ఓరి నాయనో.. చూస్తుండగానే కుప్పకూలిన 4 అంతస్థుల భవనం.. ఢిల్లీలో ఘటన (వీడియో)

ఢిల్లీలో ఓ నాలుగు అంతస్థుల భవనం కుప్పకూలిపోయింది. ఈ ఘటనలో ఎలాంటి ప్రాణనష్టమూ జరగలేదు. పట్టణంలోని శాస్త్రినగర్ లో ఈ ప్రమాదం చోటు చేసుకుంది. 

ఢిల్లీలో ఓ భవనం అందరూ చూస్తుండగానే ఒక్క సారిగా కుప్పకూలిపోయింది. ఉత్తర ఢిల్లీలోని శాస్త్రి నగర్‌ ప్రాంతంలో సోమవారం ఉదయం ఈ ఘటన చోటు చేసుకుంది.

అయితే అదృష్టవశాత్తూ ఆ ఇళ్లు ఆ సమయంలో ఖాళీగా ఉండటంతో ఎలాంటి ప్రాణనష్టమూ జరగలేదు. ఆ భవనం కూలిన ప్రదేశంలో ఓ రోడ్డు ఉంది. ఈ ఘటన జరిగిన సమయంలో అక్కడ కూడా ఎవరూ లేరు. దీనికి సంబంధించిన వీడియో బయటకు వచ్చింది. ఇందులో భవనం కుప్పకూలిన తీరు స్పష్టంగా కనిపిస్తోంది. 

భవనం కూలిన సమాచారం అందుకున్న ఢిల్లీ పోలీసులు, అగ్నిమాపక శాఖ, అంబులెన్స్‌లను సంఘటనా స్థలానికి తరలించారు. ఈ ఘటనకు సంబంధించి మరిన్ని వివరాలు తెలియాల్సి ఉంది.