శుభ్ మన్ గిల్ సోదరిని అసభ్యకరంగా ట్రోల్ చేసిన వారిపై చర్యలు తీసుకుంటాం - డీసీడబ్ల్యూ చీఫ్ స్వాతి మలివాల్

క్రికెటర్ శుభ్ మన్ గిల్ సోెదరిని అసభ్యకరంగా దూషిస్తూ ట్రోల్ చేసిన వారిపై చర్యలు తీసుకుంటామని ఢిల్లీ మహిళా కమిషన్ చీఫ్ స్వాతి మలివాల్ అన్నారు. తమ అభిమాన జట్టు ఓడిపోయినంత మాత్రాన ఓ మహిళపై ఇలా ప్రవర్తించడం సిగ్గు చేటు అని ఆమె ట్వీట్ చేశారు. 

క్రికెటర్ శుభ్ మన్ గిల్  సోదరి షహనీల్ ను సోషల్ మీడియాలో అసభ్యకరంగా దూషించిన ట్రోలర్లపై చర్యలు తీసుకుంటామని ఢిల్లీ మహిళా కమిషన్ చీఫ్ స్వాతి మలివాల్ హామీ ఇచ్చారు. ఐపీఎల్ -2023 నుండి రాయల్ ఛాలెంజర్స్ బెంగళూరు ఓడిపోవడానికి గుజరాత్ టైటాన్స్ ఓపెనర్ గిల్ కారణమంటూ ఆర్సీబీ ఫ్యాన్స్ ఆగ్రహం వ్యక్తం చేసిన సంగతి తెలిసిందే. శుభ్ మన్ గిల్, అతడి సోదరిని సోషల్ మీడియాలో టార్గెట్ చేస్తూ విపరీతంగా ట్రోలింగ్ చేశారు. అందులో అసభ్యకరమైన పదజాలాన్ని ఉపయోగించారు.

అయితే ఈ ఘటనపై ఢిల్లీ మహిళా కమిషన్ చీఫ్ స్వాతి మలివాల్ స్పందించారు. ఆ ట్రోలర్లపై చర్యలు తీసుకుంటామంటూ ట్విట్టర్ వేదిక ఆమె హామీ ఇచ్చారు. ‘‘తాము ఫాలో అయ్యే జట్టు ఒక మ్యాచ్ లో ఓడిపోయినంత మాత్రాన శుభ్ మన్ గిల్ సోదరిని ట్రోలర్లు దూషించడం చాలా సిగ్గుచేటు. గతంలో విరాట్ కోహ్లీ కుమార్తెను దూషించిన వారిపై చర్యలు తీసుకున్నాం. గిల్ సోదరిని వేధింపులకు గురిచేసిన వారందరిపై కూడా డీసీడబ్ల్యూ చర్యలు తీసుకుంటుంది. దీనిని సహించేది లేదు’ అని ఆమె ట్వీట్ చేశారు. 

బెంగళూరులో ఆర్సీబీ నిర్దేశించిన 198 పరుగుల లక్ష్యాన్ని శుభ్ మన్ గిల్ కేవలం 52 బంతుల్లోనే 104 పరుగులు చేసి ఛేదించాడు. ప్లేఆఫ్స్ రేసులో తప్పక గెలవాల్సిన మ్యాచ్ లో ఆర్సీబీ ఓడిపోయింది. అయితే ఈ మ్యాచ్ లో అద్భుతంగా ఆడిన గిల్ కు ప్లేయర్ ఆఫ్ ద మ్యాచ్ అవార్డు లభించింది. మ్యాచ్ ముగిసిన తర్వాత గుజరాత్ టైటాన్స్.. మ్యాచ్ కు సంబంధించిన ఫొటోను పోస్ట్ చేసి ‘ఇది ఇప్పుడే మొదలవుతుంది’ అని క్యాప్షన్ ఉంచింది. ఈ పోస్టుకు సూర్యకుమార్ యాదవ్, రషీద్ ఖాన్, కృనాల్ పాండ్యా సహా పలువురు సహచర క్రికెటర్ల నుంచి ప్రశంసలు లభించాయి. అయితే కొందరు అభిమానులు ఈ పోస్టుకు అసభ్యకరమైన కామెంట్లు కూడా పంపారు. గిల్ సోదరి కూడా ఈ పోస్టుకు ‘మై బేబీ’ అని కామెంట్ చేసింది. అయితే ఆమె రియాక్షన్ పై ఆగ్రహించిన అభిమానులు అసభ్యకరమైన, అసభ్యకరమైన కామెంట్లు రాయడం మొదలుపెట్టారు.