొద్దిసేపు వాయువ్య దిశగా, ఆ తర్వాత ఉత్తర వాయవ్య దిశగా పయనించి సాయంత్రానికి క్రమంగా బలపడి తుఫానుగా మారే అవకాశం ఉందని కోల్ క‌తాలోని ప్రాంతీయ వాతావరణ కేంద్రం డైరెక్టర్ (వాతావరణం) జీకే దాస్ ఒక ప్రకటనలో తెలిపారు. అప్పుడు తీవ్ర అల్పపీడనం వాయువ్య దిశగా కదులుతూనే ఉంటుందని పేర్కొన్నారు. ఆ తర్వాత క్రమంగా బలపడి మే 11న తీవ్ర తుఫానుగా మారనుంద‌ని స‌మాచారం. ఈ నెల 12న మధ్య బంగాళాఖాతం ఆగ్నేయ, దానిని ఆనుకుని ఉన్న ప్రాంతాల్లో అతి తీవ్ర తుఫానుగా మారనుంది. ఆ తర్వాత క్రమంగా తిరిగి ఉత్తర ఈశాన్య దిశగా పయనించే అవకాశం ఉంది. ఇది మే 13 నుంచి కాస్త బలహీనపడి బంగ్లాదేశ్ ఆగ్నేయ, ఉత్తర మయన్మార్ తీరాల గుండా మే 14న బంగ్లాదేశ్ లోని కాక్స్ బజార్, మయన్మార్ (రఖైన్ రాష్ట్రం) లోని క్యూక్ ప్యూ మధ్య గంటకు 110-120 కిలోమీటర్ల వేగంతో గాలులు వీస్తాయని తెలిపారు.

మరోవైపు బంగాళాఖాతంలో ఏర్పడిన ఉపరితల ఆవర్తనం కారణంగా అండమాన్ నికోబార్ దీవుల యంత్రాంగం ఇప్పటికే హెచ్చరికలు జారీ చేసింది. అండమాన్ నికోబార్ తీర ప్రాంత మత్స్యకారులు మే 13 వరకు సముద్రంలో వేటకు వెళ్లొద్దని సూచించింది. తుఫాను వాతావరణం కారణంగా, ప్రయాణికులు, నౌకల భద్రతను దృష్టిలో ఉంచుకుని, పోర్ట్ బ్లెయిర్ లోని డైరెక్టరేట్ ఆఫ్ షిప్పింగ్ సర్వీసెస్ ఒక నోటిఫికేషన్ జారీ చేసింది. "పోర్ట్ బ్లెయిర్,  అవుట్ స్టేషన్లలో ఫోర్ షోర్ సెక్టార్, హార్బర్ / వెహికల్ ఫెర్రీ సేవలకు వాతావరణ పరిస్థితిని బట్టి స్వల్ప వ్యవధిలో అంతరాయం కలిగించవచ్చు. అందువల్ల ప్రయాణికులు, రోజువారీ ప్రయాణికులు, పర్యాటకులు ఎలాంటి అసౌకర్యం కలగకుండా తమ ప్రయాణాన్ని తగిన విధంగా ప్లాన్ చేసుకోవాలని" ఆ ఉత్త‌ర్వుల్లో సూచించారు. ప్రయాణీకులు, పర్యాటకులు ఫీనిక్స్ బేలోని ఇన్ఫర్మేషన్ కౌంటర్ నుండి 03192 - 245555 / 232714, టోల్ ఫ్రీ నంబర్ 18003452714 డయల్ చేయడం ద్వారా నౌకల అప్డేట్ ను పొందవచ్చు.

మోచా సైక్లోన్ గా నామకరణం చేసిన ఈ తుఫానుతో అండమాన్ నికోబార్ దీవుల్లో మే 12 వరకు భారీ వర్షాలు కురిసే అవకాశం ఉంది. ఈ తుఫానుకు ఎర్ర సముద్రం రేవు నగరం పేరు మీదుగా యెమెన్ సూచించిన 'మోచా' అని నామకరణం చేశారు. అండమాన్ నికోబార్ దీవుల్లో ప్రకృతి వైపరీత్యాలను ఎదుర్కొనేందుకు స్టేట్ ఎమర్జెన్సీ ఆపరేషన్ సెంటర్లు 24 గంటలూ పనిచేస్తున్నాయి.