భారతదేశ రుణ భారం రూ.155 లక్షల కోట్లు.. ప్రతి ఒక్కొక్కరిపై ఎంత అప్పు ఉందో తెలుసా?..

బీజేపీ గత తొమ్మిదేళ్ల పాలనలో భారతదేశ అప్పు మూడింతలైందనీ, దేశ రుణ భారం రూ.155 లక్షల కోట్లకు (రూ.కోటిన్నర కోట్లు) చేరిందని కాంగ్రెస్‌ మండిపడింది. అలాగే.. దేశ ఆర్థిక పరిస్థితిపై కేంద్ర ప్రభుత్వం శ్వేతపత్రం విడుదల చేయాలని డిమాండ్‌ చేసింది.

బీజేపీ నేతృత్వంలోని కేంద్ర ప్రభుత్వం దేశాన్ని అప్పుల పాలు చేసిందనీ, గత తొమ్మిదేళ్లలో భారతదేశ అప్పు దాదాపు మూడు రెట్లు పెరిగి.. రూ. 155 లక్షల కోట్లకు చేరుకుందని కాంగ్రెస్ మండిపడింది. దేశ ఆర్థిక వ్యవస్థపై కేంద్రం తీరుపై కాంగ్రెస్ విమర్శలు గుప్పిస్తూ.. ఆర్థిక పరిస్థితిపై ‘శ్వేతపత్రం’ విడుదల చేయాలని డిమాండ్ చేసింది.

ఢిల్లీలోని పార్టీ ప్రధాన కార్యాలయంలో జరిగిన విలేకరుల సమావేశంలో కాంగ్రెస్ అధికార ప్రతినిధి సుప్రియా శ్రీనాట్ మాట్లాడుతూ.. నరేంద్ర మోదీ నేతృత్వంలోని ప్రభుత్వం భారతదేశ అప్పులను మూడు రెట్లు పెంచిందని, 2014లో రూ. 55 లక్షల కోట్ల అప్పు ఉండగా.. అది ఇప్పుడు రూ. 155 లక్షల కోట్లకు పెరిగిందని ఆందోళన వ్యక్తం చేశారు. 

67 ఏళ్లలో 14 మంది ప్రధానులు కలిసి రూ.55 లక్షల కోట్ల అప్పు తీసుకున్నారని, మోదీ తన 9 ఏళ్లలో దాన్ని మూడింతలు చేసి రూ.155 లక్షల కోట్లకు పెంచారని కాంగ్రెస్‌ అధికార ప్రతినిధి సుప్రియా శ్రీనాతే అన్నారు. అంటే 9 ఏళ్లలో దేశం అప్పు 100 లక్షల కోట్లకు పైగా పెరిగింది. ఇది కాకుండా.. వార్తల్లో నిలువడం ద్వారా ఆర్థిక వ్యవస్థను నిర్వహించలేమని, అలాగే వాట్సాప్ యూనివర్సీటిలో తప్పుడు కథనాలను ఫార్వర్డ్‌ల ద్వారా నిర్వహించలేమని ఆమె ఎద్దేవా చేశారు. సమర్థవంతమైన ఆర్థిక నిర్వహణతో మాత్రమే .. దేశ ఆర్థిక వ్యవస్థ మెరుగుపడుతుందన్నారు.

అలాగే భారతదేశంలో పుట్టిన ప్రతి బిడ్డకు పుట్టినప్పటి నుంచి రూ.1.2 లక్షల అప్పులు ఉంటాయన్నారు. ఈ భారీ రుణాన్ని తిరిగి చెల్లించేందుకు దేశం ఏటా రూ.11 లక్షల కోట్లు ఖర్చు చేస్తుందని పేర్కొన్నారు. ఇతర అభివృద్ధి చెందుతున్న, అభివృద్ధి చెందుతున్న మార్కెట్ ఆర్థిక వ్యవస్థలతో పోలిస్తే భారతదేశ GDP నిష్పత్తికి భారతదేశ రుణం 84 శాతానికి పెరిగిందని అన్నారు.

దేశంలోని 23 కోట్ల మంది ప్రజలు దారిద్య్రరేఖకు దిగువన ఉన్నారని, అయితే గత రెండేళ్లలో బిలియనీర్ల సంఖ్య 102 నుంచి 166కు పెరిగిందని కాంగ్రెస్ అధికార ప్రతినిధి తెలిపారు. GST వసూళ్లను కూడా కాంగ్రెస్ నాయకురాలు ఉదహరించారు. ఇది కూడా ప్రధానంగా దిగువ, మధ్యతరగతి ప్రజల నుండి వసూలు చేయబడుతుందని పేర్కొంది. దేశ సంపదలో 3 శాతం మాత్రమే ఉన్న అట్టడుగు 50 శాతం జనాభా జీఎస్టీకి 64 శాతం సహకరిస్తున్నారని, మధ్యతరగతి వారు 36 శాతం సహకరిస్తున్నారని ఆమె వెల్లడించారు. దేశంలోని 80 శాతం సంపదను కలిగి ఉన్న సంపన్నులు కేవలం 3-4 శాతం మాత్రమే ఇస్తున్నారని సుప్రియా శ్రీనాటే పేర్కొన్నారు. జిడిపికి వినియోగ నిష్పత్తి కూడా 61 శాతం నుంచి 60 శాతానికి తగ్గిందని ఆమె హెచ్చరించారు. 

ఇక వంటగ్యాస్, పెట్రోల్, డీజిల్ ధరల గురించి మాట్లాడుతూ.. భారతదేశంలో గ్యాస్ సిలిండర్లు ప్రపంచంలోనే అత్యంత ఖరీదైనవని, పెట్రోల్ మూడవది, డీజిల్ ప్రపంచంలో ఎనిమిదో స్థానంలో ఉందని అన్నారు. అంతర్జాతీయ మార్కెట్‌లో ముడిచమురు ధర తగ్గింపు ప్రయోజనాలను ప్రభుత్వం వినియోగదారులకు ఎందుకు అందించడం లేదని కాంగ్రెస్ అధికార ప్రతినిధి సుప్రియా శ్రీనాట్ ప్రశ్నించారు.