మన దేశంలోనే టూ వీలర్లు ఎందుకు ఎక్కువ తయారు చేస్తారంటే..? ఆనంద్ మహీంద్రా ట్వీట్తో క్లారిటీ
సారాంశం
ప్రముఖ పారిశ్రామిక వేత్త ఆనంద్ మహీంద్రా భారత్లో ప్రపంచంలోనే అత్యధిక సంఖ్యలో టూ వీలర్లు ఎందుకు తయారు చేస్తారో వివరించారు. ఓ ఫొటోను ట్వీట్ చేస్తూ ఆయన ఈ విషయాన్ని వివరించారు. పెద్ద సంఖ్యలో కుర్చీలను, చాపలను చిన్న ద్విచక్ర వాహనంపై నైపుణ్యంగా పేర్చి దంపతులూ అంతే సౌకర్యంగా కూర్చుని ప్రయాణిస్తున్న ఫొటోనూ ఆయన ట్వీట్ చేశారు.
న్యూఢిల్లీ: ప్రముఖ పారిశ్రామిక వేత్త ఆనంద్ మహీంద్రా తరుచూ చాలా ఆసక్తికర ట్వీట్లతో ఆకట్టుకుంటూ ఉంటారు. ఆయన చేసిన ఏ ట్వీట్ అయినా చాలా మందిని నెటిజన్లను ఆకర్షిస్తుంటాయి. ఇతరుల ట్వీట్లపై కామెంట్లు చేసినా.. అవి చమత్కారంగా ఉంటాయి. తాజాగా, ఆయన ఓ ఫొటోను షేర్ చేసి తన కామెంట్ జత చేశారు. ఆ ట్వీట్ కూడా వైరల్ అయింది. ఈ సారి ఆయన టూ వీలర్ల గురించి కామెంట్ చేశారు.
ఇద్దరు దంపతులు చిన్న టూ వీలర్పై కూర్చుని ఉన్న ఫొటోను ఆయన షేర్ చేశారు. ఆ టూ వీలర్పైనే పెద్ద సంఖ్యలో కుర్చీలను చాపలను కూడా సమర్థంగా కట్టిపెట్టారు. అంత లగేజీని టూ వీలర్పై తీసుకెళ్లడం అసాధ్యం అనే అందరూ అనుకుంటాం. కానీ, ఆ దంపతులు సులువుగా వాటిని టూ వీలర్పై ఎక్కించి దంపతులు సైతం అంతే సౌలభ్యంగా కూర్చుని ఆ వాహనంపై ప్రయాణిస్తున్నారు. ఆ ఫొటో ఎవరు చూసినా ఆశ్చర్యపోవడం ఖాయం. ఆ ఫొటోకు ఆయన తనదైన శైలిలో కామెంట్ చేశారు.
ప్రపంచంలో ఎక్కువ టూ వీలర్లు భారత్లోనే ఎందుకు తయారు చేస్తారో ఇప్పుడు మీరు తెలుసుకోగలుగుతారు అంటూ ట్వీట్ చేశారు. ఒక టైర్ ఇంచ్ విస్తీర్ణంలో ఎంత ఎక్కువ మొత్తంలో సరుకును మోయగలమో భారతీయులకే తెలుసు అంటూ పేర్కొన్నారు. ఆ ట్వీట్ను సుమారు 55 వేల మంది లైక్ చేశారు.
ఈ సారి ఓ యువకుడి వీడియోను షేర్ చేశారు. ఆ వీడియోలో ఓ యువకుడు తలపై మోపిన మూటను రెండు చేతుల పట్టుకుని సైకిల్ తొక్కుతూ కనిపించారు. హ్యాండిల్ గాలికి వదిలేసినా సైకిల్ను వేగంగా తొక్కుతూ రోడ్డు మలుపుల్లోనూ సులువుగా సైకిల్ను తీసుకెళ్లారు. ఈ వీడియో చాలా మంది నెటిజన్ల దృష్టిని ఆకట్టుకుంది. దీనిపై ఆనంద్ మహీంద్ర తనదైన శైలిలో స్పందించారు.
ఆయన ఒక మానవ సెగ్వే (కదలకుండా నిలబడితే చాలా నిర్దేశిత చోటుకు తీసుకెళ్లే వాహనం లేదా పరికరం) అని ట్వీట్ చేశారు. ఆయన బాడీలో గైరోస్కోప్ ఇన్బిల్ట్గానే ఉన్నట్టుంది అని ఆనంద్ మహీంద్ర పేర్కొన్నారు. ఇలాంటి ఆణిముత్యాలు మన దేశంలో, ఇంతటి ట్యాలెంట్ ఉన్నవారు ఎందరో ఉన్నారని, కానీ, చాలా వరకు వారు వెలుగులోకి రాకపోవడంపై బాధ కలుగుతుందని వివరించారు.
ఆ వీడియోలో యువకుడు ఎంతమాత్రం సంకోచం లేకుండా సన్నని రోడ్డుపై వేగంగా సైకిల్ను తొక్కుతూ వెళ్లారు. తన చేతులను తలపై మోపిన మూటకు అప్పజెప్పారు. హ్యాండిల్ను గాలికొదిలేశారు. అయినా.. ఆ బరువు మోస్తూ వేగంగా సైకిల్ తొక్కుతూ హ్యాండిల్ను తన అధీనంలోనే ఉంచుకోగలిగారు. ఆ వేగంతోనూ రోడ్డు మలుపుల్లోనూ ఎంత మేరకు మలగాలో ఆ మేరకు హ్యాండిల్ను ముట్టకుండానే తిప్పేలా చేసుకోగలిగారు. ఇవన్నీ చేసుకుంటూనే తన మొత్తం దృష్టి తలపై ఉన్న మూటపై ఉన్నది.