power crisis: ఒక‌వైపు ఎండ‌లు.. మ‌రోవైపు బొగ్గు కొరత మధ్య ప‌లు రాష్ట్రాల్లో విద్యుత్ సంక్షోభం !

Power outage: బొగ్గు కొరత తీవ్రమవుతున్న నేపథ్యంలో.. దేశ‌రాజ‌ధాని ఢిల్లీలో మెట్రో రైళ్లు, ఆస్పత్రులు స‌హా ఇత‌ర ముఖ్య‌మైన‌ సంస్థ‌ల‌కు నిరంతరాయంగా విద్యుత్ సరఫరాను అందించడంలో ఎదురుదెబ్బ తగులుతుందని ఢిల్లీ ప్రభుత్వం పేర్కొంది.  

Power outage in multiple states: ఒక‌వైపు మండుతున్న ఎండ‌లు మ‌రోవైపు బొగ్గుకొర‌త మ‌ధ్య దేశంలోని ప‌లు రాష్ట్రాలు విద్యుత్ సంక్షోభాన్ని ఎదుర్కొంటున్నాయ‌ని రిపోర్టులు పేర్కొంటున్నాయి. ఇలాంటి ప‌రిస్థితుల మ‌ధ్య ప్ర‌జ‌ల మ‌రింత‌గా ఇబ్బందులు ఎదుర్కొంటున్నారు. పెరుగుతున్న ఎండ‌ల మ‌ధ్య విద్యుత్ కోత‌లు దేశంలోని అనేక ప్రాంతాల్లో ప్ర‌జ‌ల‌ను ఈ వేసవి మరింత భరించలేని విధంగా మారుస్తున్న ప‌రిస్థితులు ఉన్నాయి. బొగ్గు కొరత తీవ్రమవుతున్న నేపథ్యంలో.. దేశ‌రాజ‌ధాని ఢిల్లీలో మెట్రో రైళ్లు, ఆస్పత్రులు స‌హా ఇత‌ర ముఖ్య‌మైన‌ సంస్థ‌ల‌కు నిరంతరాయంగా విద్యుత్ సరఫరాను అందించడంలో ఎదురుదెబ్బ తగులుతుందని ఢిల్లీ ప్రభుత్వం పేర్కొన‌డం ప్ర‌స్తుత విద్యుత్ సంక్షోభానికి అద్దంప‌డుతున్న‌ది. ఇప్ప‌టికే పంజాబ్, ఉత్తరప్రదేశ్, మహారాష్ట్ర, హర్యానా, ఆంధ్రప్రదేశ్ వంటి రాష్ట్రాలు తక్కువ బొగ్గు నిల్వల మధ్య విద్యుత్ కోతలను ఎదుర్కొంటున్నాయి.

దేశ‌రాధానిలోనూ ఈ ప‌రిస్థితి ఏర్ప‌డింది. ప్ర‌స్తుత పరిస్థితిని అంచనా వేయడానికి విద్యుత్ మంత్రి సత్యేందర్ జైన్ అత్యవసర సమావేశాన్ని నిర్వహించారు. దేశ రాజధానికి విద్యుత్ సరఫరా చేసే పవర్ ప్లాంట్‌లకు తగినంత బొగ్గు లభ్యత ఉండేలా చూడాలని అభ్యర్థిస్తూ కేంద్రానికి లేఖ రాశారు. "దాద్రీ-II మరియు ఉంచాహర్ పవర్ స్టేషన్ల నుండి విద్యుత్ సరఫరా అంతరాయం కారణంగా, ఢిల్లీ మెట్రో మరియు ఢిల్లీ ప్రభుత్వ ఆస్పత్రులతో సహా అనేక ముఖ్యమైన సంస్థలకు 24 గంటల విద్యుత్ సరఫరాలో సమస్య ఉండవచ్చు" అని ప్రభుత్వ ప్రకటనలో హెచ్చ‌రించింది. ప్రస్తుతం ఢిల్లీలో విద్యుత్ డిమాండ్‌లో 25-30 శాతం ఈ పవర్ స్టేషన్ల ద్వారా తీర్చబడుతున్నాయని, అవి బొగ్గు కొరతను ఎదుర్కొంటున్నాయని జైన్ చెప్పారు. ప్రభుత్వం పరిస్థితిని నిశితంగా పరిశీలిస్తోందని, రాజధానిలోని కొన్ని ప్రాంతాల్లో ప్రజలకు విద్యుత్ అంతరాయం కలగకుండా చూసేందుకు అన్ని విధాలా కృషి చేస్తోందన్నారు. "ఢిల్లీలోని కొన్ని ప్రాంతాలలో బ్లాక్‌అవుట్‌లను నివారించడంలో ఈ పవర్ స్టేషన్‌లు ముఖ్యమైన పాత్ర పోషిస్తాయి. రాబోయే వేసవి కాలంలో ఢిల్లీ మెట్రో రైల్ కార్పొరేషన్, ఆస్పత్రులు మరియు ప్రజలకు నిరంతర విద్యుత్ సరఫరాను నిర్ధారించడానికి కూడా ఇది చాలా అవసరం" అని మంత్రి చెప్పారు.

నేషనల్ పవర్ పోర్టల్ రోజువారీ బొగ్గు నివేదిక ప్రకారం.. దాద్రీ-II, ఉంచాహర్, కహల్‌గావ్, ఫరక్కా మరియు ఝజ్జర్ పవర్ ప్లాంట్‌లు బొగ్గు కొరతను ఎదుర్కొంటున్నాయి. ఇది ఎండాకాలంతో పాటు, విద్యుత్ కోసం రికార్డు డిమాండ్‌ను నిర్వహించడానికి రాష్ట్రాలు కష్టపడుతున్నందున దేశంలోని అనేక ప్రాంతాలలో విద్యుత్ కోత‌ల‌ను ప్రేరేపించింది.  విద్యుత్ ప్లాంట్లకు బొగ్గు సరఫరాను పెంచే చర్యలతో పాటు, ఇన్వెంటరీలను నిర్మించడానికి వచ్చే మూడేళ్లపాటు తమ దిగుమతులను పెంచాలని కేంద్ర ప్రభుత్వం రాష్ట్రాలను కోరింది. దేశవ్యాప్తంగా థర్మల్‌ ప్లాంట్లు బొగ్గు కొరతతో సతమతమవుతున్నాయని, దేశంలో విద్యుత్ సంక్షోభం ఏర్పడుతుందని ఆల్‌ ఇండియా పవర్‌ ఇంజినీర్స్‌ ఫెడరేషన్‌ పేర్కొంది. జార్ఖండ్‌లోని రాంచీలో విద్యుత్తు అంతరాయం కారణంగా రోజువారీ జీవితం అస్తవ్యస్తమైంది. "విద్యుత్ లభ్యత 5 గంటల కంటే ఎక్కువ కాదు, మా వ్యాపారం, రోజువారీ జీవితం ప్రభావితమైంది" అని స్టేషనరీ దుకాణాన్ని నడుపుతున్న స్థానికుడు చెప్పారు. సెంట్రల్ కోల్‌ఫీల్డ్స్ లిమిటెడ్ (CCL) MD-చైర్మన్ PM ప్రసాద్ బొగ్గు స్థితి గురించి మాట్లాడుతూ.. "మేము CCL మరియు ఈస్టర్న్ కోల్‌ఫీల్డ్ లిమిటెడ్ (ECL) ఉత్పత్తిని సమీక్షించాము. మాకు (CCL) 2.20 లక్షల టన్నులు బొగ్గు అందించాలనే లక్ష్యం ఇవ్వబడింది.  75,000 టన్నుల బొగ్గును అందించాలని ECLని కోరింది. ప్ర‌స్తుతం, మా వద్ద 6.6 మిలియన్ టన్నుల బొగ్గు నిల్వ ఉంది. ప్రతిరోజూ 2 లక్షల టన్నులు పంపిణీ చేయబ‌డుతుంది. కాబట్టి మా స్టాక్ 30 రోజుల వరకు ఉంటుంది" అని తెలిపారు. 

రాజస్థాన్ ఫ్యాక్టరీలకు నాలుగు గంటల విద్యుత్ కోతలను విధిస్తున్నట్టు సంబంధిత వ‌ర్గాలు పేర్కొన్నాయి. పెరుగుతున్న విద్యుత్ డిమాండ్‌ను నిర్వహించడానికి పారిశ్రామిక కార్యకలాపాలకు అంతరాయం కలిగించే మూడవ రాష్ట్రంగా నిలిచింది. ఎండ‌ల తీవ్ర‌త, ఆర్థిక కార్యకలాపాలు పుంజుకోవడంతో దాదాపు నాలుగు దశాబ్దాలలో అత్యంత వేగంగా విద్యుత్ డిమాండ్ పెరుగుతున్నందున రాబోయే రోజుల్లో విద్యుత్ కోతలు మరింత తీవ్రమవుతాయని భావిస్తున్నారు. విద్యుత్ డిమాండ్ పెరగడం వల్ల దేశంలో విద్యుత్ ఉత్పత్తిలో ఉపయోగించే ప్రధాన ఇంధనం బొగ్గు కోసం భారతదేశం పెనుగులాడుతోంది. బొగ్గు నిల్వలు కనీసం తొమ్మిదేళ్లలో వేసవికి ముందు కనిష్ట స్థాయికి చేరుకున్నాయి. విద్యుత్ కొర‌త నేప‌థ్యంలో గుజరాత్, ఆంధ్రప్రదేశ్ లు ఈ నెలలో పారిశ్రామిక కార్యకలాపాలను పరిమితం చేశాయి.